ຂ່າວຕ່າງປະເທດລາຍງານ ເມື່ອວັນທີ 15 ມິຖຸນາ ຜ່ານມາ, ອົງການເພື່ອການຮ່ວມມືທາງດ້ານເສດຖະກິດ ແລະ ການພັດທະນາ (OECD) ໄດ້ເປີດເຜີຍບົດລາຍງານການຄາດຄະເນໃນເບື້ອງຕົ້ນລະບຸວ່າ: ໂຕເລກລວມຍອດຜະລິດຕະພັນພາຍໃນປະເທດ (GDP) ຂອງກຸ່ມປະເທດເສດຖະກິດ G20 ຊຶ່ງເປັນກຸ່ມປະເທດທີ່ມີຂະໜາດເສດຖະກິດໃຫຍ່ທີ່ສຸດຂອງໂລກ ຂະຫຍາຍຕົວ 0,9% ໃນໄຕມາດທຳອິດຂອງປີ 2023 ເມື່ອທຽບແບບລາຍໄຕມາດ.
ບົດລາຍງານລະບຸວ່າ: ໃນໄຕມາດທຳອິດຂອງປີນີ້ການເຕີບໂຕທາງດ້ານເສດຖະກິດຂອງກຸ່ມ G20 ໄດ້ຮັບແຮງໜູນຈາກການກັບມາເປີດເສດຖະກິດຂອງຈີນ ຊຶ່ງມີເສດຖະກິດຂະຫຍາຍຕົວທີ່ 2,2% ເມື່ອທຽບກັບ 0,6% ໃນໄຕມາດທີ 4 ຂອງປີ 2022 ຜ່ານມາ. ໃນບັນດາກຸ່ມປະເທດບຣິກ (BRICS) ຊຶ່ງປະກອບດ້ວຍ ເບຣຊິນ, ຣັດເຊຍ, ອິນເດຍ, ຈີນ ແລະ ອາຟຣິກາໃຕ້ນັ້ນ ເສດຖະກິດອິນເດຍ ຂະຫຍາຍຕົວ 1,9% ໃນໄຕມາດທຳອິດຂອງປີ 2023. ຂະນະທີ່ເສດຖະກິດຂອງເບຣຊິນຂະຫຍາຍຕົວ 1,9% ແລະ ອາຟຣິກາໃຕ້ຂະຫຍາຍຕົວ 0,4% ໃນໄຕມາດທຳອິດຂອງປີນີ້ ຊຶ່ງຟື້ນຕົວຈາກການຫຼຸດລົງໃນໄຕມາດສຸດທ້າຍຂອງປີຜ່ານມາ. ນອກຈາກນີ້, OECD ລະບຸວ່າ: ການຂະຫຍາຍຕົວຂອງເສດຖະກິດອາເມຣິກາຫຼຸດລົງເຫຼືອ 0,3% ໃນໄຕມາດທຳອິດຂອງປີນີ້ ເມື່ອທຽບກັບ 0,6% ໃນໄຕມາດທີ 4 ຂອງປີ 2022 ຜ່ານມາ. OECD ລະບຸຕື່ມວ່າ: ເຢຍລະມັນປະເຊີນກັບພາວະຄວາມຖົດຖອຍທາງດ້ານເຕັກນິກ ເນື່ອງຈາກເສດຖະກິດຫຼຸດລົງຕິດຕໍ່ກັນ 2 ໄຕມາດ ໂດຍຕິດລົບ 0,3% ໃນໄຕມາດທຳອິດຂອງປີນີ້ ຫຼັງຈາກຕິດລົບ 0,4% ໃນໄຕມາດທີ 4 ຂອງປີ 2022 ສາເຫດຫຼັກມາຈາກການໃຊ້ຈ່າຍພາກລັດ ແລະ ການບໍລິໂພກພາກເອກະຊົນປັບຕົວຫຼຸດລົງ.
ສ່ວນຝຣັ່ງ ແລະ ການາດາ ຫຼຸດພົ້ນອອກຈາກພາວະເສດຖະກິດທີ່ເຊື່ອງຊ້າໃນໄຕມາດທີ 4 ຂອງປີ 2022 ເນື່ອງຈາກເສດຖະກິດຂອງທັງສອງປະເທດຂະຫຍາຍຕົວ 0,2% ແລະ 0,8% ຕາມລຳດັບໃນໄຕມາດທຳອິດຂອງປີນີ້ ທັງນັ້ນ, OECD ລະບຸວ່າ: ເສດຖະກິດຂອງປະເທດໃນກຸ່ມ G20 ທີ່ຂະຫຍາຍຕົວສູງເກີນລະດັບກ່ອນເກີດການແຜ່ລະບາດຂອງພະຍາດໂຄວິດ-19 ຍົກເວັ້ນອັງກິດ ແລະ ເຢຍລະມັນ.
