ໃນວັນທີ 27 ພຶດສະພາ 2023, ສະຖານເອກອັກຄະລັດຖະທູດ ແຫ່ງ ສປປ ລາວ ທີ່ນະຄອນຫຼວງປາຣີ ໄດ້ຕ້ອນຮັບການຢ້ຽມຢາມຂອງນາງງາມລາວ ຈຳ ນວນ 2 ນາງ ຄື: ນາງ ປ່າເຢັ້ງຊາ ລໍ່, ນາງງາມຈັກວະວານລາວ ປີ 2022 ແລະ ນາງ ປີຍະມາດ ພູນປະເສີດ, ນາງງາມມິສອິນເຕີຣ໌ເນຊັນແນລລາວ ປີ 2018. ການຕ້ອນ ຮັບໃນຄັ້ງນີ້ ເປັນກຽດຕ້ອນຮັບໂດຍທ່ານ ທ່ານ ອະໂສກະ ຣາຊະພົນ, ອຸປະທູດຊົ່ວຄາວ ແຫ່ງ ສປປ ລາວ ປະຈຳປະເທດ ຝຣັ່ງ ພ້ອມດ້ວຍພັນລະຍາ; ທ່ານ ນາງ ວອນສີ ອຸດທະຈັກ, ພັນລະຍາທ່ານ ເອກອັກຄະລັດດຖະທູດລາວ ທີ່ ນະຄອນຫຼວງປາຣີ, ພ້ອມດ້ວຍພະນັກ ງານພາຍໃນສະຖານທູດ, ບັນດາສະມາ ຄົມ ຄົນເຊື້ອຊາດລາວ ຢູ່ປະເທດຝຣັ່ງ ຕະຫຼອດຮອດພໍ່ແມ່ພີ່ນ້ອງຄົນເຊື້ອຊາດລາວທີ່ອາໄສຢູ່ປະເທດ ຝຣັ່ງ ຈໍານວນ 80 ກວ່າທ່ານ ເຂົ້າຮ່ວມ.
ໃນການຕ້ອນຮັບໃນຄັ້ງນີ້, ສອງນາງງາມລາວ ກໍ່ໄດ້ຜັດປ່ຽນກັນຂຶ້ນມີຄຳເຫັນ ເຊິ່ງໄດ້ເນັ້ນເຖິງຄວາມສຳຄັນຂອງການປະ ຕິບັດໜ້າທີ່ຂອງນາງງາມລາວ, ເຜີຍແຜ່ວັດ ທະນະທຳອັນດີງາມຂອງຊາດລາວເຮົາສູ່ເວທີສາກົນ ແລະ ໃຫ້ໂລກໄດ້ຮັບຮູ້ກ່ຽວ ກັບປະເທດລາວເຮົານັບມື້ນັບຫຼາຍຂຶ້ນ. ນອກຈາກນັ້ນ, ສອງນາງງາມລາວ ກໍ່ໄດ້ຮຽກຮ້ອງໃຫ້ພໍ່ແມ່ພີ່ນ້ອງຊາວລາວທີ່ດຳລົງຊີວິດຢູ່ຕ່າງປະເທດ ໃຫ້ພ້ອມກັນສົ່ງ ເສີມ ແລະ ປົກປັກຮັກສາຮີດຄອງປະເພນີອັນດີຂອງຊາດລາວໄວ້, ສ້າງຄວາມສາມັກຄີຮັກແພງກັນໃຫ້ເປັນປຶກແຜ່ນ ແລະ ຊ່ວຍເຫຼືອເຊິ່ງກັນ ແລະ ກັນ.
ໃນໂອກາດນີ້, ທ່ານ ມິ່ງ ບຸບຜາ, ທີ່ເປັນຄົນເຊື້ອຊາດຈີນ-ລາວ ແລະ ທັງເປັນຮອງປະທານ ຂອງລີກສາທາລະນະປະໂຫຍກສາກົນ ຂອງ ຝຣັ່ງ ກໍ່ໄດ້ຂື້ນມອບຫຼຽນ ທີ່ມີຊື່ວ່າ: La Médaille du Civisme et du Benevolat, ເຊິ່ງມີຄວາມໝາຍວ່າ ເປັນຫຼຽນກຽດຕິຍົດຂອງພົນລະເມືອງດີ ແລະ ອາສາສະໝັກຜູ້ດີເດັ່ນ ໃຫ້ແກ່ ນາງ ປ່າເຢັ້ງຊາ ລໍ່ ແລະ ນາງ ປີຍະມາດ ພູນປະເສີດ, ຫຼຽນດັ່ງກ່າວແມ່ນຖືກຮັບຮູ້ໂດຍລັດຖະບານຝຣັ່ງ ແລະ ມອບໃຫ້ແກ່ບຸກຄົນທີ່ມີຄຸນງາມຄວາມດີຕໍ່ປະເທດ ຊາດບ້ານເມືອງ ເທົ່ານັ້ນ. ສະນັ້ນ, ຈຶ່ງເຫັນໄດ້ວ່າ ບົດບາດຂອງສອງນາງງາມລາວ ໃນວຽກງານການເຄື່ອນໄຫວ ຢູ່ຕ່າງປະ ເທດ ໂດຍສະເພາະແມ່ນການຢ້ຽມຢາມຖາມຂ່າວ ແລະ ສ້າງຄວາມຮັກແພງກັບຄົນເຊື້ອຊາດລາວ ທີ່ອາໄສຢູ່ປະເທດຝຣັ່ງ ແມ່ນເຮັດໄດ້ຢ່າງກວ້າງຂວາງ, ຊຶ່ງສະແດງໃຫ້ເຫັນວ່າ ມີຄວາມເໝາະສົມແລ້ວທີ່ທັງສອງນາງງາມລາວ ເຮົາໄດ້ຮັບຫຼຽນກຽດຕິຍົດ ດັ່ງກ່າວ.
ໃນໂອກາດດັ່ງກ່າວ, ທ່ານ ອະໂສກະ ຣາຊະພົນ, ອຸປະທູດຊົ່ວຄາວ ແຫ່ງ ສປປ ລາວ ປະຈຳປະເທດຝຣັ່ງ ກໍ່ໄດ້ມີຄຳເຫັນ ເຊິ່ງທ່ານໄດ້ກ່າວຍິນດີຕ້ອນຮັບສອງນາງງາມລາວຢ່າງເປັນທາງການ ພ້ອມທັງສະ ແດງຄວາມຍ້ອງຍໍຊົມເຊີຍຕໍ່ຜົນງານປະ ກອບສ່ວນຂອງແມ່ຍິງລາວ ທັງຢູ່ພາຍໃນ ແລະ ຕ່າງປະເທດ ເຂົ້າໃນວຽກງານໂຄ ສະນາເຜີຍແຜ່ຮີດຄອງປະເພນີອັນດີງາມຂອງລາວເຮົາ ເປັນການປະກອບສ່ວນເຂົ້າໃນການປົກປັກຮັກສາ ແລະ ກໍ່ສ້າງປະເທດຊາດ; ຊີ້ໃຫ້ເຫັນເຖິງຄວາມເອົາໃຈໃສ່ຂອງພັກ ແລະ ລັດຖະບານຕໍ່ບົດບາດ ຂອງແມ່ຍິງລາວ ເຊິ່ງຍາມໃດກໍ່ໄດ້ປະກອບສ່ວນເຂົ້າຢູ່ໃນວຽກງານສຳ ຄັນຂອງກົງຈັກລັດຖະບານຫຼາຍດ້ານ ໂດຍສະເພາະແມ່ນການສົ່ງເສີມການຈັດການປະກວດນາງສາວລາວ ເພື່ອເຮັດໃຫ້ເວທີດັ່ງກ່າວນັບມື້ນັບມີຊື່ສຽງໃນລະດັບສາກົນຂຶ້ນໄປເລື້ອຍໆ.
ໃນຕອນບ່າຍຂອງວັນດຽວກັນ, ສະຖານ ທູດ ກໍ່ໄດ້ຈັດພາເຂົ້າສາມັກຄີ ໂດຍການປະກອບສ່ວນຂອງພີ່ນ້ອງຊາວລາວທີ່ມາຮ່ວມງານ ແລະຈັດກິດຈະກຳມ່ວນຊື່ນຢູ່ພາຍໃນສະຖານທູດ ຢ່າງເປັນຂະບວນຟົດຟື້ນ ເຊິ່ງໄດ້ເຮັດໃຫ້ຜູ້ມາຮ່ວມງານມີຄວາມເພິ່ງພໍໃຈເປັນຢ່າງດີ.
ຂ່າວ;ພາບ: ກົມການຂ່າວ, ກະຊວງການຕ່າງປະເທດ
