ຫວ່າງບໍ່ດົນມານີ້ ທີ່ພະແນກແຮງງານ ແລະ ສະຫວັດດີການສັງຄົມແຂວງເຊກອງ ອົງການກາແດງແຂວງເຊກອງ ໄດ້ຈັດຊຸດຝຶກອົບຮົມ ການປະຖົມພະຍາບານ ໃຫ້ແກ່ພະນັກງານອາສາສະໝັກກູ້ໄພ ທີ່ມາຈາກບັນດາພະແນກການອ້ອມຂ້າງແຂວງ, ເມືອງລະມາມ ແລະ 2 ກໍາລັງປະກອບອາວຸດ ໂດຍທ່ານ ອຸພອນ ໄຊຍະສານ ຮອງຫົວໜ້າອົງການກາແດງແຂວງເຊກອງ ພ້ອມທີມງານຄູຝຶກມາຈາກພະແນກສາທາລະນະສຸກແຂວງ, ອົງການກາແດງ ພ້ອມດ້ວຍອາສາສະໝັກກູ້ໄພ.
ທ່ານຮອງຫົວໜ້າອົງການກາແດງແຂວງເຊກອງ ກ່າວວ່າ: ການຈັດຊຸດຝຶກອົບຮົມການປະຖົມພະຍາບານ ໃຫ້ແກ່ພະນັກງານອາສາສະໝັກກູ້ໄພຄັ້ງນີ້ ເພື່ອສ້າງທັກສະຄວາມຮູ້ທາງດ້ານການຊ່ວຍເຫຼືອສຸກເສີນ ໃນກໍລະນີເກີດອຸບັດເຫດຕ່າງໆ ແລ້ວມີຄົນບາດເຈັບ ເພື່ອຊ່ວຍເຫຼືອໃນເບື້ອງຕົ້ນໃຫ້ທັນເວລາກ່ອນຈະນໍາສົ່ງສຸກສາລາ ແລະ ໂຮງໝໍໃນຂັ້ນຕໍ່ໄປ, ສະນັ້ນ, ຮຽກຮ້ອງໃຫ້ສໍາມະນາກອນທຸກພາກສ່ວນທີ່ເຂົ້າຮ່ວມຝຶກໃນຄັ້ງນີ້ ໃຫ້ພ້ອມກັນຕັ້ງໃຈຟັງ ແລະ ພ້ອມກັນປະຕິບັດຕາມການສາທິດຕົວຈິງໄປພ້ອມໃຫ້ເຂົ້າໃຈ ເພື່ອນໍາຄວາມຮູ້ດັ່ງກ່າວໄປປະຕິບັດຊ່ວຍເຫຼືອຄົນໃນຄອບຄົວ, ຄົນໃນກົມກອງ, ສັງຄົມໃຫ້ປອດໄພໄດ້ທັນເວລາ ໃນເວລາທີ່ມີການເກີດເຫດສຸກເສີນຕ່າງໆຂຶ້ນ ຊຶ່ງການຝຶກອົບຮົມປະກອບມີທັງໝົດ 15 ບົດຄື: ກາຍະວິພາກສາດ ແລະ ສາລິລະວິທະຍາ, ຫຼັກການປະຖົມພະຍາບານ, ພາວະໝົດສະຕິຂາດຄວາມຮູ້ສຶກ, ການແຄ້ນອາຫານ, ການຊ່ວຍຊີວິດຂັ້ນພື້ນຖານ, ເລືອດອອກ ແລະ ການຫ້າມເລືອດ, ກະດູກຫັກ ແລະ ຂໍ່ພິກ, ການເຄື່ອນຍ້າຍຄົນເຈັບ, ງູ ແລະ ໝາກັດ, ບາດແຜໄຟໄໝ້ ນໍ້າຮ້ອນລວກ, ບາດແຜ, ການຊັກ, ສານພິດ, ພະຍາດຫົວໃຈຂາດເລືອດກະທັນຫັນ, ການເປັນລົມ ພ້ອມດ້ວຍການສາທິດຕົວຈິງ ຂອງແຕ່ລະບົດຮຽນໄປພ້ອມ. ຫຼັງຈາກນັ້ນ; ກໍມີການປະເມີນຄວາມເຂົ້າໃຈຂອງນັກສໍາມະນາກອນ ພາຍຫຼັງທີ່ໄດ້ຮຽນມາ ແລະ ມີການສ້າງບັນຍາກາດຮ້ອງເພງ.
ຫຼັງຈາກນັ້ນ, ທ່ານຮອງຫົວໜ້າອົງການກາແດງແຂວງເຊກອງ ກໍໄດ້ມອບໃບຢັ້ງຢືນໃຫ້ນັກສໍາມະນາກອນທີ່ໄດ້ຝຶກອົບຮົມຄັ້ງນີ້, ພ້ອມທັງເນັ້ນໃຫ້ນັກສໍາມະນາກອນທຸກທ່ານ ໃຫ້ພ້ອມກັນນໍາເອົາບົດຮຽນ ແລະ ການປະຕິບັດສາທິດຕົວຈິງໃນການຝຶກ ໄປເຜີຍແຜ່ ແນະນໍາໃຫ້ຄອບຄົວ, ກົມກອງໄດ້ເຂົ້າໃຈ ສາມາດນໍາໄປຊ່ວຍເຫຼືອໂຕເອງ ແລະ ຄົນອື່ນໄດ້ ໃນເມື່ອເກີດເຫດສຸກເສີນຕ່າງໆ ໄດ້ທັນເວລາ ກ່ອນນໍາໄປສົ່ງສຸກສາລາ ແລະ ໂຮງໝໍ.
ຂ່າວ-ພາບ: ດາວສະຫວັນ
