ແຫລ່ງຂ່າວຈາກແຂວງສະຫວັນນະເຂດ ໃຫ້ຮູ້ວ່າ: ພະແນກຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ແຂວງສະຫວັນນະເຂດ ຮ່ວມກັບ ວິທະຍຸກະຈາຍສຽງແຫ່ງຊາດລາວ ແລະ ອົງການອຸຍນິເຊັບ ປະຈຳ ສປປ ລາວ ຈັດຝຶກອົບຮົມໃຫ້ສື່ວິທະຍຸໄວໜຸ່ມແຂວງສະຫວັນນະເຂດ ກ່ຽວກັບວຽກງານອາສາສະໝັກໂຄສະນາໄວໜຸ່ມ ໃນວັນທີ 12 ມິຖຸນາ 2023 ໂດຍການເຂົ້າຮ່ວມຂອງທ່ານ ໂພສີ ສ້ອຍ ກຸທິລາດ ຫົວໜ້າພະແນກ ຖວທ ແຂວງສະຫວັນນະເຂດ, ທ່ານ ຄໍາຜ່ອນ ໄຊອຸດົມ ຫົວໜ້າຝ່າຍລາຍການ ສະຖານີວິທະຍຸກະຈາຍສຽງແຫ່ງຊາດລາວ ທັງເປັນຫົວໜ້າໂຄງການວິທະຍຸໄວໜຸ່ມ, ທ່ານ ໄຊໂກສົນ ຊານຸບານ ຜູ້ຮັບຜິດຊອບວຽກງານໂຄສະນາສື່ມວນຊົນ ອົງການອຸຍນິເຊັບ ພ້ອມດ້ວຍບັນດານັກຈັດລາຍການວິທະຍຸໄວໜຸ່ມ ຂອງແຂວງສະຫວັນນະເຂດ ເຂົ້າຮ່ວມ.
ທ່ານ ໂພສີສ້ອຍ ກຸທິລາດ ໄດ້ກ່າວວ່າ: ໄລຍະຜ່ານມາ ເນື່ອງຈາກການແຜ່ລະບາດຂອງພະຍາດໂຄວິດ-19 ຈຶ່ງເຮັດໃຫ້ສະພາບການ ຂ່າວຕ່າງໆມີທັງສິ່ງດີ ແລະ ບໍ່ດີ, ສະນັ້ນ ເພື່ອເຮັດໃຫ້ໄປລວງດຽວກັນ ແລະ ຕອບໂຈດ ໃຫ້ແກ່ການປະຕິບັດແນວທາງນະໂຍບາຍຂອງພັກ ກໍຄືການປະຕິບັັດຕໍ່ລະບຽບກົດໝາຍບ້ານເມືອງ, ເພື່ອເຮັດໃຫ້ສື່ຂອງເຮົາອອກມາດີ ຮັບໃຊ້ການປະຕິບັດຕໍ່ແນວທາງແກ່ສັງຄົມ. ການຝຶກອົບຮົມຄັ້ງນີ້, ຈະດຳເນີນໄປເປັນເວລາ 2 ວັນ, ເຊິ່ງອາສາສະໝັກໄວໜຸ່ມຈະໄດ້ຮຽນຮູ້ ກ່ຽວກັບວຽກງານເປັນອາສາໂຄສະນາໄວໜຸ່ມ ໃນການຝຶກທັກສະໃຫ້ກັບໄວໜຸ່ມ ເພື່ອປະກອບສ່ວນໃນການໂຄສະນາວຽກງານຕ່າງໆ ໃຫ້ແກ່ກຸ່ມເປົ້າໝາຍກໍຄືກຸ່ມໄວໜຸ່ມ. ສະນັ້ນ, ອາສາສະໝັກໄວໜຸ່ມທີ່ເຂົ້າຮ່ວມ ຕ້ອງໄດ້ສັງເກດແຕ່ລະຈຸດ, ເອົາໃຈໃສ່ຂຽນຂ່າວ, ການໂຄສະນາອອກສື່ ໂດຍຜ່ານຈິດສໍານຶກ ແລະ ຜ່ານການປະຕິບັດການເຄື່ອນໄຫວຕົວຈິງ ເພື່ອເຮັດໃຫ້ຂໍ້ມູນຂ່າວສານອອກມາດີທີ່ສຸດ. ພ້ອມກັນນີ້, ອາສາສະໝັກໄວໜຸ່ມທີ່ເຂົ້າຝຶກອົບຮົມໃນຄັ້ງນີ້ ຕ້ອງເອົາໃຈໃສ່ສ້າງຕົນເອງໃຫ້ເປັນໜໍ່ແໜງ ເພື່ອໃຫ້ວຽກງານໂຄສະນາ ໄດ້ຕອບໂຈດແກ່ການຈັດຕັ້ງປະຕິບັດ ກາຍເປັນລວງດຽວກັນ, ເຊິ່ງເປົ້າໝາຍ ກໍເພື່ອຄັດເລືອກເອົາ ຜູ້ທີ່ມີຄວາມສາມາດ ເປັນໄວໝຸ່ມທີ່ດີເດັ່ນຂອງແຂວງ.
ໂອກາດນີ້, ທ່ານ ຄໍາຜ່ອນ ໄຊອຸດົມ ໄດ້ຍົກໃຫ້ເຫັນເຖິງຜົນງານ, ຄວາມສໍາຄັນ ແລະ ວຽກງານໃນຕໍ່ໜ້າຂອງສື່ໄວໜຸ່ມວ່າ: ການຝຶກອົບຮົມຄັ້ງນີ້ ແມ່ນຈະໄດ້ຝຶກ ແລະ ຄັດເລືອກເອົາອາສາສະໝັກໂຄສະນາໄວໜຸ່ມ ເພື່ອປະກອບສ່ວນເຂົ້າໃນການໂຄສະນາ ແລະ ປູກຈິດສໍານຶກ ໃຫ້ໄວໜຸ່ມໄດ້ມີສ່ວນຮ່ວມ ໃນການຮັກສາສິ່ງແວດລ້ອມ ແລະ ກິດຈະກໍາອື່ນໆ ທີ່ມີປະໂຫຍດໃຫ້ແກ່ຕົນເອງ ແລະ ສັງຄົມ.
