ຂປລ. ພະນັກງານ ອົງການໄອຍະການປະຊາຊົນສູງສຸດ ໄດ້ຮັບການຍົກລະດັບ ວຽກງານພິທີການ ແລະ ມາລະຍາດໃນສັງຄົມ ໃນວັນທີ 12 ມິຖຸນາ 2023 ໂດຍ ທ່ານ ແສງແກ້ວ ປວງປະດິດ ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈໍາ ສາທາລະນະລັດ ສິງກະໂປ ໄດ້ນຳສະເໜີເນື້ອໃນຫລາຍບັນຫາທີ່ສຳຄັນ ກ່ຽວກັບວຽກງານພິທີການ ແລະ ມາລະຍາດໃນສັງຄົມ ເພື່ອໃຫ້ຜູ້ເຂົ້າຮ່ວມ ນຳເອົາຄວາມຮູ້ດັ່ງກ່າວໄປໜູນໃຊ້ເຂົ້າໃນການປະຕິບັດວຽກງານ, ການສ້າງຄວາມຮັບຮູ້, ຄວາມເຂົ້າໃຈກ່ຽວກັບວຽກງານພິທີການ, ການຕ້ອນຮັບແຂກພາຍໃນ, ຕ່າງປະເທດ, ການຈັດກອງປະຊຸມພາຍໃນ, ກອງປະຊຸມສາກົນ, ມາລະຍາດທາງການທູດ ແລະ ມາລະຍາດໃນສັງຄົມ ກໍຄື ການຮ່ວມມືສາກົນ ແລະ ແຜນພັດທະນາວຽກງານໄອຍະການປະຊາຊົນ ຕາມແຜນງານໂຄງການ ແລະ ກິດຈະກຳ ທີ່ໄດ້ກຳນົດໄວ້ເປັນການເພີ້ມປະສິດທິພາບ ໃຫ້ແກ່ພະນັກງານໃນການປະຕິບັດພາລະບົດບາດ, ຂອບເຂດສິດ ແລະ ໜ້າທີ່ ຂອງອົງການໄອຍະການປະຊາຊົນ ໃຫ້ສູງຂຶ້ນໃນສັງຄົມ.
ໂອການີ້, ທ່ານ ນາງ ພອນເພັດ ອຸ່ນແກ້ວ ຫົວໜ້າຫ້ອງການ ອົງການໄອຍະການປະຊາຊົນສູງສຸດ ໄດ້ຕາງໜ້າໃຫ້ຄະນະພັກ-ຄະນະນໍາ ອົງການໄອຍະການປະຊາຊົນສູງສຸດ ສະແດງຄວາມຂອບໃຈເປັນຢ່າງສູງ ພ້ອມດ້ວຍມອບກະຕ່າດອກໄມ້ໃຫ້ ທ່ານ ແສງແກ້ວ ປວງປະດິດ ທີ່ໄດ້ນຳເອົາບົດຮຽນອັນລ້ຳຄ່າມາສິດສອນ ແລະ ຖ່າຍທອດບົດຮຽນໃຫ້ພະນັກງານອົງການປະຊາຊົນ ໄປນຳໃຊ້ເຂົ້າໃນການປະຕິບັດວຽກງານພິທີການໃຫ້ຖືກຕ້ອງ ແລະ ມີປະສິດທິຜົນ.
ຂ່າວ: ອານຸສັກ ກວາງວັນ
