ໃນລະຫວ່າງວັນທີ 8 ຫາ 9 ມິຖຸນາ ຜ່ານມາ, ທ່ານ ເລັດ ໄຊຍະພອນ ເຈົ້າແຂວງອັດຕະປື ພ້ອມດ້ວຍຄະນະນໍາຂອງແຂວງ ໄດ້ເດີນທາງຕາມການເຊີນຂອງແຂວງອານຮຸຍ ສປ ຈີນ, ເພື່ອເຂົ້າຮ່ວມພິທີລົງນາມສັນຍາ ວ່າດ້ວຍການສ້າງຕັ້ງສາຍພົວພັນມິດຕະພາບລະຫວ່າງ ແຂວງອັດຕະປື ແລະ ແຂວງອານຮຸຍ ພິທີເຊັນສັນຍາໄດ້ຈັດຂຶ້ນທີ່ໂຮງແຮມຄຣາວພາຊ່າ ທີ່ເມືອງຫວງຊານ ແຂວງອານຮຸຍ ສປ ຈີນ. ກ່ອນການລົງນາມໃນພິທີ ທ່ານ ຈັນທະວົງ ແສນອາມາດມົນຕີ ຮອງປະທານສູນກາງແນວລາວສ້າງຊາດ ປະທານຄະນະກຳມະການຮ່ວມມືສາກົນ ຕາງໜ້າໃຫ້ລັດຖະບານ ແຫ່ງ ສປປ ລາວ ແລະ ທ່ານ ຫວາງຊິງຊ໊ຽນ ເຈົ້າແຂວງອານຮຸຍ ສປ ຈີນ ໄດ້ຜັດປ່ຽນກັນລາຍງານສະພາບ ແລະ ຈຸດພິເສດຂອງບັນດາແຂວງ ແລະ ປະເທດ, ລວມທັງທົບທວນຄືນຜົນການຮ່ວມມືຜ່ານມາລະຫວ່າງລາວ-ຈີນ ຊຶ່ງຜ່ານມາທັງສອງປະເທດ ລາວ-ຈີນ ໄດ້ມີສາຍພົວພັນຮ່ວມກັນຢ່າງສະໜິດແໜ້ນ ແລະ ຊ່ວຍເຫຼືອຊຶ່ກັນ ແລະ ກັນ, ຜ່ານມາທັງສອງປະເທດ ໄດ້ພົວພັນຮ່ວມມືທາງດ້ານການຄ້າຮ່ວມກັນຕະຫຼອດມາ ແລະ ຈະພ້ອມກັນສືບຕໍ່ເສີມຂະຫຍາຍສາຍພົວພັນມິດຕະພາບຮ່ວມກັນຕະຫຼອດໄປ. ເພື່ອເສີມຂະຫຍາຍຄວາມເຂົ້າໃຈ ແລະ ມິດຕະພາບຊຶ່ງກັນ ແລະ ກັນ ໂດຍສະເພາະແຂວງອັດຕະປື ແລະ ແຂວງອານຮຸຍ ທັງສອງແຂວງ ໄດ້ຮ່ວມກັນລົງນາມໃນສັນຍາ ວ່າດ້ວຍການສ້າງຕັ້ງສາຍພົວພັນມິດຕະພາບ ໂດຍມີເນື້ອໃນສໍາຄັນຄື: ສອງແຂວງ ມີຄວາມເປັນເອກະພາບກັນໃນການຮ່ວມມືດ້ານເສດຖະກິດ, ການຄ້າ ແລະ ກະສິກຳ ການປູກພືດສະໝຸນໄພ, ຮ່ວມມືໃນຂົງເຂດວຽກງານການສຶກສາ, ວັດທະນະທໍາ, ການທ່ອງທ່ຽວ, ການແລກປ່ຽນດ້ານສິນລະປະວັນນະຄະດີ, ການຮ່ວມມືວຽກງານແຮ່ທາດ, ການອະນຸລັກນໍ້າ ແລະ ອື່ນໆ.
ໃນຄະນະດຽວກັນເພື່ອໃຫ້ບັນລຸຕາມຂໍ້ຕົກລົງຮ່ວມກັນທັງສອງແຂວງ ຕ້ອງໄດ້ເປັນເຈົ້າການໃນການຊຸກຍູ້ສົ່ງເສີມຮ່ວມກັນໃຫ້ມີການຂະຫຍາຍຕົວ ແລະ ໄດ້ຮັບຜົນສໍາເລັດສູງ, ຮ່ວມລົງນາມບົດບັນທຶກຄັ້ງນີ້ ຝ່າຍແຂວງອັດຕະປື ໂດຍແມ່ນ ທ່ານ ເລັດ ໄຊຍະພອນ ເຈົ້າແຂວງອັດຕະປື ແລະ ຝ່າຍແຂວງອານຮຸຍໂດຍແມ່ນ ທ່ານ ຫວາງຊິງຊ໊ຽນ ເຈົ້າແຂວງອານຮຸຍ ໂດຍຊ້ອງໜ້າ ແລະ ເປັນສັກຂີພິຍານຂອງທ່ານ ຈັນທະວົງ ແສນອາມາດມົນຕີ ພ້ອມດ້ວຍຄະນະຜູ້ແທນທັງສອງແຂວງ ເຂົ້າຮ່ວມເປັນສັກຂີພິຍານ. ໃນວັນດຽວກັນນີ້, ທ່ານ ເລັດ ໄຊຍະພອນ ພ້ອມດ້ວຍຄະນະຂອງແຂວງ ກໍໄດ້ຖືກຮັບເຊີນເຂົ້າຮ່ວມກອງປະຊຸມການພົວພັນຮ່ວມມືເສດຖະກິດຮອບດ້ານ ແລະ ພາກພື້ນ ຫຼື ອາເຊັບ ທີ່ເມືອງຫວງຊານແຂວງອານຮຸຍ ສປ ຈີນ ຊຶ່ງມີຕາງໜ້າລັດຖະບານຂອງ 15 ປະເທດເຂົ້າຮ່ວມ. ຂ່າວ-ພາບ: ອູ່ທອງ
