ປັດຈຸບັນ ການປ້ອງກັນ ແລະ ຄວບຄຸມພະຍາດໄຂ້ຍຸງລາຍເປັນບັນຫາສໍາຄັນຫຼາຍ ໂດຍສະເພາະໃນລະດູຝົນຂອງທຸກໆປີ ຄື: ລະຫວ່າງເດືອນມິຖຸນາ ຫາ ເດືອນກັນຍາ ຊຶ່ງເປັນໄລຍະທີ່ມີການລະບາດຂອງພະຍາດໄຂ້ຍຸງລາຍຫຼາຍກວ່າເດືອນອື່ນໆ. ສະນັ້ນ ເພື່ອບໍ່ໃຫ້ເປັນພະຍາດໄຂ້ຍຸງລາຍ ທຸກຄົນໃນສັງຄົມຈົ່ງພ້ອມກັນເປັນເຈົ້າການປ້ອງກັນ ແລະ ຄວບຄຸມພະຍາດດັ່ງກ່າວ ດ້ວຍວິທີການຕ່າງໆ.
ຂໍ້ມູນຈາກ ສູນຂ່າວສານການແພດສຸຂະສຶກສາ ກະຊວງສາທາລະນະສຸກ ໃຫ້ຮູ້ວ່າ: ພະຍາດໄຂ້ຍຸງລາຍເປັນສາເຫດໜຶ່ງຂອງການເຂົ້າໂຮງໝໍ ແລະ ການເສຍຊີວິດຂອງເດັກນ້ອຍອາຊີ ແລະ ອາເມຣິກາລາຕິນ ຊຶ່ງວິທີການ ໂວບັກເຄຍ (Wolbachia method) ຂອງໂຄງການຄວບຄຸມປະຊາກອນຍຸງໂລກ (WMP) ຈະຊ່ວຍຫຼຸດຜ່ອນຄວາມສ່ຽງນີ້ ແລະ ປັດຈຸບັນ ຍັງມີທີມງານຄວບຄຸມພະຫະນໍາເຊື້ອພະຍາດໄຂ້ຍຸງລາຍ ໃນຫຼາຍພາກສ່ວນກ່ຽວຂ້ອງ ພ້ອມດ້ວຍປະຊາຊົນໃນຂອບເຂດທົ່ວປະເທດໄດ້ພ້ອມກັນເອົາໃຈໃສ່ ສ້າງຂະບວນການກວດ ແລະ ທໍາລາຍໜອນນໍ້າຍຸງລາຍໃນແຕ່ລະຫຼັງຄາເຮືອນເພື່ອຕ້ານ ແລະ ຄວບຄຸມການລະບາດຂອງພະຍາດໄຂ້ຍຸງລາຍ ຊຶ່ງຕົ້ນຕໍແມ່ນໜອນນໍ້າຍຸງລາຍທີ່ວາງໄຂ່ໃນພາຊະນະບັນຈຸນໍ້າໃນເຮືອນເຊັ່ນ: ກະໂປະ, ກະປ໋ອງ, ຂວດນໍ້າ, ອ່າງ ຫຼື ໂອ່ງເກັບນໍ້າ. ສະນັ້ນ ພາຊະນະບັນຈຸນໍ້າທີ່ບໍ່ແມ່ນນໍ້າໃຊ້ຕ້ອງໄດ້ຂ້ວມ ຫຼື ທຳລາຍຖິ້ມບໍ່ໃຫ້ມີນໍ້າຂັງ, ສ່ວນນໍ້າໃນໂອ່ງເກັບນໍ້າດື່ມ, ນໍ້າໃຊ້ຕ້ອງໃສ່ຊາຍອາເບດ ເພື່ອບໍ່ໃຫ້ຍຸງສາມາດວາງໄຂ່ໄດ້. ພ້ອມດຽວກັນນັ້ນ ເຈົ້າຂອງເຮືອນຕ້ອງໄດ້ເປັນເຈົ້າການໃນການກວດກາຕາມເຮືອນໂຕເອງທຸກໆມື້ ແລະ ເປັນປະຈໍາຢູ່ສະເໝີເພື່ອຄວາມເປັນລະບຽບ ແລະ ສະອາດງາມຕາ, ຖ້າປະຕິບັດເຮົາກໍສາມາດກັນ ແລະ ຄວບຄຸມພະຍາດໄຂ້ຍຸງລາຍບໍ່ໃຫ້ເກີດການລະບາດໄດ້. ພ້ອມນັ້ນ ຕ້ອງເປັນເຈົ້າການປະຕິບັດມາດຕະການປ້ອງກັນພະຍາດໄຂ້ຍຸງລາຍ ທີ່ກະຊວງສາທາລະນະສຸກວາງອອກຢ່າງເຂັ້ມງວດ ໂດຍສະເພາະປະຕິບັດຫຼັກການ 5 ປ ໃຫ້ເປັນປະຈຳ ແລະ ເປັນປົກກະຕິ, ເຊື່ອແນ່ວ່າພະຍາດໄຂ້ຍຸງລາຍຈະບໍ່ເກີດຂຶ້ນກັບຕົວທ່ານ, ຄອບຄົວ ແລະ ຄົນທີ່ທ່ານຮັກ ແລະ ຄອບຄົວຂອງທ່ານຍັງຈະມີສຸຂະພາບທີ່ດີ ແລະ ແຂງແຮງ.
ມາຮອດວັນທີ 8 ມິຖຸນາ 2023 ທົ່ວປະເທດມີຜູ້ຕິດເຊື້ອພະຍາດໄຂ້ຍຸງລາຍສະສົມ 3.848 ຄົນ, ຕິດເຊື້ອໃໝ່ 126 ຄົນ, ແຂວງທີ່ຕິດເຊື້ອພະຍາດໄຂ້ຍຸງຫຼາຍກວ່າໝູ່ແມ່ນແຂວງອຸດົມໄຊ 779 ຄົນ, ແຂວງຄໍາມ່ວນ 607 ຄົນ, ນະຄອນຫຼວງວຽງຈັນ 356 ຄົນ ແລະ ແຂວງອື່ນໆຕາມລໍາດັບ.
ແນວໃດກໍຕາມ ນອກຈາກມີສະຕິໃນການປ້ອງກັນຄວບຄຸມພະຍາດດັ່ງກ່າວແລ້ວ, ທຸກຄົນຍັງຕ້ອງເຝົ້າລະວັງ ພະຍາດຕາມລະດູການຄື: ພະຍາດໄຂ້ຫວັດໃຫຍ່ ແລະ ພະຍາດອື່ນໆ. ດັ່ງນັ້ນ, ຖ້າທ່ານຮູ້ສຶກບໍ່ສະບາຍ, ເປັນໄຂ້ ບໍ່ຄວນໄປຊື້ຢາມາກິນເອງ, ຄວນຮີບຮ້ອນໄປພົບແພດໝໍໂດຍໄວຢູ່ສະຖານທີ່ໃຫ້ບໍລິການຕ່າງໆໃກ້ບ້ານທ່ານຄື: ໂຮງໝໍເມືອງ, ໂຮງໝໍແຂວງ, ໂຮງໝໍສູນກາງ, ສຸກສາ ລາ ແລະ ສະຖານທີ່ໃຫ້ບໍລິການອື່ນໆ ເພື່ອຈະໄດ້ກິນຢາຕາມແພດໝໍສັ່ງ ແລະ ປິ່ນປົວໃຫ້ທັນເວລາ.
ໂດຍ: ວັນເພັງ
