ທ່ານ ໄຊຊະນະ ໂຄດພູທອນ ກໍາມະການສູນກາງພັກ ຫົວໜ້າອົງການໄອຍະການປະຊາຊົນສູງສຸດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມພົບປະ ຂອງ ທ່ານ ໂອສະກາ ມານູແອນ ຊິນເວຮາ ມຣາຕີເນັດ ລັດຖະມົນຕີກະຊວງຍຸຕິທຳ ສາທາລະນະລັດ ກູບາ, ສະມາຊິກພັກກອມມູນິດກູບາ, ສະມາຊິກຄະນະລັດຖະມົນຕີ, ສະມາຊິກສະພາປະຊາຊົນແຫ່ງຊາດຂອງ ສາທາລະນະລັດ ກູບາ ໃນວັນທີ 12 ມິຖຸນາ ນີ້ ທີ່ອົງການໄອຍະການປະຊາຊົນສູງສຸດ (ອອປສ) ເນື່ອງໃນໂອກາດເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ.
ໃນໂອກາດທີ່ມີຄວາມໝາຍສຳຄັນນີ້ ທ່ານຫົວໜ້າອົງການໄອຍະການປະຊາຊົນສູງສຸດ ໄດ້ສະແດງຄວາມຕ້ອນຮັບອັນອົບອຸ່ນ ແລະ ຕີລາຄາສູງຕໍ່ການມາຢ້ຽມຢາມ ແລະ ເຮັດວຽກຂອງຄະນະຜູ້ແທນກະຊວງຍຸຕິທຳ ແຫ່ງ ສ ກູບາ ໃນຄັ້ງນີ້ ຊຶ່ງຖືເປັນການປະກອບສ່ວນອັນສໍາຄັນເຂົ້າໃນການເສີມຂະຫຍາຍ ແລະ ເພີ່ມພູນຄູນສ້າງສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ສປປ ລາວ ແລະ ສ ກູບາ ໃຫ້ນັບມື້ຂະຫຍາຍຕົວ ແລະ ເກີດດອກອອກຜົນ.
ພ້ອມນີ້, ສອງຝ່າຍ ຍັງໄດ້ແລກປ່ຽນຄໍາຄິດຄຳເຫັນຕໍ່ການຊຸກຍູ້ ແລະ ສົ່ງເສີມໃຫ້ສອງປະເທດສືບຕໍ່ປະສານງານ, ແລກປ່ຽນຂໍ້ມູນຂ່າວສານ, ສະໜັບສະໜູນຊ່ວຍເຫຼືອຊຶ່ງກັນ ແລະ ກັນ ໃນຂົງເຂດວຽກງານທາງດ້ານກົດໝາຍ ເພື່ອສ້າງຄວາມເຂັ້ມແຂງໃຫ້ແກ່ ສປປ ລາວ ເວົ້າລວມ, ເວົ້າສະເພາະ ອົງການໄອຍະການປະຊາຊົນສູງສຸດ ໃຫ້ນັບມື້ນັບມີການຂະຫຍາຍຕົວຂຶ້ນເປັນກ້າວໆ.
ຂ່າວ-ພາບ: ຈະເລີນສິນ
