ຕາມຂ່າວຈາກວິທະຍຸສາກົນຫວຽດນາມ ກອງປະຊຸມລັດຖະມົນຕີກະຊວງພາຍໃນ 27 ປະເທດ ສະມາຊິກສະຫະພາບ ເອີຣົບ (ອີຢູ) ຈັດຂຶ້ນຢູ່ນະຄອນຫລວງບຣຸກແຊນ ຂອງແບນຊິກ ເມື່ອບໍ່ດົນມານີ້ໄດ້ບັນລຸຂໍ້ຕົກລົງອະນຸຍາດໃຫ້ບັນດາປະເທດ ສະມາຊິກແບ່ງປັນການຮັບຈຳນວນຜູ້ຂໍລີ້ໄພ ຫລື ປະກອບສ່ວນໃຫ້ກອງທຶນ ລວມໂດຍອີຢູ ຄຸ້ມຄອງເພື່ອເບິ່ງແຍງດູແລຜູ້ລີ້ໄພ. ຈາກນັ້ນ ທ່ານ ນາງ ມາເຣຍ ສະເຕເນີກາດ (Maria Stenergard) ລັດຖະມົນຕີກະຊວງພາຍໃນຊູແອັດ, ປະທານຈັດບັນດາການເຈລະຈາ ໃຫ້ຮູ້ວ່າ: ຕາມຂໍ້ຕົກລົງແລ້ວບັນດາປະເທດບໍ່ຮັບຜູ້ຂໍລີ້ໄພ ຈະປະກອບຈຳນວນເງິນຂຶ້ນເຖິງ 20.000 ເອີໂລ/ຄົນ ໃສ່ກອງທຶນ ໂດຍອີຢູຄຸ້ມຄອງເພື່ອໜູນຊ່ວຍຜູ້ລີ້ໄພ. ບັນຫາຜູ້ລີ້ໄພທີ່ຖືກປະຕິເສດຈະໄດ້ສົ່ງໄປຍັງເປັນຂໍ້ຕິດຄັດໃຫຍ່ສຸດໃນບັນດາການເຈລະຈາ. ປະຈຸບັນຍັງບໍ່ທັນມີຂໍ້ຕົກລົງລະອຽດ ແລະ ບັນຫານີ້ຕ້ອງໄດ້ພິຈາລະນາຕື່ມອີກ.
(ບັນນາທິການຂ່າວ: ຕ່າງປະເທດ)
ຮຽບຮຽງ ຂ່າວໂດຍ: ສະໄຫວ ລາດປາກດີ
