ຄວາມຄືບໜ້າຂອງການຄອບຄອງສະໂມສອນ ມີການຫຍັບຈາກຝ່າຍ ທ່ານ ຊິກ ຢາສຊິມ ບິນຮາໝັດ ອັລ-ທານີ ອອກມາດັ່ງນີ້ ລາຍງານວ່າ ມີການຍື່ນຂໍ້ສະເໜີຫຼ້າສຸດຈາກທ່ານ ຊິກ ຢາສຊິມ ໃນຕົ້ນອາທິດນີ້ ເຂົ້າໃຈວ່າມີມູນຄ່າ 5,2 ຕື້ປອນ + ເງິນລົງທຶນສະໂມສອນອີກ 800 ລ້ານປອນ ໂດຍມີເສັ້ນຕາຍໃນວັນສຸກນີ້ ທີ່ທີມງານຂອງທ່ານ ຊິກ ໄດ້ແຈ້ງກັບ ເຣນ ກຣຸບ ວ່າ ຕົວຂໍ້ສະເໜີຈະຍັງຄົງຢູ່ ແຕ່ຫຼັງ ຈາກວັນສຸກຈະບໍ່ມີການຕໍ່ລອງເພີ່ມອີກຕໍ່ໄປ.
ໂດຍຂໍ້ສະເໜີນີ້ ທາງຝ່າຍຂອງ Nine Two Foundation ຊີ້ໃຫ້ເຫັນວ່າ ມັນເປັນຂໍ້ສະເໜີກ້ອນໃຫຍ່ທີ່ເປັນທີ່ນິຍົມທີ່ສຸດແລ້ວ ຖ້າປຽບທຽບກັບລາຄາຮຸ້ນໃນປັດຈຸບັນ ເຊິ່ງຫາກການຂາຍໃຫ້ທ່ານ ຊິກ ເກີດຂື້ນ ແມນຢູ ກໍຈະແກ້ໄຂໜີ້ສິນທັນທີ ມີເງິນທຶນຊື້ຂາຍນັກເຕະ ປັບປຸງພື້ນຖານໂຄງລ່າງ ແລະ ການລົງທຶນຕ່າງໆທີ່ຈໍາເປັນ.
ສາເຫດທີ່ມີການເລັ່ງຍູ້ດັນຂໍ້ສະເໜີນີ້ ເຖິງແມ່ນເບິ່ງຄືວ່າຈະຍັງຕໍ່າກວ່າສິ່ງທີ່ຕະກູນເກລເຊີຕ້ອງການໃນລາຄາ 6 ຕື້ປອນ (ບໍ່ລວມເງິນລົງທຶນ) ທາງຝ່າຍຂອງທ່ານ ຊິກ ມີຄວາມກັງວົນເລື່ອງຂອງການເປີດຕະຫຼາດຊື້ຂາຍນັກເຕະໃນຄັ້ງນີ້ ທີ່ເປັນປັດໄຈສໍາຄັນຂອງການຍື່ນຂໍ້ສະເໜີ ຖ້າເຂົາເຂົ້າມາຊ້າໄປ ແລະ ລ່ວງເລີຍໄປເຖິງກາງຕະຫຼາດລະດູ ຮ້ອນນີ້ ອາດຈະສົ່ງຜົນເສຍ ດັ່ງນັ້ນ ເຂົາຈຶ່ງຕ້ອງກົດດັນຂໍ້ຕົກລົງນີ້ໃຫ້ຮຽບຮ້ອຍ ຫຼືຖ້າບໍ່ໄດ້ ກໍຈະຖອນຕົວອອກ ຈາກຂໍ້ຕົກລົງໄປທັນທີ.
ເພາະຕ້ອງການທີ່ຢາກຊ່ວຍ ເອຣິກ ເທນ ຮາກ ໃນການເສີມສ້າງທີມໃຫ້ຮຽບຮ້ອຍ ທ່ານ ຊິກ ຈຶ່ງພະຍາຍາມທີ່ຈະເຮັດໃຫ້ສໍາເລັດຂໍ້ຕົກລົງຢ່າງໄວວາ ເພື່ອຈະຈັດຫາເງິນທຶນໃຫ້ກັບຜູ້ຈັດການທີມໃນຕະຫຼາດນັກເຕະທີ່ຈະເປີດໃນວັນ ທີ 14 ມິຖຸນານີ້.
