ຂ່າວຕ່າງປະເທດລາຍງານ ເມື່ອທ້າຍອາທິດຜ່ານມາ, Nationwide Building Society ຊຶ່ງເປັນສະຖາບັນການເງິນທີ່ໃຫ້ບໍລິການສິນເຊື່ອບ່ອນຢູ່ອາໄສ ຂອງອັງກິດໄດ້ເປີດເຜີຍບົດລາຍງານໂດຍລະບຸວ່າ ລາຄາອະສັງຫາລິມມະຊັບໃນອັງກິດຫຼຸດລົງສະເລ່ຍ 3,4% ໃນເດືອນພຶດສະພາ ຊຶ່ງເປັນການຫຼຸດລົງຫຼາຍທີ່ສຸດນັບຕັ້ງແຕ່ປີ 2009.
ບົດລາຍງານລະບຸວ່າ: ລາຄາອະສັງຫາລິມມະຊັບໃນເດືອນພຶດສະພາຜ່ານມາ ສະເລ່ຍຢູ່ທີ່ 260.736 ປອນ (ສະກຸນເງິນອັງກິດ) ຊຶ່ງຫຼຸດລົງ 0,1% ຈາກເດືອນເມສາ ແລະ ຍັງຄົງຕໍ່າກວ່າຈຸດສູງສຸດໃນເດືອນສິງຫາ 2022 ປະມານ 4%. ທ່ານ ກາເບຣຍລາ ດິກເກນ ນັກເສດຖະສາດອາວຸໂສປະຈຳ Pantheon Macroeconomics ບໍລິສັດທີ່ປຶກສາການວິໄຈທາງດ້ານເສດຖະກິດກ່າວວ່າ: ການຫຼຸດລົງນີ້ຊີ້ໃຫ້ເຫັນວ່າ ຜູ້ຊື້ຍັງຄົງລະມັດລະວັງການໃຊ້ຈ່າຍ ແລະ ຕະຫຼາດອາດຈະເຫັນວ່າ ອັດຕາດອກເບ້ຍສິນເຊື່ອບ່ອນຢູ່ອາໄສຈະປັບຂຶ້ນໃນໄລຍະບໍ່ເທົ່າໃດເດືອນຂ້າງໜ້າ ເມື່ອເບິ່ງຈາກຂໍ້ມູນເງິນເຟີ້ໃນເດືອນເມສາຜ່ານມາ. ອີກຢ່າງໜຶ່ງ, ດັດຊະນີລາຄາຜູ້ບໍລິໂພກພື້ນຖານ (CPI) ຂອງອັງກິດໄລຍະ 12 ເດືອນ ເມື່ອນັບເຖິງເດືອນເມສາ ເພີ່ມຂຶ້ນ 8,7% ຊຶ່ງສູງເກີນລາຄາການຄາດຄະເນສ່ວນໃຫຍ່ ລວມເຖິງການຄາດຄະເນຂອງທະນາຄານແຫ່ງປະເທດອັງກິດ (BOE).
ທ່ານ ກາເບຣຍລາ ດິກເກນ ລະບຸວ່າ: BOE ປັບຂຶ້ນອັດຕາດອກເບ້ຍມາດຕະຖານເປັນ 4,5% ຊຶ່ງເປັນລະດັບສູງທີ່ສຸດນັບຕັ້ງແຕ່ປີ 2008 ເພື່ອຕໍ່ສູ້ກັບພາວະເງິນເຟີ້ທີ່ເພີ່ມສູງຂຶ້ນ ເຮັດໃຫ້ປັດຈຸບັນຄົວເຮືອນທົ່ວໄປໃນອັງກິດຕ້ອງໝົດເງິນລາຍໄດ້ໄປຊຳລະສິນເຊື່ອບ່ອນຢູ່ອາໄສເຖິງ 28% ຊຶ່ງເພີ່ມຂຶ້ນຈາກ 22% ຂອງສອງປີຜ່ານມາ.
