ກອງປະຊຸມສະຫຼຸບຖອດຖອນບົດຮຽນວຽກງານກຳມະບານຮອບດ້ານ 4 ແຂວງພາກເໜືອຄື: ແຂວງອຸດົມໄຊ, ຜົ້ງສາລີ, ຫຼວງນໍ້າທາ ແລະ ແຂວງບໍ່ແກ້ວ ໄດ້ຈັດຂຶ້ນໃນວັນທີ 8 ມິຖຸນາ ນີ້ ທີ່ຫ້ອງປະຊຸມອົງການຈັດຕັ້ງມະຫາຊົນແຂວງອຸດົມໄຊ, ໂດຍການເປັນປະທານຂອງທ່ານ ນາງ ທຸມມາ ປັນຍາສິດ ຄະນະບໍລິຫານງານສະຫະພັນກຳມະບານແຂວງອຸດົມໄຊ, ມີບັນດາຄະນະບໍລິຫານງານສະຫະພັນກຳມະບານ ແຂວງຜົ້ງສາລີ, ຫຼວງນ້ຳທາ, ແຂວງບໍ່ແກ້ວ ເຂົ້າຮ່ວມ.
ຈຸດປະສົງຂອງກອງປະຊຸມຄັ້ງນີ້, ເພື່ອເປັນການສະຫຼຸບວຽກງານການຮ່ວມມືລະຫວ່າງສະຫະພັນກຳມະບານ 4 ແຂວງພາກເໜືອ ໃນໄລຍະ 1 ປີຜ່ານມາ ແບບຮອບດ້ານ, ໂດຍສະເພາະແມ່ນໄດ້ແລກປ່ຽນບົດຮຽນ ການເຄື່ອນໄຫວວຽກງານກຳມະບານຂອງແຕ່ລະຂະແໜງການເຊັ່ນ: ວຽກງານຫ້ອງການ, ວຽກງານກອງທຶນຊ່ວຍເຫຼືອຊຶ່ງກັນ ແລະ ກັນ, ພົວພັນຕ່າງປະເທດ, ວຽກງານຈັດຕັ້ງກວດກາ ແລະ ຂະບວນການແຂ່ງຂັນຍ້ອງຍໍ, ວຽກງານປົກປ້ອງແຮງງານ ແລະ ວຽກງານອື່ນໆ ທີ່ກ່ຽວຂ້ອງ. ໃນກອງປະຊຸມຜູ້ເຂົ້າຮ່ວມຍັງໄດ້ປະກອບຄວາມຄິດເຫັນເຂົ້າໃນແຕ່ລະຂົງເຂດວຽກງານ ເພື່ອແລກປ່ຽນບົດຮຽນຊຶ່ງກັນ ແລະ ກັນຕື່ມອີກ.
ສຳລັບວຽກງານກຳມະບານແຂວງອຸດົມໄຊ ໃນໄລຍະ 1 ປີ ຜ່ານມາ ໃນແຕ່ລະວຽກງານ ແມ່ນສາມາດປະຕິບັດໄດ້ຕາມແຜນການທີ່ກຳນົດໄວ້ ແລະ ມີຫຼາຍຢ່າງທີ່ພົ້ນເດັ່ນ ໂດຍສະເພາະແມ່ນວຽກງານປົກປ້ອງແຮງງານ ແມ່ນໄດ້ເອົາໃຈໃສ່ປົກປ້ອງສິດ ແລະ ຜົນປະໂຫຍດອັນຊອບທຳໃຫ້ແກ່ພະນັກງານ ແລະ ສະມາຊິກກຳມະບານ, ກຳມະກອນຊາວຜູ້ອອກແຮງງານບັນດາເຜົ່າ, ວຽກງານກອງທຶນຊ່ວຍເຫຼືອຊຶ່ງກັນ ແລະ ກັນ ຊຶ່ງທົ່ວແຂວງມີສະມາຊິກກອງທຶນທັງໝົດ 7.860 ສະຫາຍ ຍິງ 3.095 ສະຫາຍ ມີເງິນກອງທຶນທັງໝົດ 800 ລ້ານກ່ວາກີບ.
(ຂ່າວ-ພາບ: ແສງອາທິດ)
