ແອວນີໂຢ ສົ່ງຜົນໃຫ້ອົສຕຣາລີປັບຫຼຸດການຄາດຄະເນຜົນຜະລິດການກະເສດ

————————

ຂ່າວຕ່າງປະເທດລາຍງານ ເມື່ອວັນທີ 6 ມິຖຸນາ ຜ່ານມາ, ກະຊວງກະສິກຳ ການປະມົງ ແລະ ປ່າໄມ້ ຂອງອົສຕຣາລີ ໄດ້ເປີດເຜີຍບົດລາຍງານໂດຍຄາດຄະເນວ່າ ການຜະລິດທາງການກະເສດໃນໄລຍະລະດູໜາວຂອງອົສຕຣາລີມີທ່າອ່ຽງຫຼຸດລົງຈາກລະດັບສູງສຸດທີ່ເຄີຍເຮັດໄວ້ກ່ອນໜ້ານີ້ ຫຼັງຈາກສຳນັກງານພະຍາກອນຄາດວ່າ ສະພາບອາກາດຈະແຫ້ງແລ້ງຫຼາຍຂຶ້ນ ຫຼັງຈາກອົສຕຣາລີເຄີຍມີຝົນຕົກລົງມາໃນປະລິມານສູງສຸດຕິດຕໍ່ກັນ 3 ປີ ອັນເນື່ອງມາຈາກປະກົດການລານີຢາ (La Nina) ທີ່ເກີດຂຶ້ນຕິດຕໍ່ກັນທຸກປີ.

ທັງນີ້, ກະຊວງກະສິກຳ ການປະມົງ ແລະ ປ່າໄມ້ ຂອງອົສຕຣາລີ ໄດ້ປັບຫຼຸດການຄາດຄະເນຜົນຜະລິດທາງການກະເສດໃນໄລຍະລະດູໜາວລົງ 34% ສູ່ລະດັບ 44,9 ລ້ານໂຕນ ໃນສົກປີການກະເສດ 2023-2024 ຊຶ່ງຕ່ຳກວ່າຄ່າສະເລ່ຍໃນຮອບ 10 ປີ ໃນລະດັບ 46,4 ລ້ານໂຕນໃນສົກປີ 2022-2023 ປະມານ 3%. ການຜະລິດເຂົ້າສາລີມີທ່າອ່ຽງຫຼຸດລົງ 34% ສູ່ລະດັບ 26,2 ລ້ານໂຕນ ແລະ ເຂົ້າບາເລ ມີທ່າອ່ຽງຫຼຸດລົງ 30% ສູ່ລະດັບ 9,9 ລ້ານໂຕນ ໂດຍໂຕເລກດັ່ງກ່າວຕໍ່າກວ່າລະດັບສະເລ່ຍໃນຮອບ 10 ປີ ຂະນະດຽວກັນ ໄດ້ຄາດຄະເນວ່າ ການຜະລິດຄາໂນລາ (Canola) ຈະຫຼຸດລົງ 41% ສູ່ລະດັບ 4,9 ລ້ານໂຕນ ແຕ່ຍັງສູງກວ່າຄ່າສະເລ່ຍໃນຮອບ 10 ປີ ປະມານ 15%. ບົດລາຍງານຂອງກະຊວງກະສິກຳ ການປະມົງ ແລະ ປ່າໄມ້ ຂອງອົສຕຣາລີລະບຸວ່າ: ຜົນຜະລິດທາງການກະເສດຂອງອົສຕຣາລີ ມີທ່າອ່ຽງຫຼຸດລົງ ເນື່ອງຈາກມີໂອກາດສູງຫຼາຍທີ່ປະລິມານນ້ຳຝົນໃນພື້ນທີ່ໆປູກພືດຈະຕ່ຳກວ່າຄ່າສະເລ່ຍໃນໄລຍະເດືອນມິຖຸນາ – ສິງຫາ ປີນີ້ ແລະ ມີຄວາມເປັນໄປໄດ້ທີ່ຈະເກີດປາກົດການແອວນີໂຢ (El Nino) ຊຶ່ງຈະສົ່ງຜົນໃຫ້ສະພາບອາກາດແຫ້ງແລ້ງຫຼາຍຂຶ້ນ. ປາກົດການ El Nino ເກີດຈາກກະແສລົມທີ່ມີກຳລັງອ່ອນ ແລະ ປ່ຽນທິດທາງພັດຈາກຝັ່ງຕາເວັນອອກຂອງມະຫາສະ ໝຸດປາຊີຟິກໄປຍັງຝັ່ງຕາເວັນຕົກຂອງມະຫາສະໝຸດ ເຮັດໃຫ້ກະແສນ້ຳອຸ່ນໄຫຼໄປຍັງທະວີບອາເມຣິກາໃຕ້ແທນ ດ້ວຍເຫດຜົນນີ້ພາກພື້ນອາຊີຕາເວັນອອກສ່ຽງໃຕ້ ແລະ ອົສຕຣາລີ ຈຶ່ງຂາດແຄນຝົນ ແລະ ເກີດຄວາມແຫ້ງແລ້ງ ແຕ່ທາງຝັ່ງຂອງທະວີບອາເມຣິກາໃຕ້ກັບມີຝົນຕົກເພີ່ມຫຼາຍຂຶ້ນ. ສ່ວນປະກົດການ La Nina ເກີດຈາກກະແສລົມພັດຈາກຝັ່ງຕາເວັນອອກຂອງມະຫາສະໝຸດປາຊີຟິກມາຍັງຝັ່ງຕາເວັນຕົກຂອງມະຫາສະໝຸດ ແຕ່ກະແສລົມມີຄວາມຮຸນແຮງຫຼາຍກວ່າປົກກະຕິ ເຮັດໃຫ້ກະແສນ້ຳອຸ່ນໄຫຼມາພາກອາຊີຕາເວັນອອກສ່ຽງໃຕ້ຫຼາຍຂຶ້ນ ສົ່ງຜົນໃຫ້ພາກພື້ນອາຊີຕາເວັນອອກສ່ຽງໃຕ້ ແລະ ອົສຕຣາລີ ມີລະດັບນ້ຳທະເລສູງຂຶ້ນ ແລະ ຝົນຕົກໜັກຫຼາຍກວ່າປົກກະຕິ ໃນທາງກົງກັນຂ້າມກໍເກີດພາວະຄວາມແຫ້ງແລ້ງຕາມແຄມຝັ່ງທະວີບອາເມຣິກາໃຕ້.

ຜ່ານມາ, ສະພາບອາກາດແປປ່ວນເກີດຈາກປະກົດການ El Nino ໄດ້ສ້າງຄວາມເສຍຫາຍຮຸນແຮງໃຫ້ກັບກຸ່ມຜູ້ຜະລິດອາຫານທົ່ວພາກພື້ນອາຊີ ໂດຍສະເພາະຢ່າງຍິ່ງຜູ້ຜະລິດເຂົ້າສາລີ, ນ້ຳມັນປາມ ແລະ ເຂົ້າໃນອົສຕຣາລີ ແລະ ອີກຫຼາຍປະເທດໃນອາຊີຕາເວັນອອກສ່ຽງໃຕ້. ອົສຕຣາລີ ໄດ້ສະແດງຄວາມກັງວົນວ່າ ຜົນຜະລິດທີ່ຫຼຸດລົງຈະຖ່ວງດຶງມູນຄ່າທັງໝົດຂອງການຜະລິດທາງການກະເສດໃຫ້ຫຼຸດລົງ ແລະ ຄາດວ່າ ການສົ່ງອອກສິນຄ້າການກະເສດຂອງອົສຕຣາລີຈະຫຼຸດລົງດ້ວຍ.