ຫໍພິພິທະພັນ ໄກສອນ ພົມວິຫານ ໄດ້ຈັດພິທີມອບຫຼຽນໄຊມິດຕະພາບ ຈາກລັດຖະບານ ແຫ່ງ ສສ ຫວຽດນາມ ມອບໃຫ້ແກ່ກົມພິພິທະພັນໄກສອນ ພົມວິຫານ ແລະ ອະນຸສອນສະຖານຜູ້ນໍາປະຕິວັດ ທີ່ມີຜົນງານດີເດັ່ນໃນການເຄື່ອນໄຫວປະກອບສ່ວນຢ່າງຕັ້ງໜ້າ ກ່ຽວກັບສິ່ງທີ່ເປັນອະນຸສອນສະຖານໃຫ້ແກ່ປະທານ ໂຮ່ຈິມິນ, ວິລະຊົນປົດປ່ອຍຊາດຫວຽດນາມ, ນັກວັດທະນະທໍາທີ່ດີເດັ່ນ ຂອງຫວຽດນາມ ແລະ ຂອງໂລກ ໃນວັນທີ 7 ມິຖຸນາ ນີ້ ທີ່ຫໍພິພິທະພັນໄກສອນ ພົມວິຫານ.
ໃຫ້ກຽດເຂົ້າຮ່ວມໃນພິທີ ໂດຍທ່ານ ຄໍາຜາ ພິມມະສອນ ຮອງຫົວໜ້າຫ້ອງວ່າການສູນກາງພັກ, ທ່ານ ຫງວຽນບ໋າ ຮຸ່ງ ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສສ ຫວຽດນາມ ປະຈໍາລາວ, ທ່ານ ໄຊຍະລາດ ພົງຍາລັກ ຫົວໜ້າກົມພິທິທະພັນໄກສອນ ພົມວິຫານ ແລະ ອະນຸສອນສະຖານຜູ້ນໍາປະຕິວັດ, ບັນດາທ່ານຫົວໜ້າກົມ, ຮອງກົມ, ອົງການຈັດຕັ້ງມະຫາຊົນ ພ້ອມດ້ວຍບັນດາແຂກຖືກເຊີນ.
ໃຫ້ກຽດມອບຫຼຽນມິດຕະພາບ ໃນຄັ້ງນີ້ ໂດຍ ທ່ານ ຫງວຽນບ໋າ ຮຸ່ງ, ຮັບໂດຍ ທ່ານ ໄຊຍະລາດ ພົງຍາລັກ ໂດຍຊ້ອງໜ້າ ທ່ານ ຄໍາຜາ ພິມມະສອນ ພ້ອມດ້ວຍບັນດາທ່ານແຂກທີ່ເຂົ້າຮ່ວມ.
ໃນໂອກາດນີ້, ທ່ານ ໄຊຍະລາດ ພົງຍາລັກ ໄດ້ຂຶ້ນກ່າວໃນພິທີ ຊຶ່ງທ່ານກ່າວວ່າ: ການໄດ້ຮັບຫຼຽນໄຊມິດຕະພາບໃນຄັ້ງນີ້, ເປັນການຢັ້ງຢືນເຖິງຜົນງານທີ່ໄດ້ປະກອບສ່ວນຢ່າງຕັ້ງໜ້າ ທາງດ້ານສະຕິປັນຍາ, ກໍາລັງວັງຊາ ແລະ ທຸ່ມເທເຫື່ອແຮງທີ່ມີໃນການປະກອບສ່ວນເສີມສ້າງສາຍພົວພັນມິດຕະພາບ ອັນແໜ້ນແຟ້ນ ລະຫວ່າງສອງຊາດ ລາວ-ຫວຽດນາມ, ຫວຽດນາມ-ລາວ, ເວົ້າລວມ, ເວົ້າສະເພາະ ກໍຄືການປະກອບສ່ວນ ໃນການສ້າງສິ່ງທີ່ເປັນອະນຸສອນ ໃຫ້ແກ່ປະທານ ໂຮ່ຈິມິນ ຢູ່ ສປປ ລາວ, ທ່ານໄຊຍະລາດ ພົງຍາລັກ ຍັງໄດ້ກ່າວຕື່ມວ່າ: ຂ້າພະເຈົ້າຂໍສະແດງຄວາມຂອບອົກຂອບໃຈຢ່າງສູງມາຍັງລັດຖະ ບານ ສສ ຫວຽດນາມ ແລະ ສະຖານທູດຫວຽດນາມ ທີ່ໄດ້ໃຫ້ການຊຸກຍູ້ສົ່ງເສີມທາງດ້ານຈິດໃຈ, ຍາມໃດກໍໄດ້ຮັບການຊຸກຍູ້ສົ່ງເສີມ ຈາກເພື່ອນດ້ວຍດີຕະຫຼອດມາ ແລະ ຫວັງຢ່າງຍິ່ງວ່າ ໃນຕໍ່ໜ້າສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ລະຫວ່າງ ລາວ-ຫວຽດນາມ ຈະໄດ້ຮັບການເພີ່ມພູນຄູນສ້າງໃຫ້ຈະເລີນງອກງາມຍິ່ງໆຂຶ້ນ ແລະ ໃນໂອກາດດັ່ງກ່າວ, ຂໍອວຍພອນໄຊອັນປະເສີດ ມາຍັງລັດຖະບານແຫ່ງ ສສ ຫວຽດນາມ, ອວຍພອນໃຫ້ສາຍພົວພັນມິດຕະພາບແບບພິເສດ ແລະ ການຮ່ວມມືຮອບດ້ານ ລາວ-ຫວຽດນາມ ໃຫ້ນັບມື້ອອກດອກອອກຜົນ ຈະເລີນງອກງາມຍິ່ງໆຂຶ້ນ.
(ຂ່າວ-ພາບ: ແສງຈັນ)
