ປີ 2022 ຜ່ານມາ ອົງການກວດສອບແຫ່ງລັດ ແລະ ອົງການກວດສອບປະຈໍາພາກ ໄດ້ດໍາເນີນການກວດສອບເອກະສານລາຍງານການເງິນ, ຄວາມສອດຄ່ອງທາງດ້ານກົດໝາຍ ແລະ ຜົນການຈັດຕັ້ງປະຕິ ບັດແຕ່ລະເປົ້າໝາຍສໍາເລັດຜົນຕາມແຜນການທີ່ກໍານົດໄວ້, ໃນຂະນະດຽວກັນແຜນການ ຈໍານວນ 108 ເປົ້າໝາຍ, ປະຕິບັດໄດ້ ຈໍານວນ 101 ເປົ້າໝາຍ.
ທ່ານ ເຄນ ລໍວັນໄຊ ຮອງປະທານອົງການກວດສອບແຫ່ງລັດໃຫ້ຮູ້ວ່າ: ການຈັດຕັ້ງປະຕິບັດການເຄື່ອນ ໄຫວວຽກງານກວດສອບແຫ່ງລັດ ໃນໄລຍະຜ່ານມາອົງການກວດສອບແຫ່ງລັດ ໄດ້ເອົາໃຈໃສ່ສຶກສາອົບຮົມແນວຄິດ-ການເມືອງ ຢ່າງເປັນປົກກະຕິຕໍ່ເນື່ອງ ພ້ອມທັງຊີ້ນໍາໃຫ້ບັນດາຄະນະນໍາແຕ່ລະຂັ້ນ ເອົາໃຈໃສ່ຈັດຕັ້ງເຊື່ອມຊຶມແນວທາງນະໂຍບາຍ, ມະຕິ, ຄໍາສັ່ງ, ຂໍ້ກໍານົດ, ບົດແນະນໍາຕ່າງໆ ຢ່າງເປັນປົກກະຕິ ດ້ວຍຫຼາຍຮູບແບບ, ຫຼາຍສີ ແລະ ຫຼາຍວິທີການ. ຜ່ານມາໄດ້ສໍາເລັດການປັບປຸງກົດໝາຍວ່າດ້ວຍການກວດສອບແຫ່ງລັດ ໂດຍໄດ້ຖືກຮັບຮອງ ແລະ ປະກາດໃຊ້ຕາມລັດຖະດໍາລັດ ຂອງປະທານປະເທດ ສະບັບເລກທີ 025/ປປທ, ລົງວັນທີ 10 ກຸມພາ 2023, ສໍາເລັດການສ້າງນິຕິກໍາໃຕ້ກົດໝາຍໃໝ່ ຈຳນວນ 2 ສະບັບຄື: ຂໍ້ຕົກລົງວ່າດ້ວຍລະບຽບການ, ກົນໄກ ແລະ ແບບແຜນວິທີການເຮັດວຽກຂອງອົງການກວດສອບແຫ່ງລັດ ແລະ ຂໍ້ກໍານົດວ່າດ້ວຍການຄັດເລືອກເປົ້າໝາຍ ກວດສອບ, ສຳເລັດການແປ ແລະ ຈັດພິມ ມາດຕະຖານການກວດສອບຂອງສາກົນ ຈຳນວນ 4 ສະບັບ, ໃນນັ້ນມາດຕະຖານກວດສອບພາກລັດ, ກວດສອບເອກະສານລາຍງານການເງິນ, ກວດສອບຜົນການຈັດຕັ້ງປະຕິບັດ ແລະ ກວດສອບຄວາມສອດຄ່ອງທາງດ້ານກົດໝາຍ, ສຳເລັດການສ້າງນັກກວດສອບແຫ່ງລັດ ຂັ້ນ 1 (ຊຸດທີ 3) ຂອງອົງການກວດສອບແຫ່ງລັດ ຈຳນວນ 25 ຄົນ ແລະ ສໍາເລັດການສອບເສັງຄັດເລືອກຂັ້ນນັກກວດສອບແຫ່ງລັດ ຂັ້ນ 1 (ຊຸດທີ 4) ຈໍານວນ 38 ຄົນ. ມາຮອດປັດຈຸບັນ ມີນັກກວດສອບຂັ້ນ I ທັງໝົດຈໍານວນ 37 ຄົນ,ສຳເລັດການສົ່ງພະນັກງານໄປຍົກລະດັບວິຊາສະເພາະ ຈຳນວນ 12 ຄົນ, ໃນນັ້ນຍົກລະດັບປະລິນຍາໂທ ຢູ່ພາຍໃນປະເທດ ຈຳນວນ 5 ຄົນ ແລະ ຍົກລະດັບຢູ່ຕ່າງປະເທດ ຈຳນວນ 7 ຄົນ (ປະລິນຍາໂທ 5 ຄົນ ແລະ ປະລິນຍາເອກ 2 ຄົນ);
ທ່ານກ່າວຕື່ມວ່າສຳລັບວຽກງານວິຊາສະເພາະໃນໄລຍະຜ່ານມາອົງການກວດສອບແຫ່ງລັດ ແລະ ອົງການກວດສອບປະຈໍາພາກ ໄດ້ເອົາໃຈໃສ່ປະຕິບັດວຽກງານວິຊາສະເພາະກວດສອບ ຕາມພາລະບົດບາດ, ສິດ ແລະ ໜ້າທີ່ຂອງຕົນ ທີ່ໄດ້ກໍານົດໄວ້ໃນກົດໝາຍວ່າດ້ວຍການກວດສອບແຫ່ງລັດ ແລະ ມະຕິກອງປະຊຸມສະພາແຫ່ງຊາດ ຢ່າງເຂັ້ມງວດ ແລະ ໄດ້ຮັບຜົນສໍາເລັດ ເປັນຢ່າງດີ ເຊັ່ນ: ໃນປີ 2022 ໂດຍພື້ນຖານໄດ້ດໍາເນີນການກວດສອບເອກະສານລາຍງານການເງິນ, ຄວາມສອດຄ່ອງທາງດ້ານກົດໝາຍ ແລະ ຜົນການຈັດຕັ້ງປະຕິບັດແຕ່ລະເປົ້າໝາຍສໍາເລັດຜົນຕາມແຜນການທີ່ກໍານົດໄວ້, ແຜນການ ຈໍານວນ 108 ເປົ້າໝາຍ, ປະຕິບັດໄດ້ ຈໍານວນ 101 ເປົ້າໝາຍ ໃນນັ້ນ: ບົດສະຫຼຸບຂາດຕົວການຈັດຕັ້ງປະຕິບັດງົບປະມານແຫ່ງລັດ ຈໍານວນ 33 ເປົ້າໝາຍ, ໂຄງການລົງທຶນຂອງລັດ 23 ເປົ້າໝາຍ, ໂຄງການເງິນກູ້ຢືມ ແລະ ຊ່ວຍເຫຼືອ 19 ເປົ້າໝາຍ, ວິສາຫະກິດລັດ 20 ເປົ້າໝາຍ ແລະ ທະນາຄານທຸລະກິດລັດລົງທຶນ 6 ເປົ້າໝາຍ, ໄດ້ສໍາເລັດການສ້າງບົດສະຫຼຸບ ແລະ ລາຍງານການເຄື່ອນໄຫວວຽກງານປະຈໍາປີ ແລະ ຜົນການກວດສອບບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດ, ທະນາຄານແຫ່ງ ສປປ ລາວ, ທະນາຄານທຸລະກິດ, ບໍລິສັດລັດລົງທຶນ ແລະ ຜົນການກວດສອບໂຄງການລົງທຶນຂອງລັດ ຕໍ່ປະທານປະເທດ, ນາຍົກລັດຖະມົນຕີ, ຄະນະປະຈໍາສະພາແຫ່ງຊາດ, ກອງປະຊຸມສະພາແຫ່ງຊາດ, ຄະນະປະຈໍາສະພາປະຊາຊົນຂັ້ນແຂວງ ແລະ ກອງປະຊຸມສະພາປະຊາຊົນຂັ້ນແຂວງ. ນອກນັ້ນ, ຍັງໄດ້ສົ່ງບົດສະຫຼຸບຜົນການກວດສອບ ໃຫ້ອົງການຄຸ້ມຄອງເປົ້າໝາຍຖືກກວດສອບ ແລະ ເປົ້າໝາຍຖືກກວດສອບ ທັນຕາມກໍານົດເວລາ, ຜົນການກວດສອບ ໄດ້ປະກອບສ່ວນເຮັດໃຫ້ ຫົວໜ່ວຍງົບປະມານ, ຫົວໜ່ວຍທຸລະກິດລັດລົງທຶນ ເຄື່ອນໄຫວຖືກຕ້ອງຕາມກົດໝາຍ, ສະກັດກັ້ນປະກົດການຫຍໍ້ທໍ້ທາງດ້ານການເງິນ, ງົບປະມານແຫ່ງລັດ, ປົກປ້ອງຜົນປະໂຫຍດ ຂອງລັດລວມໝູ່, ປະຊາຊົນ ເຮັດໃຫ້ການຄຸ້ມຄອງລັດ, ຄຸ້ມຄອງເສດຖະກິດ ມີຄວາມເຂັ້ມແຂງ, ໂປ່ງໃສ, ສົ່ງເສີມການລົງທຶນພາຍໃນ ແລະ ຕ່າງປະເທດ, ຊຸກຍູ້ການພັດທະນາເສດຖະກິດ-ສັງຄົມ ໃຫ້ມີການຂະຫຍາຍຕົວ; ໃນນັ້ນໄດ້ສໍາເລັດການສະໜອງຂໍ້ມູນຕິດພັນກັບບົດລາຍງານຜົນການກວດສອບບົດສະຫຼຸບຂາດຕົວການຈັດຕັ້ງປະຕິບັດງົບປະມານແຫ່ງລັດ ປະຈໍາປີ 2021 ໃຫ້ກະຊວງການເງິນ ເພື່ອນໍາໄປເປັນບ່ອນອີງໃນການແກ້ໄຂຜົນການກວດສອບ ຕາມມະຕິກອງປະຊຸມສະພາແຫ່ງຊາດ ສະບັບເລກທີ 76/ສພຊ, ລົງວັນທີ 29 ທັນວາ 2022, ໄດ້ເອົາໃຈໃສ່ຕິດຕາມ, ຊຸກຍູ້ ແລະ ກວດສອບຄືນ ການແກ້ໄຂຜົນການກວດສອບ ເພື່ອເຮັດໃຫ້ອົງການຄຸ້ມຄອງເປົ້າໝາຍຖືກກວດສອບ ແລະ ເປົ້າໝາຍຖືກກວດສອບ ເປັນເຈົ້າການຈັດຕັ້ງປະຕິບັດມາດຕະການແກ້ໄຂຜົນການກວດສອບ ຕາມມະຕິກອງປະຊຸມສະພາແຫ່ງຊາດ, ຄະນະປະຈໍາສະພາແຫ່ງຊາດ, ກອງປະຊຸມສະພາປະຊາຊົນຂັ້ນແຂວງ ແລະ ຄະນະປະຈໍາ ສະພາປະຊາຊົນຂັ້ນແຂວງ, ໄດ້ຈັດກອງປະຊຸມ ປຶກສາຫາລື, ແລກປ່ຽນ, ຖອດຖອນບົດຮຽນ ກ່ຽວກັບການແກ້ໄຂຜົນການກວດສອບ ກັບກະຊວງການເງິນ, 4 ແຂວງພາກໃຕ້, 8 ແຂວງພາກເໜືອ; ພ້ອມນັ້ນ, ໄດ້ແຕ່ງຕັ້ງຄະນະສະເພາະກິດລົງເກັບກໍາ ແລະ ໄຈ້ແຍກຂໍ້ມູນການແກ້ໄຂຜົນການກວດສອບ ຢູ່ 7 ກົມ ຂອງກະຊວງການເງິນ, ໄດ້ເອົາໃຈໃສ່ນຳພາ-ຊີ້ນຳ ວຽກງານຕິດຕາມກວດກາການຈັດຕັ້ງເຄື່ອນໄຫວວຽກງານ ຂອງບັນດາກົມ, ຫ້ອງການ, ສະຖາບັນຄົ້ນຄວ້າ ແລະ ຝຶກອົບຮົມວຽກງານກວດສອບ ແລະ ອົງການກວດສອບປະຈຳພາກ ໃນການປະຕິບັດໜ້າທີ່ວຽກງານ ຂອງພະນັກງານ-ລັດຖະກອນ ແລະ ນັກກວດສອບແຫ່ງລັດ ເພື່ອສະກັດກັ້ນບັນຫາຫຍໍ້ທໍ້ຕ່າງໆ ບໍ່ໃຫ້ເກີດຂຶ້ນ.
ໂດຍ: ສຳນານ ພົມພັກດີ
