ສຳນັກຂ່າວສານຫວຽດນາມປະຈຳເຢຍລະມັນ ລາຍງານວ່າ: ວັນທີ 31 ພຶດສະພາ ຜ່ານມາ, ສຳນັກງານສະຖິຕິລັດຖະບານກາງເຢຍລະມັນ (Destatis) ປະກາດວ່າ: ອັດຕາເງິນເຟີ້ໃນປະເທດຍັງສືບຕໍ່ຫຼຸດລົງໃນເດືອນພຶດສະພາ ປີ 2023 ເນື່ອງຈາກລາຄາຜູ້ບໍລິໂພກໄດ້ເພີ່ມຂຶ້ນ 6,1% ເມື່ອທຽບໃສ່ກັບເດືອນດຽວກັນຂອງປີກາຍ.
ໃນເດືອນເມສາ ປີ 2023, ອັດຕາເງິນເຟີ້ໄດ້ຫຼຸດລົງ 7,2% ຊຶ່ງເປັນລະດັບຕໍ່າສຸດນັບຕັ້ງແຕ່ເດືອນສິງຫາ ປີ 2022 ແລະ ບັນດານັກເສດຖະກິດຄາດວ່າອັດຕາເງິນເຟີ້ຈະຫຼຸດລົງ 6,5% ໃນເດືອນພຶດສະພານີ້. ບັນດາໂຕເລກສະຖິຕິຈາກເຢຍລະມັນ ແມ່ນຕົວຊີ້ບອກທີ່ສໍາຄັນຂອງອັດຕາເງິນເຟີ້ໃນທົ່ວເຂດເອີຣົບ. ການ ເໜັງຕີງຂອງລາຄາຢູ່ແຕ່ລະປະເທດໃນຂົງເຂດການນຳໃຊ້ສະກຸນເງິນລວມເອີຣົບ (eurozone) ມີຜົນສະທ້ອນທີ່ຊັດເຈນຕໍ່ນະໂຍບາຍອັດຕາດອກເບ້ຍໃນອະນາຄົດຂອງທະນາຄານກາງເອີຣົບ (ECB).
ໃນຕົ້ນເດືອນພຶດສະພາ, ECB ໄດ້ຍົກອັດຕາດອກເບ້ຍພື້ນຖານໃນ eurozone ຂຶ້ນ 3,75% ເປັນຄັ້ງທີ 7 ຕິດຕໍ່ກັນ. ຜູ້ຊ່ຽວຊານຄາດວ່າ ECB ຈະສືບຕໍ່ເພີ່ມອັດຕາດອກເບ້ຍຕື່ມອີກໃນອະນາຄົດອັນໃກ້ນີ້. ຕາມການລາຍງານໂຕເລກເບື້ອງຕົ້ນສະແດງໃຫ້ເຫັນວ່າ: ໃນເດືອນພຶດສະພາ ປີ 2023, ການເຕີບໂຕຂອງລາຄາຜູ້ບໍລິໂພກ ຢູ່ ປະເທດຝຣັ່ງ ມີການເຕີບໂຕຊ້າລົງ 5,1%, ຫຼຸດລົງເມື່ອທຽບໃສ່ 5,9% ໃນເດືອນຜ່ານມາ. ໃນຂະນະດຽວກັນ, ຂໍ້ມູນທີ່ເປີດເຜີຍໃນໜຶ່ງມື້ກ່ອນໜ້ານີ້ ຢູ່ປະເທດແອັດສະປາຍ ສະແດງໃຫ້ເຫັນວ່າອັດຕາເງິນເຟີ້ຂອງປະເທດໄດ້ຫຼຸດລົງຈາກ 4,1% ໃນເດືອນເມສາ ເປັນ 3,2% ໃນເດືອນພຶດສະພາ ເນື່ອງຈາກລາຄາພະລັງງານເຊື້ອໄຟຫຼຸດລົງ.
ຂໍ້ມູນຈາກ ອີຕາລີ ປະກາດໃນວັນທີ 31 ພຶດສະພາ ຜ່ານມາ, ສະແດງໃຫ້ເຫັນວ່າການເຕີບໂຕຂອງລາຄາໃນປະເທດເດືອນພຶດສະພາ ປີ 2023 ຫຼຸດລົງຈາກ 8,2% ໃນເດືອນເມສາ ເປັນ 7,6%. ແນວໃດກໍຕາມ, ໂຕເລກນີ້ຍັງສູງກວ່າລະດັບເປົ້າໝາຍເຖິງ 2%. ຕາມການຕີລາຄາຂອງ ທ່ານ ລຸຍ ເດິ ກຣິນໂດສ ຮອງປະທານທະນາຄານກາງເອີຣົບ (ECB), ນີ້ແມ່ນຂໍ້ມູນໃນແງ່ດີ, ແຕ່ຍັງໄວເກີນໄປທີ່ຈະປະກາດໃຫ້ພາກພື້ນນີ້ສາມາດເອົາຊະນະກັບໄພເງິນເຟີ້ໄດ້. ກ່າວຄຳເຫັນໃນການປະກາດບົດລາຍງານປະຈຳໄລຍະ ຂອງ ECB ກ່ຽວກັບສະຖຽນລະພາບດ້ານການເງິນ, ທ່ານກ່າວວ່າ: ເອີຣົບ ພວມຢູ່ໃນເສັ້ນທາງທີ່ຖືກຕ້ອງ ແລະ ບັນດາປະເທດໃນພາກພື້ນຈຳເປັນຕ້ອງພິຈາລະນາວິວັດການຂອງອັດຕາເງິນເຟີ້ພື້ນຖານຢ່າງຮອບຄອບ, ບໍ່ລວມລາຄາສິນຄ້າ ແລະ ພະລັງງານ.
