ສຳນັກຂ່າວ ຢອນຮັບ ຂອງ ສ.ເກົາຫລີ, ວັນທີ 11ພຶດສະພານີ້,ທ່ານ YoonSeok-Yeol,ປະທານາທິບໍດີ ຂອງ ສ.ເກົາຫລີ ປະກາດຍົກເລີກມາດຕະການຄວບຄຸມໂຄວິດ-19 ຈະຖືກຍົກເລີກເກືອບທັງໝົດຈາກລະດັບຮ້າຍແຮງມາເປັນການເຝົ້າລະວັງ ມາດຕະການ ກັກຕົວ 7 ວັນ ກັບຜູ້ຕິດເຊື້ອ ຈະປ່ຽນເປັນ ແນະນຳໃຫ້ກັກຕົວ 5 ວັນ ຍົກເລີກການບັງຄັບໃສ່ຜ້າອັດປາກທຸກແຫ່ງຍົກເວັ້ນຫ້ອງປິ່ນປົວພະຍາດຢູ່ໂຮງໝໍ ແລະ ຍົກເລີກ ຄຳແນະນຳການກວດຫາເຊື້ອພະຍາດແບບ PCR ເມື່ອເດີນທາງມາເຖິງ ສ.ເກົາຫລີ.ນອກຈາກນີ້ ລັດຖະບານ ສ.ເກົາຫລີ ຈະໃຫ້ການສະໜັບສະໜູນທາງການເງິນແກ່ການກວດຫາເຊື້ອ ແລະ ປິ່ນປົວ ໂຄວິດ-19 ພ້ອມທັງວາງມາດຕະການປ້ອງກັນການແພ່ລະບາດໃນອະນາຄົດດ້ວຍການຕິດຕັ້ງລະບົບຮັບມື ທີ່ຕັ້ງຢູ່ບົນພື້ນຖານຂອງວິທະຍາສາດ ແລະ ເພີ່ມຂີດຄວາມສາມາດການພັດທະນາວັກຊິນຂອງປະເທດ ຄຽງຄູ່ໄປກັບການຮ່ວມມືກັບປະຊາຄົມໂລກ. ນອກນີ້ຍັງຈະຮ່າງນະໂຍບາຍຫລັງໂຄວິດ-19 ເພື່ອນຳການປ່ຽນແປງທີ່ເກີດຂຶ້ນທາງສັງຄົມມາເປັນກົນໄກຂັບເຂື່ອນການເຕີບໂຕທາງເສດຖະກິດ ໃນຕໍ່ໜ້າ.
(ບັນນາທິການຂ່າວ: ຕ່າງປະເທດ)
ຮຽບຮຽງ ຂ່າວໂດຍ: ສະໄຫວ ລາດປາກດີ
