ຄະນະສະຖາປັດຕະຍະກໍາສາດ (ຄສປ) ມະຫາວິທະຍາໄລແຫ່ງຊາດ (ມຊ) ໄດ້ຈັດພິທີປະກາດຜົນການອອກແບບເຄື່ອງປະດັບ ປະຈໍາສົກສຶກສາ 2023 ໃນຫົວຂໍ້ “ເຄື່ອງປະດັບ ແລະ ຄຸນຄ່າດ້ານຈິດໃຈຂອງຄົນສະໄໝໃໝ່” ເມື່ອວັນທີ 3 ພຶດສະພາ 2023 ທີ່ຄະນະດັ່ງກ່າວ, ໂດຍໃຫ້ກຽດເຂົ້າຮ່ວມຂອງທ່ານ ຮສ.ປອ ມະໂນລົດ ພິນິດ ຮອງຄະນະບໍດີ ຄະນະສະຖາປັດຕະຍະກຳສາດ ມຊ, ທ່ານ ຈັນທະວົງ ພະມີສິດ ປະທານອີຊີໂກນ, ຜູ້ບໍລິຫານຮ້ານຄໍາພູວົງ, ພ້ອມດ້ວຍບັນດາຫົວໜ້າພະແນກ, ຜູ້ຊ່ຽວຊານດ້ານການອອກແບບ, ບັນດາຄະນະກໍາມະການຕັດສິນ ພ້ອມດ້ວຍພະນັກງານຄູອາຈານ ແລະ ນັກສຶກສາຢ່າງພ້ອມພຽງ.
ການຈັດງານດັ່ງກ່າວ, ແມ່ນເພື່ອເປັນການແລກປ່ຽນ ແລະ ສົ່ງເສີມຄວາມຄິດສ້າງສັນທາງດ້ານການອອກແບບຂອງນັກສຶກສາ, ເພື່ອສ້າງສາຍພົວພັນທີ່ດີລະຫວ່າງຂະແໜງການສຶກສາທີ່ກ່ຽວຂ້ອງໃນລະດັບສາກົນ ແລະ ເພື່ອສົ່ງເສີມດ້ານສິລະປະ, ວັດທະນະທຳ ແລະ ການປັບຕົວ ເພື່ອການເປັນຢູ່ແບບທັນສະໄໝ.
ໃນໂອກາດນີ້, ທ່ານ ຮສ.ປອ ມະໂນລົດ ພິນິດ ໄດ້ກ່າວໃຫ້ຮູ້ວ່າ: ເນື່ອງຈາກຄະນະສະຖາປັດຕະຍະກໍາສາດ ມີຈຸດພິເສດສະເພາະທາງດ້ານການຮຽນການສອນ ໃນ 4 ພາກວິຊາ ຄື: ພາກວິຊາສະຖາປັດຕະຍະກໍາສາດ, ພາກວິຊາອອກແບບສະພາບແວດດລ້ອມຜັງເມືອງ, ພາກວິຊາວິທະຍາການອາຄານ ແລະ ພາກວິຊາອອກແບບຜະລິດຕະພັນ-ຕົກແຕ່ງ ໄດ້ຮຽນທາງດ້ານທິດສະດີ ແລະ ການປະຕິບັດຕົວຈິງ. ໃນແຕ່ລະປີ ຄະນະສະຖາປັດຕະຍະກໍາສາດ ໄດ້ມີການຈັດການແຂ່ງຂັນການອອກແບບເປັນປະຈໍາ ເພື່ອເສີມສ້າງດ້ານການຮຽນຮູ້ຕະຫຼອດຊີວິດຂອງນັກສຶກສາດ. ການຈັດງານແຂ່ງຂັນໃນຄັ້ງນີ້, ທາງຄະນະສະຖາປັດຕະຍະກໍາສາດໄດ້ຮ່ວມມືກັບຮ້ານຄໍາພູວົງ ເພື່ອດໍາເນີນກິດຈະກໍາການແຂ່ງຂັນການອອກແບບເຄື່ອງປະດັບ ເລີ່ມແຕ່ວັນທີ 6 ມີນາ 2023 ເຖິງ 5 ເມສາ 2023, ພາຍໃຕ້ໃນຫົວຂໍ້ “ເຄື່ອງປະດັບ ແລະ ຄຸນຄ່າດ້ານຈິດໃຈຂອງຄົນສະໄໝໃໝ່”. ທັງນີ້, ກໍເພື່ອໃຫ້ນັກສຶກສາຮ່ວມກັນອອກແບບເພື່ອພັດທະນາທາງດ້ານການອອກແບບເຄື່ອງປະດັບ ປະເພດຄໍາ ທີ່ເປັນວັດຖຸມີຄ່າ ທັງຄົນລາວ ແລະ ທົ່ວໂລກໃຫ້ຄວາມສົນໃຈ ແນໃສ່ໃຫ້ເກີດມີຄວາມຄິດສ້າງສັນ, ມີຄຸນຄ່າທາງດ້ານຈິດໃຈ ແລະ ມີຄວາມທັນສະໄໝຂອງຄົນສະໄໝໃໝ່.
ການແຂ່ງຂັນໃນຮູບແບບນີ້, ແມ່ນໄດ້ຈັດຂຶ້ນເປັນຄັ້ງທີ 4 ເລີ່ມແຕ່ປີ 2019 ເປັນຕົ້ນມາ, ຊຶ່ງຄັ້ງທີ 1 ມີຜູ້ເຂົ້າຮ່ວມ 27 ຄົນ (ນັກສຶກສາ ຄສບ ແລະ ສິດເກົ່າ), ຄັ້ງທີ 2 ມີຜູ້ເຂົ້າຮ່ວມ 29 ຄົນ (ນັກສຶກສາ ຄສປ ແລະ ສິດເກົ່າ), ຄັ້ງທີ 3 ຈໍານວນ 37 ຄົນ (ນັກສຶກສາ ຄສປ) ແລະ ຄັ້ງທີ 4 ມີ 50 ຄົນ (ນັກສຶກສາ ຄສປ ແລະ ສະຖາບັນການສຶກສາຊັ້ນສູງຂຶ້ນໄປທົ່ວປະເທດ), ໂດຍຄັ້ງທີ່ຜ່ານໆມາ ແມ່ນມີການເຂົ້າຮ່ວມຂອງນັກສຶກສາຄະນະສະຖາປັດ ແລະ ນັກສຶກສາຊັ້ນສູງຂອງທຸກສະຖາບັນ.
ສໍາລັບຜົນການແຂ່ງຂັນອອກແບບເຄື່ອງປະດັບຄັ້ງນີ້, ຊະນະເລີດໄດ້ແກ່ ນາງ ສຸກສະຫວັນ ມະນີໄຊ ນັກສຶກສາປີ 3 ໄດ້ຮັບເງິນລາງວັນ 3.000.000 ກີບ, ອັນດັບທີ 2 ໄດ້ແກ່ ນາງ ພອຍໄພລິນ ນາຄອນພັບ ນັກສຶກສາປີ 3 ໄດ້ຮັບເງິນລາງວັນ 2.000.000 ກີບ ແລະ ອັນດັບທີ 3 ໄດ້ແກ່ ນາງ ສຸພັດສາ ແດນໄກສອນ ນັກສຶກສາປີ 3 ໄດ້ຮັບເງິນລາງວັນ 1.500.000 ກີບ ແລະ ໄດ້ມີນັກສຶກສາໄດ້ຮັບລາງວັນຊົມເຊີຍ 3 ຄົນ ໄດ້ເງິນລາງວັນຜູ້ລະ 500.000 ກີບ.
ໂດຍ ບົວລະພາ
