ກະຊວງວັດທະນະທຳ ສະຫະພັນຣັດເຊຍ, ສູນວິທະຍາສາດ ແລະ ວັດທະນະທຳ ຣັດເຊຍປະ ຈໍາລາວ ຮ່ວມກັບກະຊວງຖະແຫງຂ່າວ, ວັດທະນະທໍາ ແລະ ທ່ອງທ່ຽວ ແຫ່ງ ສປປ ລາວ ຈັດມະໂຫລານຮູບເງົາຣັດເຊຍ ໃນລະຫວ່າງ 21-23 ເມສາ 2023 ແບບບໍ່ເສຍຄ່າ ຢູ່ສູນການຄ້າ ວຽງຈັນເຊັນເຕີ ໂດຍໄດ້ນຳເອົາຮູບເງົາ 5 ເລື່ອງມາເຜີຍແຜ່ຄື: ນໍ້າກ້ອນ (ຮູບເງົາກິລາ), ສາມນັກຮົບບູຮານກັບມາຂຶ້ນບັນລັງ (ຮູບເງົາກະຕູນ), ຊື່ໝາປາມ (ຮູບເງົາພະຈົນໄພຂອງຄອບຄົວ), ຄັ້ງໜຶ່ງໃນພາກໃຕ້ແບບຣັດເຊຍ (ຮູບເງົາຕະລົກ) ແລະ ຢາກໄດ້ຜົວ(ຮູບເງົາຕະລົກ).
ທ່ານ ວັນສີ ກົວມົວ ຮອງລັດຖະມົນຕີ ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ໄດ້ກ່າວວ່າ: ສາທາລະນະລັດ ປະຊາທິປະໄຕ ປະຊາຊົນລາວ ແລະ ສະຫະພັນຣັດເຊຍ ແມ່ນມີມູນເຊື່ອແຫ່ງການພົວ ພັນ ແລະ ການຮ່ວມມືກັນມາແຕ່ດົນນານ, ວຽກງານວັດທະນະທຳ ກໍແມ່ນວຽກງານໜຶ່ງທີ່ມີການພົວພັນ, ຮ່ວມມື ແລະ ແລກປ່ຽນກັນຫລາຍດ້ານ ໂດຍສະເພາະດ້ານຮູບເງົາ ກໍໄດ້ຮ່ວມກັນຈັດສັບປະດາຮູບເງົາຣັດເຊຍ ຢູ່ນະຄອນ ຫລວງວຽງຈັນມາແລ້ວ. ເທສະການຮູບເງົາຣັດເຊຍ ຄັ້ງນີ້, ຖືເປັນການສືບຕໍ່ມູນເຊື້ອທີ່ມີມາແລ້ວ, ທັງເປັນຂີດໝາຍ ໃໝ່ທີ່ຈະກ້າວໄປສູ່ການເສີມຂະຫຍາຍມູນເຊື້ອ ທີ່ມີມານັ້ນໃຫ້ແຕກດອກອອກຜົນຂຶ້ນໄປເລື້ອຍໆ ເພື່ອໃຫ້ວຽກງານຮູບເງົາເປັນເວທີ ແລະ ຊ່ອງທາງແຫ່ງການແລກປ່ຽນ ວັດທະນະທຳລະຫວ່າງສອງຊາດ.
ຮູບເງົາ ຄືພາຫານະແຫ່ງຄວາມຮູ້ ແລະ ການບັນເທີງຂອງສັງຄົມ, ຍ້ອນເຫັນໄດ້ເຖິງຄວາມສຳຄັນດັ່ງກ່າວ, ລັດຖະບານແຫ່ງ ສປປ ລາວ ຈິ່ງໄດ້ມີນະໂຍບາຍໃນການຊຸກຍູ້ ສົ່ງເສີມການຜະລິດ, ການເຜີຍແຜ່ ທັງພາຍໃນ ແລະ ຮ່ວມມືກັບຕ່າງປະເທດ, ການຈັດເທສະການຮູບຣັດເຊຍ ຄັ້ງນີ້ ຖືເປັນຄວາມກ້າວໜ້າດ້ານວຽກງານຮູບເງົາຂອງຣັດເຊຍ ຈະເຮັດໃຫ້ຜູ້ຊົມມີຄວາມນິຍົມຊົມຊອບ ແລະ ເຊື່ອໝັ້ນຢ່າງຍິ່ງວ່າເທ ສະການຮູບເງົາຄັ້ງນີ້, ຈະປະກອບສ່ວນ ໃນການພັດທະນາວຽກງານຮູບເງົາລາວ ແລະ ປະກອບສ່ວນ ແລກປ່ຽນວັດທະນະທຳຂອງສອງປະເທດ ໃຫ້ເກີດດອກອອກຜົນສູງຂຶ້ນໄປເລື້ອຍໆ.
ຂ່າວ-ພາບ: ກິດຕາ
