ກົມກິລາມວນຊົນ, ພະລະ ແລະ ສິລະປະສຶກສາ ຫຼື ກພສ ກະຊວງສຶກສາທິການ ແລະ ກິລາ ໄດ້ຮັບການປະດັບຫຼຽນໄຊແຮງງານ ຊັ້ນ l, ຊັ້ນ ll ແລະ ຊັ້ນ lll, ຫຼຽນກາແຮງງານ ແລະ ໃບຍ້ອງຍໍ ຈາກລັດຖະບານ ແລະ ກະຊວງສຶກສາທິການ ແລະ ກິລາ ຢ່າງສົມກຽດ ໃນຂະບວນການແຂ່ງຂັນຮັກຊາດ ແລະ ພັດທະນາ ໄລຍະ 2016-2020 ເມື່ອວັນທີ 10 ເມສາ ຜ່ານມາ ທີ່ຫ້ອງປະຊຸມສຳນັກງານ ສສກ (ເຂດເຈົ້າອານຸວົງ), ໃຫ້ກຽດເຂົ້າຮ່ວມ ແລະ ປະດັບຫຼຽນຂອງ ທ່ານ ກິ່ງມະໂນ ພົມມະຫາໄຊ ຮອງລັດຖະມົນຕີ ກະຊວງສຶກສາທິການ ແລະ ກິລາ (ສສກ), ມີທ່ານ ວິລະວັນ ບຸນສຸກໄທ ຫົວໜ້າກົມ ກພສ ພ້ອມດ້ວຍແຂກຖືກເຊີນຈາກກົມອ້ອມຂ້າງ, ການນໍາອາວຸໂສບໍານານ, ຜູ້ອໍານວຍການວິທະຍາໄລພະລະສຶກສາ, ວິທະຍາໄລສິລະປະສຶກສາ, ບັນດາຫົວໜ້າ-ຮອງຫົວໜ້າພະແນກ ແລະ ພະນັກງານວິຊາການພາຍໃນ ກພສ ເຂົ້າຮ່ວມ.
ໂອກາດນີ້, ທ່ານ ວິລະວັນ ບຸນສຸກໄທ ໄດ້ລາຍງານໃຫ້ຮູ້ວ່າ: ກພສ ເປັນກົງຈັກບໍລິຫານ-ຄຸ້ມຄອງວິຊາການ ໃນໂຄງປະກອບການຈັດຕັ້ງຂອງ ສສກ ມີພາລະບົດບາດເປັນເສນາທິການໃຫ້ແກ່ລັດຖະມົນຕີ ກ່ຽວກັບການຄຸ້ມຄອງ, ຊຸກຍູ້, ສົ່ງເສີມ ແລະ ພັດທະນາ ວຽກງານກິລາ-ກາຍະກຳມວນຊົນ, ກິລາ-ກາຍະກໍາຄົນພິການ, ພະລະສຶກສາ, ສິລະປະສຶກສາ, ສຶກສາປ້ອງກັນຊາດ-ປ້ອງກັນຄວາມສະຫງົບ, ຕ້ານສິ່ງເສບຕິດໃນໂຮງຮຽນ ແລະ ຈັດການແຂ່ງຂັນກິລາ-ກາຍະກຳມວນຊົນ, ກິລາ-ກາຍະກຳຄົນພິການ, ກິລານັກຮຽນ-ນັກສຶກສາ, ການແຂ່ງຂັນສິລະປະ-ວັນນະຄະດີ ແລະ ສິລະປະກໍາ ສຳລັບນັກຮຽນ-ນັກສຶກສາ ທັງພາກລັດ, ເອກະຊົນ ແລະ ເຂົ້າຮ່ວມການແຂ່ງຂັນກິລາທັງພາຍໃນ ແລະ ຕ່າງປະເທດ.
ໂດຍປະຕິບັດຕາມດໍາລັດ ວ່າດ້ວຍການແຂ່ງຂັນ ແລະ ຍ້ອງຍໍ ກ່ຽວກັບການສະຫຼຸບ, ຕີລາຄາ, ປະເມີນຂະບວນການແຂ່ງຂັນຮັກຊາດ, ສ້າງບ້ານພັດທະນາຕິດພັນກັບການພັດທະນາຊົນນະບົດເພື່ອແກ້ໄຂຄວາມທຸກຍາກຂອງປະຊາຊົນໃນຂອບເຂດທົ່ວປະເທດ ແລະ ແຈ້ງການກ່ຽວກັບການສືບຕໍ່ເປີດຂະບວນການແຂ່ງຂັນຮັກຊາດ ແລະ ພັດທະນາຂອງຄະນະຊີ້ນໍາລະດັບຊາດ, ການຈັດຕັ້ງປະຕິບັດ 2 ໜ້າທີ່ຍຸດທະສາດ ຄື ປົກປັກຮັກສາ ແລະ ສ້າງສາພັດທະນາປະເທດຊາດ ສະນັ້ນ, ກພສ ຈຶ່ງໄດ້ສະຫຼຸບສັງລວມຜົນງານການເຄື່ອນໄຫວ ແລະ ກໍານົດທິດທາງແຜນການເພື່ອສືບຕໍ່ຈັດຕັ້ງປະຕິບັດ ຕະຫຼອດໄລຍະຜົນສໍາເລັດ 5 ປີ (2016-2020) ຄະນະພັກ-ຄະນະນຳ ໄດ້ນຳພາບັນດາສະມາຊິກພັກ ແລະ ພະນັກງານ ສາມາດຈັ້ງຕັ້ງປະຕິບັດວຽກງານດັ່ງກ່າວ ໄດ້ຮັບຜົນລຳເລັດຕາມເປົ້າໝາຍທີ່ວາງໄວ້ ໂດຍສະເພາະດ້ານວຽກງານການກໍ່ສ້າງຮາກຖານການເມືອງ, ດ້ານການພັດທະນາເສດຖະກິດ, ດ້ານວັດທະນະທໍາ-ສັງຄົມ ແລະ ດ້ານການປ້ອງກັນຊາດ-ປ້ອງກັນຄວາມສະຫງົບ ຜ່ານການສະຫຼຸບ, ຕີລາຄາ ແລະ ປະເມີນຂະບວນການແຂ່ງຂັນຮັກຊາດ, ສ້າງບ້ານພັດທະນາ ແລະ ຜັນຂະຫຍາຍວຽກງານສາມສ້າງເຂົ້າສູ່ລວງເລິກ ສາມາດສັງລວມການຍ້ອງຍໍຜົນງານ 5 ປີ ໃຫ້ ບຸກຄົນ ແລະ ກົມກອງ ພາຍໃນ ກພສ ທັງໝົດ 43 ທ່ານ ແລະ 2 ກົມກອງ ປະກອບມີ ຫຼຽນໄຊແຮງງານ ຊັ້ນ I ຈໍານວນ 7 ທ່ານ ແລະ 1 ກົມກອງ; ຫຼຽນໄຊແຮງງານ ຊັ້ນ II ຈໍານວນ 10 ທ່ານ ແລະ 1 ກົມກອງ; ຫຼຽນໄຊແຮງງານ ຊັ້ນ III ຈໍານວນ 18 ທ່ານ; ຫຼຽນກາແຮງງານ ຈໍານວນ 5 ທ່ານ ແລະ ໃບຍ້ອງຍໍລັດຖະບານ ຈໍານວນ 3 ທ່ານ.
ໂອກາດດຽວກັນ, ທ່ານ ກິ່ງມະໂນ ພົມມະຫາໄຊ ກໍໄດ້ເນັ້ນໃຫ້ກົມດັ່ງກ່າວ ສືບຕໍ່ຮັກສາມູນເຊື້ອ ແລະ ເພີ່ມທະວີສຸມໃສ່ຈັດຕັ້ງປະຕິບັດຂະບວນການແຂ່ງຂັນຮັກຊາດ ແລະ ພັດທະນາ ໃນໄລຍະ 5 ປີຕໍ່ໜ້າ (2021-2025) ໃຫ້ແຂງແຮງ, ເລິກເຊິ່ງ ແລະ ສ້າງພື້ນຖານອັນໜັກແໜ້ນ ໃນໄລຍະໃໝ່ ໃຫ້ບັນລຸຄາດໝາຍຕາມເນື້ອໃນຂໍ້ແຂ່ງຂັນທີ່ ສສກ ໄດ້ກໍານົດອອກ ໃຫ້ເປັນຂະບວນຟົດຟື້ນຕໍ່ເນື່ອງ ທັງຮັບປະກັນໃຫ້ໄດ້ ຕາມ 4 ຄາດໝາຍລວມຄື: ໃຫ້ໄວ, ໃຫ້ດີ, ໃຫ້ຫຼາຍ ແລະ ໃຫ້ຖືກກົດໝາຍ. ຢ່າງໃດກໍດີ, ຂໍຮຽກຮ້ອງມາຍັງ ຄະນະພັກ-ຄະນະນໍາ ແລະ ພະນັກງານພາຍໃນກົມ ຈົ່ງພ້ອມກັນເອົາໃຈໃສ່ເພີ່ມທະວີຄວາມສາມັກຄີເປັນເອກະພາບ ພ້ອມກັນຈັດຕັ້ງປະຕິບັດເນື້ອໃນຂໍ້ແຂ່ງຂັນກິລາ-ກາຍະກໍາ ໃນ 7 ຄາດໝາຍທີ່ກົມໄດ້ວາງໄວ້ໃຫ້ບັນລຸ ຕິດພັນກັບການປະຕິບັດພາລະບົດບາດ, ໜ້າທີ່ຂອງກົມກອງໃນການຊຸກຍູ້, ສົ່ງເສີມ ແລະ ພັດທະນາວຽກງານກິລາມວນຊົນ, ພະລະ ແລະ ສິລະປະສຶກສາ ໃຫ້ມີຄຸນນະພາບ, ປະສິດທິພາບ ແລະ ປະສິດທິຜົນ ໂດຍສະເພາະເປັນເສນາທິການໃຫ້ຄະນະນໍາກະຊວງ ເອົາໃຈໃສ່ນໍາພາ-ຊີ້ນໍາວຽກຈຸດສຸມ.
ຄຽງຄູ່ກັນນັ້ນ, ກໍໃຫ້ເພີ່ມທະວີສຶກສາອົບຮົມການເມືອງແນວຄິດໃຫ້ພະນັກງານ, ຄູ-ອາຈານ, ນັກຮຽນ-ນັກສຶກສາ, ກໍາມະການ, ຄູຝຶກ, ນັກກິລາ ທີ່ຢູ່ໃນຂອບເຂດຄວາມຮັບຜິດຊອບຂອງກົມຕາມການແບ່ງຂັ້ນຄຸ້ມຄອງ ໃຫ້ເປັນປົກກະຕິຕໍ່ເນື່ອງດ້ວຍຫຼາຍຮູບແບບ ແລະ ຫຼາຍວິທີການ ເພື່ອຮັບປະກັນໃຫ້ມີແນວຄິດອຸ່ນອ່ຽນທຸ່ນທ່ຽງ, ເຊື່ອໝັ້ນຕໍ່ການ ນຳພາ-ຊີ້ນຳຂອງພັກຂອງລັດ ອົດທົນຜ່ານຜ່າໃນສະພາບທີ່ພົບຄວາມຫຍຸ້ງຍາກທາງດ້ານເສດຖະກິດ-ການເງິນ, ຄ່ອງຄອງຊີບສູງ ແລະ ບັນຫາອື່ນໆ. ພ້ອມກັນນັ້ນກໍໃຫ້ເຊື່ອມຊຶມ, ເຜີຍແຜ່, ຜັນຂະຫຍາຍບັນດານິຕິກໍາຕ່າງໆ ທີ່ຂັ້ນເທິງວາງອອກຢ່າງເຂັ້ມງວດ; ເພີ່ມທະວີຄວາມຮັບຜິດຊອບຕໍ່ໜ້າທີ່ການເມືອງຂອງກົມກອງຕາມພາລະບົດບາດ, ຕາມການແບ່ງຂັ້ນຄຸ້ມຄອງຕໍ່ວຽກງານກິລາ-ກາຍະກໍາມວນຊົນ, ກິລາ-ກາຍະກໍາຄົນພິການ, ການສ້າງຄູພະລະສຶກສາ ແລະ ຄູສິລະປະສຶກສາ, ການຈັດການຮຽນການສອນ ນັບທັງຂະບວນການແຂ່ງຂັນກິລາ-ສິລະປະ, ການເຂົ້າຮ່ວມແຂ່ງຂັນກິລານັກຮຽນ, ກິລາຄົນພິການໃນລະດັບຕ່າງໆທັງພາຍໃນ ແລະ ຕ່າງປະເທດ, ການຫັດກາຍຍະບໍລິຫານອອກກໍາລັງກາຍ ເພື່ອສຸຂະພາບຂອງມວນຊົນທຸກເພດທຸກໄວ; ເພີ່ມທະວີຄວາມເອົາໃຈໃສ່ນໍາພາ-ຊີ້ນໍາການຈັດຕັ້ງການຮຽນການສອນ ສຶກສາວິຊາພື້ນຖານປ້ອງກັນຕົວໃນຊັ້ນມັດທະຍົມຕອນປາຍ ແລະ ສຶກສາປ້ອງກັນຊາດ-ປ້ອງກັນຄວາມສະຫງົບໃນສາຍອາຊີວະສຶກສາ ແລະ ການສຶກສາຊັ້ນສູງ ໃຫ້ທົ່ວເຖິງເລິກເຊິ່ງໜັກແໜ້ນຖືກຕ້ອງຕາມແນວທາງນະໂຍບາຍຂອງພັກ-ລັດ ແລະ ເອົາໃຈໃສ່ເປັນເສນາທິການໃຫ້ກະຊວງໃນການກວດກາ ຕິດຕາມ ຊຸກຍູ້ສົ່ງເສີມ ການແກ້ໄຂບັນຫາຢາເສບຕິດ ແລະ ປະກົດການຫຍໍ້ທໍ້ໃນຂະແໜງການສຶກສາທິການ ແລະ ກິລາ ສໍາຄັນແມ່ນການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ 2021-2023; ໃຫ້ສືບຕໍ່ຜັນຂະຫຍາຍການສ້າງກົມກອງ ແລະ ສະຖານການສຶກສາປອດຢາເສບຕິດ ໃນແຕ່ລະຊັ້ນແຕ່ລະສາຍຮັບປະກັນໃຫ້ໄດ້ທັງປະລິມານ ແລະ ຄຸນນະພາບ.
ຂ່າວໂດຍ: ສົງການ ພັນແພງດີ
