ຂ່າວຕ່າງປະເທດລາຍງານ ເມື່ອວັນທີ 30 ມີນາຜ່ານມາ, ກອງປະຊຸມສະມັດຊາສະຫະປະຊາຊາດ (UNGA) ຊຶ່ງມີສະມາຊິກ 193 ປະເທດ ໄດ້ມີມະຕິສຽງຂ້າງຫຼາຍຮັບຮອງມະຕິ ຊຶ່ງສະເໜີໂດຍ 18 ປະເທດ ນຳໂດຍປະເທດວານູອາຕູໃນການຂໍໃຫ້ສານຍຸຕິທຳສາກົນ (ICJ) ຫຼື ສານໂລກ ເປັນຜູ້ບັນຍັດພັນທະກໍລະນີສາກົນໃນການຕໍ່ສູ້ກັບວິກິດສິ່ງແວດລ້ອມ ເພື່ອໃຫ້ເປັນບັນທັດຖານດຽວກັນ.
ທ່ານ ອິຊະມາເອວ ເຄົາຊາເຄົາ ນາຍົກລັດຖະມົນຕີວານູອາຕູ ຊຶ່ງເປັນຜູ້ນຳໃນການເຄື່ອນໄຫວເລື່ອງນີ້ມາຫຼາຍກວ່າ 4 ປີ ໄດ້ສະແດງຄວາມຍິນດີຕໍ່ການຜ່ານມະຕິຂອງ UNGA ຄືຈຸດເລີ່ມຕົ້ນຂອງຮາກຖານ ແລະ ການດຳເນີນງານທາງບວກໃນການກວດສອບບັນຫາກ່ຽວກັບການປ່ຽນແປງຂອງສະພາບອາກາດໂລກ ແລະ ການປົກປ້ອງສິ່ງແວດລ້ອມ ເພື່ອຄົນຮຸ່ນໃໝ່. ເຖິງແມ່ນວ່າ ມະຕິຂອງສານໂລກໃນເລື່ອງດັ່ງກ່າວບໍ່ຖືວ່າມີຜົນຜູກພັນໃນທາງກົດໝາຍສາກົນ ເນື່ອງຈາກເປັນພຽງການໃຫ້ຄຳແນະນຳໂດຍຫຼັກການ ເຖິງຢ່າງໃດກໍຕາມ, ທຸກຝ່າຍເຊື່ອວ່າ ການໃຫ້ຄວາມເຫັນຂອງສານໂລກຈະສາມາດເປັນພື້ນຖານຂອງການເຈລະຈາທີ່ກ່ຽວຂ້ອງກັບສິ່ງແວດລ້ອມໃນອະນາຄົດ. ອີກຢ່າງໜຶ່ງ, ການດຳເນີນງານຂອງສານໂລກອາດຈະໃຊ້ເວລາດົນເຖິງ 18 ເດືອນ ແລະ ໜຶ່ງໃນບັນຫາຫຼັກທີ່ UNGA ຂໍຄວາມເຫັນຄື ການໃຫ້ສານໂລກສະແດງທັດສະນະກ່ຽວກັບເງື່ອນໄຂທາງການເງິນໃນການສະໜັບສະໜູນແຜນການຕໍ່ສູ້ກັບຄວາມປ່ຽນແປງດ້ານສິ່ງແວດລ້ອມຕາມແນວທາງຂໍ້ຕົກລົງປາຣີ ເພື່ອກຳນົດໃຫ້ອຸນຫະພູມໂລກເພີ່ມຂຶ້ນບໍ່ຫຼາຍກວ່າ 1,5 ອົງສາພາຍໃນປີ 2030.
