ຕາມຂ່າວຈາກວິທະຍຸສາກົນແຫ່ງ ສປ ຈີນ, ກຸ່ມນັກທ່ອງທ່ຽວຈີນ ຈຳນວນ 120 ຄົນໄດ້ເດີນທາງໄປຮອດຫວຽດນາມ ໃນວັນທີ 15 ມີນານີ້, ກາຍເປັນກຸ່ມ ນັກທ່ອງທ່ຽວຈີນ ທີ່ເດີນທາງ ໄປຮອດ ຫວຽດນາມ ໂດຍຜ່ານດ່ານ ທາງບົກ ຊຸດທຳອິດ ພາຍຫລັງ ຈີນໄດ້ທົດລອງ ຟື້ນຟູ ການອອກໄປທ່ຽວ ຢູ່ຕ່າງປະເທດ ແບບເປັນກຸ່ມ.
ໃນດ່ານສາກົນ ມິດຕະພາບ ແຂວງລາງເຊີນ ຂອງຫວຽດນາມ ມີຍິງສາວຫວຽດນາມ ພວມໃສ່ໝວກໄມ້ໄຜ່ ແລະ ນຸ່ງຊຸດຍາວ ໄດ້ມອບດອກໄມ້ໃຫ້ແກ່ນັກທ່ອງທ່ຽວຈີນ, ມວນຊົນທ້ອງຖິ່ນ ໄດ້ຈັດການສະແດງ ເຊີດສິງໂຕ ເພື່ອຕ້ອນຮັບ ນັກທ່ອງທ່ຽວຈີນ ຢ່າງຄືກຄື້ນ.ຈາກນັ້ນ ທ່ານ ຫາ ວານ ສຽວ, ຮອງຫົວໜ້າກົມ ການທ່ອງທ່ຽວ ກະຊວງວັດທະນະທຳ ກິລາ ແລະ ການທ່ອງທ່ຽວຫວຽດນາມ ໃຫ້ສຳພາດຕໍ່ນັກຂ່າວວ່າ: ການຮ່ວມມື ດ້ານການທ່ອງທ່ຽວ ແມ່ນຂົງເຂດ ທີ່ສຳຄັນ ໃນການຮ່ວມມື ລະຫວ່າງຫວຽດນາມ-ຈີນ. ຂະແໜງ ການທ່ອງທ່ຽວ ແມ່ນເສົາຄ້ຳ ທີ່ສຳຄັນ ດ້ານເສດຖະກິດ ຂອງຫວຽດນາມ, ການກັບຄືນມາ ຂອງນັກທ່ອງທ່ຽວຈີນ ຈະທຸ້ມເທ ກຳລັງແຮງ ຢ່າງເຂັ້ມແຂງ ເຂົ້າໃນ ການຟື້ນຟູ ເສດຖະກິດ ຂອງຫວຽດນາມ./.
(ບັນນາທິການຂ່າວ: ຕ່າງປະເທດ),
ຮຽບຮຽງຂ່າວໂດຍ: ສະໄຫວ ລາດປາກດີ
