ຕາມຂ່າວຈາກ PortVila ວັນທີ 3 ມີນານີ້ ວານູອາຕູ ປະເທດໃນມະຫາສະໝຸດປາຊີຟິກ ປະກາດສະຖານະການສຸກເສີນໄພພິບັດທາງທຳມະຊາດ ຫລັງຈາກຜະເຊີນກັບແຜ່ນດິນໄວຂະໜາດ 6,5 ຣິກເຕີ ແລະ ພາຍຸໄຊໂຄຣນ ພັດເຂົ້າຫລາຍຄັ້ງດ້ວຍຄວາມແຮງລົມສູງສຸດ 200 ກິໂລແມັດຕໍ່ຊົ່ວໂມງ ເຮັດໃຫ້ເຮືອນປະຊາຊົນໄດ້ຮັບຄວາມເສຍຫາຍຢ່າງໜັກ ແລະ ຕົ້ນໄມ້ຫັກລົ້ມຂີດຂວາງເສັ້ນທາງ ລວມທັງທັບໃສ່ສິ່ງກໍ່ສ້າງໄດ້ຮັບຄວາມເສຍຫາຍເປັນບໍລິເວນກວ້າງ.
ດັ່ງນັ້ນ ຄະນະລັດຖະມົນຕີ ໄດ້ຕັດສິນໃຈປະກາດສະຖານະການສຸກເສີນເພື່ອໃຫ້ການຊ່ວຍເຫລືອຜູ້ໄດ້ຮັບຜົນກະທົບຢ່າງຮີບດ່ວນ. ວານູອາຕູ ມີປະຊາກອນ ປະມານ 320.000 ຄົນ ແລະ ເປັນປະເທດສ່ຽງໄພຫລາຍທີ່ສຸດ ກ່ຽວກັບໄພພິບັດທາງທຳມະຊາດ.
(ບັນນາທິການຂ່າວ: ຕ່າງປະເທດ)
ຮຽບຮຽງຂ່າວໂດຍ: ສະໄຫວ ລາດປາກດີ
