ຕາມຂ່າວຈາກຕວັກກີ, ສະຫະພັນທຸລະກິດ ແລະ ວິສາຫະກິດຕວັກກີ ອອກລາຍງານວ່າ: ເຫດແຜ່ນດິນໄຫວຄັ້ງໃຫຍ່ສຸດໃນຮອບ 100ປີ ຂອງຕວັກກີ ສ້າງຄວາມເສຍຫາຍຕໍ່ປະເທດ ຄິດເປັນມູນຄ່າຫລາຍກວ່າ 84 ຕື້ໂດລາສະຫະລັດ.
ປັດຈຸບັນ ຄວາມເສຍຫາຍຈາກແຜ່ນດິນໄຫວຈະເຮັດໃຫ້ລັດຖະບານຕວັກກີ ມີຄ່າໃຊ້ຈ່າຍໃນການສ້ອມແປງເຮືອນປະຊາຊົນ ແລະ ຟື້ນຟູພື້ນຖານໂຄງລ່າງຂອງປະເທດຫລາຍກວ່າ 70 ຕື້ໂດລາສະຫະລັດ. ຂະນະທີ່ສົ່ງຜົນໃຫ້ປະເທດສູນເສຍລາຍຮັບ ປະມານ 10,4 ຕື້ໂດລາສະຫະລັດ ແລະ ສູນເສຍວັນເຮັດວຽກຄິດເປັນມູນຄ່າ 2,9 ຕື້ໂດລາສະຫະລັດ ສົ່ງຜົນກະທົບຕໍ່ 10 ແຂວງ ຂອງຕວັກກີ ທີ່ມີປະຊາກອນອາໄສຢູ່ 13,4 ລ້ານຄົນກວມເອົາ 15% ຂອງປະຊາຊົນທັງໝົດຂອງປະເທດ ແລະ ລວມຍອດຜະລິດຕະພັນພາຍໃນປະເທດ 10% ຂອງຈຳນວນທັ້ງໝົດ. ສຳລັບຕົວເລກຜູ້ເສຍຊີວິດຫລ້າສຸດເພີ່ມຂຶ້ນເກືອບ 40.000 ຄົນ ໃນນີ້ເສຍຊີວິດໃນຕວັກກີ ເກືອບ 30.000 ຄົນ.
ປັດຈຸບັນມີເຈົ້າໜ້າທີ່ກູ້ໄພໃນຕວັກກີ ຈຳນວນ 34.717 ຄົນ ແລະ ເຈົ້າໜ້າທີ່ ຈຳນວນ 9.595 ຄົນ ຈາກ 74 ປະເທດ ຍັງຄົງເລັ່ງຄົ້ນຫາຜູ້ເຄາະຮ້າຍຢ່າງຕໍ່ເນື່ອງ.
(ບັນນາທິການຂ່າວ: ຕ່າງປະເທດ)
ຮຽບຮຽງຂ່າວໂດຍ: ສະໄຫວ ລາດປາກດີ
