ຂ່າວຕ່າງປະເທດລາຍງານ ເມື່ອທ້າຍອາທິດທີ່ຜ່ານມາ, ອົງການພະລັງງານສາກົນ (IEA) ລະບຸວ່າ ໂລກກຳລັງເຂົ້າສູ່ຍຸກອຸດສາຫະກຳໃໝ່ຂອງການຜະລິດເຕັກໂນໂລຊີພະລັງງານສະອາດ ຊຶ່ງຈະມີມູນຄ່າເພີ່ມຂຶ້ນ 3 ເທົ່າພາຍໃນປີ 2030 ແລະ ສ້າງງານຫຼາຍລ້ານຕຳແໜ່ງ.
IEA ໄດ້ເປີດເຜີຍບົດລາຍງານໂດຍຄາດຄະເນວ່າ ຕະຫຼາດໂລກຂອງເຕັກໂນໂລຊີການຜະລິດຈຳນວນຫຼາຍທີ່ສຳຄັນບໍ່ວ່າຈະເປັນແຜງໂຊຣ່າເຊວ, ກັງຫັນລົມ, ແບັດເຕີຣີ, ລົດໄຟຟ້າ, ປ້ຳຄວາມຮ້ອນ ແລະ ເອເລັກໂຕຣໄລເຊີ (Electrolyzer) ສຳລັບການແຍກໄຮໂດຣເຈນ ຈະມີມູນຄ່າປະມານ 650.000 ລ້ານໂດລາ ພາຍໃນທ້າຍສະຕະວັດນີ້. ເຖິງແມ່ນວ່າໂຕເລກຂ້າງເທິງຈະສູງກວ່າລະດັບໃນປັດຈຸບັນເກີນ 3 ເທົ່າ ແຕ່ມັນມີເງື່ອນໄຂວ່າ ປະເທດຕ່າງໆຕ້ອງປະຕິບັດຕາມຂໍ້ສັນຍາດ້ານພະລັງງານສະອາດ ແລະ ສະພາບອາກາດຢ່າງເຕັມທີ່ ສ່ວນວຽກທີ່ກ່ຽວຂ້ອງໃນການຜະລິດພະລັງງານສະອາດຈະເພີ່ມຂຶ້ນຫຼາຍກວ່າ 2 ເທົ່າ ຈາກ 6 ລ້ານຕຳແໜ່ງເປັນເກືອບ 14 ລ້ານຕຳແໜ່ງ ພາຍໃນປີ 2030. ເຖິງຢ່າງໃດກໍຕາມ, IEA ກ່າວເຕືອນວ່າ ການໃຫ້ຄວາມສົນໃຈຫຼາຍໃນການສະກັດກັ້ນຊັບພະຍາກອນ ແລະ ການຜະລິດສາມາດກໍ່ໃຫ້ເກີດຄວາມສ່ຽງຕໍ່ຕ່ອງໂຊ້ການສະໜອງ ເນື່ອງຈາກຄວາມສັບສົນໃນຕ້ອງໂຊ້ການສະໜອງເຮັດໃຫ້ການປ່ຽນຜ່ານພະລັງງານເປັນໄປຢ່າງຍາກລຳບາກ ແລະ ມີລາຄາສູງຂຶ້ນ.
ທ່ານ ຟາທີ ບິຣອນ ປະທານກຳມະການບໍລິຫານຂອງ IEA ໄດ້ຮຽກຮ້ອງໃຫ້ປະເທດຕ່າງໆກະຈາຍຕ່ອງໂຊ້ການສະໜອງ. ນອກຈາກນີ້, ທ່ານ ບິຣອນ ຍັງເນັ້ນເຖິງຄວາມສຳຄັນຂອງການຮ່ວມມືສາກົນ ເນື່ອງຈາກບໍ່ມີປະເທດໃດເປັນແຫຼ່ງພະລັງງານ ແລະ ການປ່ຽນຜ່ານພະລັງງານຈະມີຄ່າໃຊ້ຈ່າຍທີ່ສູງຂຶ້ນ ແລະ ຈະດຳເນີນໄດ້ຊ້າກວ່າເກົ່າ ຖ້າຫາກຫຼາຍປະເທດບໍ່ເຮັດວຽກຮ່ວມກັນ.
