ວິທະຍຸກະຈາຍສຽງຫວຽດນາມລາຍງານວ່າ: ບົດລາຍງານຂອງ ກະຊວງອຸດສາຫະກຳ ແລະ ການຄ້າ ຫວຽດນາມ ໄດ້ສະແດງໃຫ້ເຫັນວ່າ: ວົງເງິນສົ່ງອອກສິນຄ້າໃນ 10 ເດືອນຕົ້ນປີ 2022 ບັນລຸເກືອບ 313 ຕື້ໂດລາ, ເພີ່ມຂຶ້ນເກືອບ 16% ເມື່ອທຽບໃສ່ໄລຍະດຽວກັນຂອງປີກາຍ. ໃນນັ້ນ, ການສົ່ງອອກໝວດສິນຄ້າອຸດສາຫະກຳປຸງແຕ່ງຍັງແມ່ນກຳລັງຊຸກຍູ້ໃນການເຕີບໂຕໃນການສົ່ງອອກລວມຂອງທົ່ວປະເທດ ໃນຂະນະທີ່ກວມອັດຕາສ່ວນ 86% ຍອດມູນຄ່າການສົ່ງອອກ; ການສົ່ງອອກໝວດສິນຄ້າຜະລິດຕະພັນກະເສດ, ເຄື່ອງປ່າຂອງດົງ, ສິນໃນນ້ຳກວມເອົາ 8,2%; ໝວດສິນຄ້າເຊື້ອໄຟ ແລະ ຊັບພະຍາກອນບໍ່ແຮ່ ກວມເອົາ 1,2%. ອາເມຣິກາ ແມ່ນຕະຫຼາດສົ່ງອອກໃຫຍ່ທີ່ສຸດຂອງ ຫວຽດນາມ ດ້ວຍວົງເງິນສົ່ງອອກຄາດວ່າບັນລຸ 93,4 ຕື້ໂດລາ, ເພີ່ມຂຶ້ນ 21,7% ເມື່ອທຽບໃສ່ໄລຍະດຽວກັນຂອງປີກາຍ; ອັນດັບທີສອງແມ່ນຕະຫຼາດຈີນ ດ້ວຍວົງເງິນສົ່ງອອກບັນລຸເກືອບ 47 ຕື້ໂດລາ; ຖັດຈາກນັ້ນແມ່ນຕະຫຼາດເອີຣົບ, ສະມາຄົມປະຊາຊາດອາຊີຕາເວັນອອກສ່ຽງໃຕ້ (ອາຊຽນ), ສ ເກົາຫຼີ ແລະ ຍີ່ປຸ່ນ.
