ໃນວັນທີິ 1 ພະຈິກ ຜ່ານມາ, ກອງບັນຊາການທະຫານນະຄອນຫຼວງວຽງຈັນ ໄດ້ຈັດຕັ້ງເຜີຍແຜ່ເຊື່ອມຊຶມມະຕິກອງປະຊຸມຄົບຄະນະຂອງຄະນະບໍລິຫານງານສູນກາງພັກ ຄັ້ງທີ 4 ສະໄໝທີ XI ແລະ ເອກະສານອົບຮົມ 2 ວາລະແຫ່ງຊາດ, ໂດຍການເປັນປະທານຂອງທ່ານ ພົນຈັດຕະວາ ໄພວັນ ຈັນທະພົມມາ ຫົວໜ້າການເມືອງ ກອງບັນຊາການທະຫານນະຄອນຫຼວງວຽງຈັນ ຊຶ່ງມີຄະນະພັກ-ຄະນະບັນຊາ, ພະນັກງານຫຼັກແຫຼ່ງ ຈາກອົງການ 5 ຫ້ອງ ແລະ ກົມກອງອ້ອມຂ້າງເຂົ້າຮ່ວມ.
ໃນໂອກາດດັ່ງກ່າວ ທ່ານພົນຈັດຕະວາ ໄພວັນ ຈັນທະພົມມາ ໄດ້ເຜີຍແຜ່ມະຕິກອງປະຊຸມຄົບຄະນະຂອງຄະນະບໍລິຫານງານສູນກາງພັກ ຄັ້ງທີ 4 ສະໄໝທີ XI ທີ່ໄດ້ລົງເລິກຄົ້ນຄວ້າ, ປຶກສາຫາລື ບັນດາຫົວຂໍ້ສະເພາະຕາມແຜນດຳເນີນງານຂອງຄະນະບໍລິຫານງານ ສະໄໝທີ XI ເປັນຕົ້ນ ການປະເມີນສະພາບແວດລ້ອມຢູ່ພາກພື້ນ, ສາກົນໃນປັດຈຸບັນ ແລະ ຄາດຄະເນທ່າຂະຫຍາຍໃນຕໍ່ ໜ້າ, ຕີລາຄາຜົນຂອງການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ, ແຜນເງິນຕາຕົ້ນປີ 2022 ຕິດພັນກັບຜົນການຈັດຕັ້ງປະຕິບັດ 2 ວາລະແຫ່ງຊາດ, ການເສີມຂະຫຍາຍທ່າແຮງ, ຄວາມສາມາດບົ່ມຊ້ອນໃຫ້ກາຍເປັນເສດຖະກິດປາຍແຫຼມ, ການຊຸກຍູ້ສົ່ງເສີມຜູ້ປະກອບການທຸລະກິດຂະໜາດນ້ອຍ, ຂະໜາດກາງ ແລະ ຈຸນລະວິສາຫະກິດ ໃຫ້ມີຄວາມເຂັ້ມແຂງ, ການເພີ່ມທະວີການພັດທະນາຊັບພະຍາກອນມະນຸດໃຫ້ມີຄຸນນະພາບສູງ, ການປັບປຸງລະບົບການຈັດຕັ້ງ, ກົງຈັກ ແລະ ກົນໄກການເຄື່ອນໄຫວຂອງອົງການບໍລິຫານລັດ ຕາມທິດເຂັ້ມແຂງ ແລະ ມີປະສິດທິພາບ, ການຄົ້ນຄວ້າທິດສະດີ, ສະຫຼຸບພຶດຕິກຳໃຫ້ແກ່ການສ້າງປະຖົມປັດໄຈ ເພື່ອກ້າວຂຶ້ນສູ່ຈຸດໝາຍສັງຄົມນິຍົມ, ການກະກຽມດຳເນີນກອງປະຊຸມວຽກງານການເມືອງ-ແນວຄິດ ທົ່ວປະເທດຄັ້ງທີ V, ກອງປະຊຸມວຽກງານກໍ່ສ້າງຮາກຖານການເມືອງ, ວຽກງານພັດທະນາຊົນນະບົດ, ແກ້ໄຂຄວາມທຸກຍາກ, ວຽກງານສາມສ້າງ, ກອງປະຊຸມສະຫຼຸບຂະບວນການແຂ່ງຂັນຮັກຊາດ ແລະ ພັດທະນາ ແລະ ບັນດາວຽກງານຈຸດສຸມຂອງຄະນະບໍລິຫານງານສູນກາງພັກ ຕ້ອງນຳພາແຕ່ນີ້ຫາກອງປະຊຸມຄົບຄະນະບໍລິຫານງານສູນກາງ ຄັ້ງທີ V ສະໄໝທີ XI, ພ້ອມກັນນີ້ ທ່ານ ພັນໂທ ດາວບິນ ເລີດລີວັນ ຮອງຫົວໜ້າຫ້ອງການເມືອງ ທະຫານນະຄອນຫຼວງວຽງຈັນ ຍັງໄດ້ຂຶ້ນເຜີຍແຜ່ເອກະສານ 2 ວາລະແຫ່ງຊາດ ເປັນຕົ້ນເອກະສານ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ເອກະສານ ວ່າດ້ວຍການແກ້ໄຂບັນຫາຢາເສບຕິດ.
ຈຸດປະສົງການເຜີຍແຜ່ໃນຄັ້ງນີ້ ກໍເພື່ອແນໃສ່ເຮັດໃຫ້ພະນັກງານ – ສະມາຊິກພັກ – ນັກຮົບທົ່ວກອງບັນຊາການທະຫານນະຄອນຫຼວງວຽງຈັນ ໄດ້ຮັບຮູ້ເຊື່ອມຊຶມກຳແໜ້ນຢ່າງເລິກເຊິ່ງຕໍ່ກັບບັນດາເນື້ອໃນເອກະສານດັ່ງກ່າວ ໂດຍສະເພາະບັນດາແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ມີຄວາມຈົງຮັກພັກດີຕໍ່ຊາດອັນສູງສົ່ງ, ມີສະຕິລະວັງຕົວສູງຕໍ່ກົນອຸບາຍມ້າງເພທຳລາຍຂອງສັດຕູ ແລະ ເຮັດສຳເລັດໜ້າທີ່ການເມືອງຂອງຕົນ, ທັງເປັນການປຸກລະດົມຊຸກຍູ້ທຸກພາກສ່ວນ ທຸກກຳລັງແຮງ ພາຍໃນກົມກອງເຂົ້າຮ່ວມຂະບວນການແຂ່ງຂັນສ້າງຜົນງານໃນການປັບປຸງກໍ່ສ້າງກົມກອງໃຫ້ມີຄວາມສະຫງົບ ພ້ອມທັງເຊີດຊູຄວາມຮັບຜິດຊອບທາງດ້ານການເມືອງ ແລະ ປັບປຸງແບບແຜນວິທີເຮັດວຽກຂອງພະນັກງານສະມາຊິກພັກ-ນັກຮົບ ໃຫ້ທັນສະໄໝ ແລະ ສູງຂຶ້ນເປັນກ້າວໆ.
ຂ່າວ-ພາບ: ແສງດາລາ ໄຊຍະລາດ
