ຂ່າວຕ່າງປະເທດລາຍງານ ເມື່ອທ້າຍອາທິດທີ່ຜ່ານມານີ້, ດັດຊະນີລາຄາຜູ້ບໍລິໂພກ (CPI) ໃນເຂດນະຄອນຫຼວງໂຕກຽວ ຊຶ່ງທຸກຝ່າຍໃຊ້ເປັນຄ່າພື້ນຖານສຳລັບດັດຊະນີ CPI ທົ່ວປະເທດ ໂດຍກວມເອົານ້ຳມັນເຊື້ອໄຟ ແຕ່ບໍ່ກວມລາຄາອາຫານທີ່ແປປ່ວນປະຈຳເດືອນຕຸລາ ເພີ່ມຂຶ້ນ 3,4% ເມື່ອທຽບກັບໄລຍະເວລາດຽວກັນຂອງປີທີ່ຜ່ານມາ ສູງກວ່າການຄາດຄະເນຂອງທຸກຝ່າຍ ແລະ ຖືວ່າເປັນສະຖິຕິການເພີ່ມຂຶ້ນຂອງດັດຊະນີ CPI ໃນລະດັບສູງສຸດນັບຕັ້ງແຕ່ປີ 1989.
ການເປີດເຜີຍດັດຊະນີດັ່ງກ່າວເກີດຂຶ້ນໃນເວລາດຽວກັນກັບການທີ່ທະນາຄານກາງຍີ່ປຸ່ນ (BOJ) ເປີດເຜີຍບົດລາຍງານວ່າ ຍັງຄົງຮັກສາອັດຕາດອກເບ້ຍພັນທະບັດໄລຍະສັ້ນໄວ້ທີ່ -0,1% ເນື່ອງຈາກ ເສດຖະກິດຂອງຍີ່ປຸ່ນຍັງຄົງຢູ່ໃນພາວະອ່ອນແອຢ່າງໜັກ ຈຶ່ງຈຳເປັນຕ້ອງມີການກະຕຸ້ນຄັ້ງໃຫຍ່ ແລະ ຕໍ່ເນື່ອງຕໍ່ໄປ, ອັດຕາເງິນເຟີ້ຂອງຍີ່ປຸ່ນຍັງຖືວ່າຕ່ຳຫຼາຍເມື່ອທຽບກັບປະເທດທີ່ພັດທະນາທາງດ້ານເສດຖະກິດແລ້ວອີກຫຼາຍແຫ່ງ. ເຖິງຢ່າງໃດກໍຕາມ, ໃນບົດລາຍງານສະບັບດຽວກັນ BOJ ໄດ້ຄາດຄະເນດັດຊະນີລາຄາຜູ້ບໍລິໂພກພື້ນຖານຈະເພີ່ມເປັນ 2,9% ໃນສົກປີງົບປະມານປັດຈຸບັນ ຊຶ່ງຈະສິ້ນສຸດລົງໃນເດືອນມີນາ 2023 ແລະ ຫຼຸດລົງມາຢູ່ທີ່ 1,6% ໃນສົກປີງົບປະມານຕໍ່ໄປ.
