ຂ່າວສານຊີອາໄອລາຍງານ ເມື່ອທ້າຍອາທິດທີ່ຜ່ານມານີ້, ອົງການອະນາໄມໂລກ (WHO) ໄດ້ປະກາດ “ບົດລາຍງານວັນນະໂຣກທົ່ວໂລກປີ 2022” ໂດຍຊີ້ອອກວ່າ: ໃນປີ 2021, ທົ່ວໂລກມີຜູ້ເປັນວັນນະໂຣກປະມານ 10.600.000 ຄົນ ເພີ່ມຂຶ້ນ 4,5% ເມື່ອທຽບກັບປີ 2020 ແລະ ມີ 1.600.000 ຄົນເສຍຊີວິດຍ້ອນວັນນະໂຣກ. ການແຜ່ລະບາດຂອງພະຍາດໂຄວິດ-19 ເຮັດໃຫ້ການບໍລິການຕໍ່ຜູ້ເປັນວັນນະໂຣກຢຸດສະງັກ, ສ່ວນການປະທະກັນຢ່າງຕໍ່ເນື່ອງຢູ່ເອີຣົບຕາເວັນອອກ, ອາຟຣິກາ ແລະ ເຂດຕາເວັນອອກກາງໄດ້ເຮັດໃຫ້ສະພາບການຂອງກຸ່ມຄົນທີ່ດ້ອຍໂອກາດຮ້າຍແຮງຂຶ້ນ.
ອົງການ WHO ຮຽກຮ້ອງໃຫ້ປະເທດຕ່າງໆນຳໃຊ້ມາດຕະການໂດຍດ່ວນ, ຟື້ນຟູການບໍລິການດ້ານສາທາລະນະສຸກຂັ້ນພື້ນຖານຕໍ່ຜູ້ເປັນວັນນະໂຣກ, ພ້ອມທັງເພີ່ມການລົງທຶນຕື່ມອີກ ແລະ ໃຫ້ພາກສ່ວນຕ່າງໆປະຕິບັດງານ ເພື່ອຕອບສະໜອງຄວາມຕ້ອງການຂອງວິທີການບົ່ງມະຕິພະຍາດໃໝ່, ສະໜອງຢາ ແລະ ວັກຊິນ.
