ຕາມຂ່າວຈາກ ໂຕກຽວ, ເມື່ອບໍ່ດົນມານີ້, ຫໍການຄ້າ ແລະ ອຸດສາຫະກຳຍີ່ປຸ່ນ(JCCI) ໄດ້ສຳຫລວດຄວາມຄິດເຫັນຂອງບໍລິສັດ ຂະໜາດນ້ອຍປະມານ 2.880ແຫ່ງ ໃນເດືອນກໍລະກົດ ແລະ ສິງຫາ ທີ່ຜ່ານມາ ໂດຍບໍລິສັດເກືອບ 65% ພວມຜະເຊີນ ບັນຫາຂາດແຄນແຮງງານຊຶ່ງເປັນຕົວເລກທີ່ໃກ້ຄຽງກັບ ສະຖິຕິ ສູງສຸດ 66,4%ໃນປີ2019 ຂະນະທີ່ ບໍລິສັດ ກໍ່ສ້າງ 77,6%, ບໍລິສັດ ຂົນສົ່ງ 76,6% ແລະ ພາກທຸລະກິດ ຮ້ານອາຫານ ແລະ ໂຮງແຮມ 70% ພວມຂາດແຄນ ແຮງງານ ເຊັ່ນກັນ.
ຕາມຜົນສຳຫລວດ ດັ່ງກ່າວ ຍັງຊີ້ີ້ໃຫ້ເຫັນວ່າ: ມີບໍລິສັດ ຫລາຍກວ່າ 45% ພະຍາຍາມປະກາດຮັບສະໝັກວຽກງານໃນກຸ່ມ ນັກສຶກສາຈົບໃໝ່ໃນຮອບປີງົບປະມານທີ່ຜ່ານມາເພື່ອໃຫ້ໄດ້ຈຳນວນແຮງງານຫລາຍທີ່ສຸດຕາມເປົ້າໝາຍທີ່ຕັ້ງໄວ້ແຕ່ກໍ່ມີບໍລິສັດ 34,6% ທີ່ລະບຸວ່າ: ບໍ່ສາມາດຫາແຮງງານຈົບໃໝ່ຕາມເປົ້າໝາຍທີ່ຕັ້ງໄວ້ ແລະ ມີ19,9% ລະບຸວ່າບໍ່ສາມາດຮັບນັກສຶກສາຈົບໃໝ່ໄດ້ແມ້ແຕ່ຄົນດຽວ.
ປັດຈຸບັນ ບໍລິສັດຂະໜາດນ້ອຍ-ກາງ ໃນຍີ່ປຸ່ນພວມຕົກຢູ່ໃນສະຖານະການຫຍຸ້ງຍາກລຳບາກເນື່ອງຈາກຂາດເງິນທຶນ ໃນການປັບຂຶ້ນຄ່າຈ້າງເພື່ອດຶງດູດ ແລະ ຮັກສາພະນັກງານເກົ່າໄວ້ໄດ້ເນື່ອງຈາກຜະເຊີນບັນຫາລາຄາວັດຖຸດິບເພີ່ມສູງຂຶ້ນຈົນກຳໄລຫລຸດລົງຫລາຍ.
Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)
