ຂ່າວຕ່າງປະເທດລາຍງານ ເມື່ອຕົ້ນອາທິດທີ່ຜ່ານມາ, ສ ເກົາຫຼີ ເປີດເຜີຍວ່າ ການສົ່ງອອກໃນເດືອນກັນຍາທີ່ຜ່ານມາຂະຫຍາຍຕົວໃນອັດຕາຕ່ຳທີ່ສຸດໃນຮອບເກືອບ 2 ປີ ເນື່ອງຈາກຄວາມຕ້ອງການທົ່ວໂລກຫຼຸດລົງ ສ້າງແຮງກົດດັນຕໍ່ເສດຖະກິດຂອງ ສ ເກົາຫຼີ ຊຶ່ງຕ້ອງອາໄສການຄ້າ.
ໂດຍການສົ່ງອອກຂອງ ສ ເກົາຫຼີ ຂະຫຍາຍຕົວ 2,8% ຕ່ຳກວ່າທີ່ນັກວິເຄາະໄດ້ຄາດຄະເນໄວ້ທີ່ 2,9% ແລະ ເປັນອັດຕາການຂະຫຍາຍຕົວຕ່ຳທີ່ສຸດນັບຕັ້ງແຕ່ເດືອນຕຸລາ 2020 ຊຶ່ງການສົ່ງອອກຂອງ ສ ເກົາຫຼີ ຫຼຸດລົງຕັ້ງແຕ່ເດືອນມິຖຸນາທີ່ຜ່ານມາ ຂະນະທີ່ການຫຼຸດລົງຂອງເສດຖະກິດອາເມຣິກາ, ເອີຣົບ ແລະ ຈີນ ສົ່ງຜົນໃຫ້ຄວາມຕ້ອງການສິນຄ້າຂອງ ສ ເກົາຫຼີ ຫຼຸດລົງ. ໂດຍຂໍ້ມູນການສົ່ງອອກຂອງ ສ ເກົາຫຼີ ເປັນໂຕຊີ້ວັດພາວະການຄ້າໂລກ ເນື່ອງຈາກຜູ້ຜະລິດຊິບ (Chip) ໄປຈົນເຖິງຍານພາຫະນະຂອງ ສ ເກົາຫຼີ ນັ້ນນຳເຂົ້າວັດຖຸດິບ ແລະ ອຸປະກອນສ່ວນປະກອບຈຳນວນຫຼາຍ ຊຶ່ງຄວບຄຸມຕ່ອງໂສ້ການສະໜອງຂອງໂລກໃນວົງກວ້າງ.
ສ່ວນການນຳເຂົ້າຂອງ ສ ເກົາຫຼີ ເພີ່ມຂຶ້ນ 18,6% ໃນເດືອນກັນຍາ ສູງກວ່າໂຕເລກການຄາດຄະເນທີ່ 16,4% ແຕ່ຫຼຸດລົງຈາກ 28,2% ໃນເດືອນສິງຫາ ຊຶ່ງສົ່ງຜົນໃຫ້ ສ ເກົາຫຼີ ຂາດດູນການຄ້າ 3,77 ພັນລ້ານໂດລາ ຖືວ່າເປັນການຂາດດູນການຄ້າເປັນເດືອນທີ 6 ຕິດຕໍ່ກັນ.
