ຫຼາຍສະໂມສອນໃນເອີຣົບ ຮ່ວມສະແດງຄວາມເສຍໃຈກັບເຫດຈະລາຈົນທີ່ເກີດຂຶ້ນໃນອິນໂດເນເຊຍ ຈົນເຮັດໃຫ້ກອງເຊຍບານເຕະເສຍຊີວິດຢ່າງໜ້ອຍ 174 ຄົນ
ເຫດຈະລາຈົນ ເກີດຂຶ້ນທີ່ສະໜາມກີລາ ກັນຈູຣູຮັນ ຫຼັງຈາກ ເປີເຊີບາຢາ ຊູຣາບາຢ່າ ເອົາຊະນະ ອາເຣມາ ດ້ວຍປະຕູ 3-2.
ກອງເຊຍບານບຸກລົງສະໜາມຫຼັງຈົບເກມດັ່ງກ່າວ ຂະນະທີ່ນັກເຕະຍັງບໍ່ໄດ້ເດີນທາງອອກໄປ ຊຶ່ງເຮັດໃຫ້ຝ່າຍຮັກສາຄວາມປອດໄພຕ້ອງເຂົ້າຄວບຄຸມສະຖານະການ.
ສື່ມວນຊົນທ້ອງຖິ່ນລາຍງານວ່າ ມີການປະທະກັນລະຫວ່າງຝ່າຍຮັກສາຄວາມປອດໄພ ກັບກອງເຊຍບານໃນສະໜາມ ທີ່ນໍາມາສູ່ການໃຊ້ແກັສນ້ຳຕາເພື່ອລະງັບເຫດ.
ນັ້ນເຮັດໃຫ້ກອງເຊຍບານຈໍານວນຫຼາຍ ຖືກພາຕົວສົ່ງໄປໂຮງໝໍ ຫຼັງມີການຢຽບກັນເກີດຂຶ້ນ ເຊິ່ງຂະນະນີ້ ມີລາຍງານຜູ້ເາຍຊີວິດແລ້ວບໍ່ຕໍ່າກວ່າ 174 ສົບ.
ຫຼາຍສະໂມສອນໃນເອີຣົບ ເລີ່ມອອກມາສະແດງຄວາມເສຍໃຈກັບເຫດການນີ້ ໂດຍທີມດັງຈາກ ພຣີເມຍລີກ ຢ່າງ ລິເວີພູລ, ແມນເຊັສເຕີ ຢູໄນເຕັດ, ແມນເຊັສເຕີ ຊິຕີ, ອາເຊນອນ, ເຊວຊີ, ທັອດແນມ ຮັອດສະເປີ ລວມເຖິງທີມດັງຈາກແອັດສະປາຍຢ່າງ ບາເຊໂລນາ ຕ່າງກໍໂພສລົງໃນສື່ສັງຄົມອອນລາຍ.
ເຫດການດັ່ງກ່າວ ເຮັດໃຫ້ການແຂ່ງຂັນບານເຕະລີກອິນໂດເນເຊຍໃນອາທິດນີ້ຖືກເລື່ອນອອກໄປ ແຕ່ປະທານາທິບໍດີອິນໂດເນເຊຍ ທ່ານ ໂຈໂຄ ວິໂດໂດ ໄດ້ສັ່ງການໃຫ້ໂຈະການແຂ່ງຂັນທັງໝົດ ຈົນກ່ວາການສອບສວນຈະສິ້ນສຸດລົງ ໂດຍ ອາເຣມາ ຈະຖືກຫ້າມບໍ່ໃຫ້ເປັນເຈົ້າພາບໄປຕະຫຼອດລະດູການດ້ວຍ.
ທັງນີ້ ຂໍ້ກໍານົດຂອງ FIFA ລະບຸວ່າ ຝ່າຍຮັກສາຄວາມປອດໄພຕ້ອງຫ້າມບໍ່ໃຫ້ພົກພາ ຫຼື ໃຊ້ແກັສນ້ຳຕາໃນເວລາປະຕິບັດໜ້າທີ່.
