ເປີດການແຂ່ງຂັນກິລາເທຄວັນໂດ ອ້ອມຂ້າງສູນກາງ ຊີງຂັນ ທ່ານເຈົ້າຄອງນະຄອນຫຼວງວຽງຈັນ ຄັ້ງທີ III ປະຈໍາປີ 2022 ຂຶ້ນຢ່າງເປັນທາງການໃນຕອນເຊົ້າວັນທີ 1 ຕຸລາ 2022 ເພື່ອເປັນການທົດສອບການກຽມຄວາມພ້ອມຂອງແຕ່ລະພາກສ່ວນ ກຽມເຂົ້າຮ່ວມງານກິລາ ຊຽງຂວາງ ເກມ ຄັ້ງທີ 11 ໃນຕົ້ນເດືອນພະຈິກນີ້.
ການແຂ່ງຂັນລາຍການດັ່ງກ່າວ ດຳເນີນເປັນເວລາ 2 ວັນ ລະຫວ່າງວັນທີ 1-2 ຕຸລາ 2022 ທີ່ສູນການຄ້າໄອເຕັກ ຊັ້ນ 4 ເມືອງໄຊເຊດຖາ ນະຄອນຫຼວງວຽງຈັນ ໂດຍໃຫ້ກຽດເຂົ້າຮ່ວມຂອງ ທ່ານ ນາງ ຂັນທະລີ ສີຣິພົງພັນ ຮອງລັດຖະມົນຕີ ກະຊວງສຶກສາທິການ ແລະ ກິລາ ແລະ ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ ທັງເປັນປະທານສະຫະພັນກິລາເທຄວັນໂດແຫ່ງຊາດລາວ ລວມເຖິງແຂກທີ່ມີກຽດ, ຄູຝຶກ ແລະ ນັກກິລາເຂົ້າຮ່ວມຢ່າງພ້ອມພຽງ.
ໂອກາດນີ້, ທ່ານ ຈັນທະວົງ ປັນຍາສິລິ ເລຂາທິການ ສະຫະພັນເທຄວັນໂດແຫ່ງຊາດລາວ ລາຍງານວ່າ: ການຈັດການແຂ່ງຂັນຄັ້ງນີ້ ແມ່ນເພື່ອຂ່ຳນັບຮັບຕ້ອນວັນຄູແຫ່ງຊາດ ແລະ ສົ່ງເສີມໃຫ້ເຍົາວະຊົນ, ຊາວໜຸ່ມໄດ້ມີການເຄື່ອນໄຫວຝຶກແອບ ແລະ ແຂ່ງຂັນລະຫວ່າງສະໂມສອນໃນຂອບເຂດທົ່ວປະເທດ ອີກປະການໜຶ່ງກໍເປັນກາກິດຈະກໍາ ກ່ອນເຂົ້າຮ່ວມງານມະຫະກໍາກິລາແຫ່ງຊາດ ຄັ້ງທີ 11 ທີ່ແຂວງຊຽງຂວາງ ເປັນເຈົ້າພາບໃນທ້າຍປີນີ້ອີກດ້ວຍ. ດັ່ງນັ້ນ ສະຫະພັນເທຄວັນໂດແຫ່ງຊາດລາວ ຈຶ່ງໄດ້ຈັດການແຂ່ງຂັນຄັ້ງນີ້ຂຶ້ນມາໂດຍມີການຊີງໄຊໃນຮຸ່ນອະນຸຊົນ, ເຍົາວະຊົນ, ຊາວໜຸ່ມ ທັງປະເພດຟ້ອນ ແລະ ປະເພດຕໍ່ສູ້ ລວມທັງໝົດມີ 74 ລາຍການ ໂດຍມີນັກກິລາຈາກຫຼາຍໆສະໂມສອນ ແລະ ຫຼາຍແຂວງເຂົ້າຮ່ວມເຖິງ 311 ຄົນ (ຍິງ 51 ຄົນ).
ຂະນະດຽວກັນ, ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ ທັງເປັນປະທານສະຫະພັນກິລາເທຄວັນໂດແຫ່ງຊາດລາວ ກ່າວວ່າ: ຂໍຍ້ອງຍໍຊົມເຊີຍຄະນະຄູຝຶກນັກກິລາເທຄວັນໂດທຸກສະໂມສອນໃນທົ່ວປະເທດ ທີ່ພະຍາຍາມເຂົ້າຮ່ວມແຂ່ງຂັນແບບອອນລາຍໄດ້ຢ່າງຫຼວງຫຼາຍ ຊຶ່ງເປັນບາດກ້າວສໍາຄັນໃນການພັດທະນາກິລາເທຄວັນໂດລາວ ເຖິງວ່າພວກເຮົາຈະໃນການເຝົ້າ ລະວັງ ແລະ ປ້ອງກັນ ການແຜ່ລະບາດຂອງພະຍາດໂຄວິດ -19 ທາງສະຫະພັນ ຮ່ວມກັບ ຜູ້ໃຫ້ການອຸປະຖໍາກໍໄດ້ສ້າງກິດຈະກໍາ ທີ່ດີ ເພື່ອໃຫ້ນັກກິລາທັງເຍົາວະຊົນ-ຊາວໜຸ່ມໄດ້ມີການຝຶກແອບດ້ວຍຕົນເອງ ແລະ ຮ່ວມກິດຈະກໍາແຂ່ງຂັນທີ່ທາງສະຫະພັນ ກິລາເທຄວັນໂດໄດ້ຈັດຂຶ້ນ.
ຂ່າວໂດຍ: ສົງການ ພັນແພງດີ
