ແຫລ່ງຂ່າວຈາກເມືອງຄອບ ແຂວງໄຊຍະບູລີ ໃຫ້ຮູ້ວ່າ: ເມືອງຄອບ ຈັດພິທີປາຖະກະຖາ ສະເຫລີມສະຫລອງວັນຄົນພິການແຫ່ງຊາດ ຄົບຮອບ 30ປີ ແລະ ວັນຜູ້ອາຍຸສູງ ສາກົນ ຄົບຮອບ 23 ປີ ໃນວັນທີ 30 ກັນຍາ ຜ່ານມາ ໂດຍການປາຖະກະຖາຂອງ ທ່ານ ສະໝັກ ລິດສະຖານ ຮອງເຈົ້າເມືອງໆຄອບ, ຜູ້ຊິ້ນໍາຂົງເຂດວັດທະນະທຳສັງຄົມ, ມີຫົວໜ້າ-ຮອງຫົວໜ້າຫ້ອງການ, ພະນັກງານອາວຸໂສບໍານານ ແລະ ປະຊາຊົນພາຍໃນ 4 ບ້ານເທສະບານເຂົ້າຮ່ວມ ຮັບຟັງ.
ໂອກາດນີ້, ທ່ານ ສະໝັກ ລິດສະຖານ ໄດ້ເລົ່າມູນເຊື້ອ, ປະຫວັດຄວາມເປັນມາຂອງວັນສໍາຄັນວ່າ: ສອງວັນດັງກ່າວ ແມ່ນມີຄວາມໝາຍ ຄວາມສໍາຄັນ ສໍາລັບຄົນພິການ ແລະ ຜູ້ອາຍຸສູງ, ປັດຈຸບັນ ໃນທົ່ວໂລກ ຍັງມີຄົນພິການຫລາຍກ່ວາ 1 ຕື້ຄົນ ເທົ່າກັບ 15% ຂອງປະຊາກອນໂລກ ທີ່ດໍາລົງຊີວິດຢູ່ກັບຄວາມເປັນພິການ ແລະ ມີຜູ້ອາຍຸສູງ 60 ປີ ຂຶ້ນໄປປະມານ 600 ລ້ານຄົນ ໃນທົ່ວໂລກ ເຊິ່ງເພີ່ມຈໍານວນຂຶ້ນເທົ່າຕົວໃນປີ 2025 ເຂົາເຈົ້າເຫລົ່ານັ້ນ ປະເຊີນກັບສິ່ງກີດຂວາງຕ່າງໆ ເນື່ອງຈາກໂຄງການຂອງສັງຄົມ, ການພັດທະນາເສດຖະກິດ, ທັດສະນະຄະຕິ, ການມີສ່ວນຮ່ວມ ແລະ ຄວາມສະເໝີພາບ ຢູ່ໃນຄອບຄົວ ແລະ ສັງຄົມ ເປັນຕົ້ນ ບັນຫາການເຂົ້າເຖິງວຽກງານການສຶກສາ, ການປິ່ນປົວ, ຟື້ນຟູສຸຂະພາບ, ການຝຶກວິຊາຊີບ, ການສະໜັບສະໜູນດ້ານນິຕິກໍາ ແລະ ເຊື່ອມໂຍງຄົນພິການ, ຄົນອາຍຸສູງ ເຂົ້າໃນຂວນການພັດທະນາ ຍັງບໍ່ທັນສູງ.
ສໍາລັບຢູ່ ສປປ ລາວເຮົາ ແມ່ນໄດ້ເອົາໃຈໃສ່ດໍາເນີນການຊ່ວຍເຫລືອ ແລະ ພັດທະນາມາໂດຍຕະຫລອດ ນັບແຕ່ສະໄໝຕໍ່ສູ້ປົດປ່ອຍຊາດ ປະຊາທິປະໄຕ ກໍຄື ໄລຍະປົກປັກຮັກສາ ແລະ ສ້າງສາພັດທະນາ ຊຶ່ງຍາມໃດພັກ ແລະ ລັດຖະບານ ກໍໄດ້ເປັນຫ່ວງເປັນໃຍ ຕໍ່ຊີວິດການເປັນຢູ່ຂອງປະຊາຊົນບັນດາເຜົ່າ ໂດຍສະເພາະຜູ້ເສຍອົງຄະ ແລະ ພິການ, ເດັກ ນ້ອຍ, ແມ່ຍິງ ແລະ ຜູ້ສູງອາຍຸ ໄດ້ຮັບການປົວແປງດີຂຶ້ນ.
ນອກຈາກນີ້, ລັດຖະບານ ຍັງໄດ້ອອກກົດໝາຍສໍາລັບຄົນພິການ, ດໍາລັດຂອງນາຍົກລັດຖະມົນຕີ ເພື່ອເປັນບ່ອນອີງໃຫ້ແກ່ລັດຖະບານໃນການຄົ້ນຄ້ວາ, ກໍານົດນະໂຍບາຍ ແລະ ລະບຽບ ກົດໝາຍ ແນໃສ່ປົກປ້ອງ ແລະ ສົ່ງເສີມສິດທິຂອງຄົນພິການ ແລະ ຜູ້ອາຍຸສູງ ອັນພົ້ນເດັ່ນແມ່ນການສ້າງກອງທຶນໝູນວຽນ ເພື່ອພັດທະນາຄຸນນະພາບຊີວິດຜູ້ອາຍຸສູງ ແລະ ສົ່ງເສີມກວດກາສຸຂະພາບ ຜູ້ອາຍຸສູງ ໂດຍບໍ່ເສຍຄ່າໃນແຕ່ລະປີ.
ຂ່າວ-ພາບ: ທອງແກ້ວ (ນັກຂ່າວເມືອງຄອບ)
Medialaos MMD
