ຕາມການລາຍງານ ຂອງຫ້ອງການແຮງງານ ແລະ ສະຫວັດດີການສັງຄົມ ກໍຄື ຄະນະຄຸ້ມຄອງໄພພິບັດນະຄອນປາກເຊ ແຂວງຈຳປາສັກ ໃນວັນທີ 29 ກັນຍາ 2022 ໃຫ້ຮູ້ວ່າ: ຈາກສະພາບພາຍຸໃຕ້ຝຸ່ນ ໂນຣູ ໄດ້ພັດຜ່ານ ເຮັດໃຫ້ຝົນຕົກໜັກ, ລົມພັດແຮງ ໃນວັນທີ 27-28 ກັນຍາ 2022 ໄດ້ເຮັດໃຫ້ມີສະພາບນໍ້າຖ້ວມຢູ່ບາງບ້ານຂອງນະຄອນປາກເຊ ເຂດໃນພື້ນທີ່ຕໍ່າ ແລະ ລຽບແຄມແມ່ນໍ້າ, ໃນນັ້ນ ບ້ານທີ່ຖືກນໍ້າຖ້ວມຫລາຍກ່ວາໝູ່ແມ່ນ ບ້ານນາແຫກ ນະຄອນປາກເຊ, ມີປະຊາຊົນໄດ້ຮັບຜົນກະທົບ 36 ຄອບຄົວ. ພ້ອມນີ້, ຍັງມີບ້ານທີ່ມີຄວາມສ່ຽງຈາກນໍ້າຖ້ວມ ເຊັ່ນ: ບ້ານໂພນກຸງ, ໂພນສະອາດ, ບ້ານແກ ເນື່ອງຈາກແມ່ນໍ້ເຊໂດນ, ນໍ້າຂອງ ຫຍື່ງຂຶ້ນສູງ, ປະຊາຊົນໃນເຂດດັ່ງດ່າວ ຕ້ອງໄດ້ເຝົ້າລະວັງຢ່າງໃກ້ຊິດ.
ປັດຈຸບັນ, ຄະນະພັກ-ອົງການປົກຄອງແຂວງຈໍາປາສັກ ໄດ້ຊີ້ນຳຄະນະຄຸມຄອງໄພພິບັດ ແຕ່ລະຂັ້ນລົງຕິດຕາມກວດກາ ແລະ ຊ່ວຍເຫລືອປະຊາຊົນ ໃນເຂດນໍ້າຖ້ວມ ແລະ ບ້ານທີ່ມີຄວາມສ່ຽງ, ພ້ອມທັງເລັ່ງມືໃນການກະກຽມຈັກສູບນໍ້າ ເພື່ອສູບນໍ້າອອກຈາກເຂດນໍ້າຖ້ວມຂັງເຊັ່ນ: ໄດ້ຕິດຕັ້ງລະບົບໄຟຟ້າ ແລະ ຈັກສູບນໍ້າ ເພື່ອລະບາຍນໍ້າອອກຈາກ ບ້ານໂພນສະອາດ, ບ້ານແກ ແລະ ກະກຽມໃນຈຸດປະຕູລະບາຍນໍ້າອື່ນໆ.
ຂະນະດຽວກັນ, ກົມອຸຕຸນິຍົມ ແລະ ອຸທົກກະສາດ ຍັງແຈ້ງເຕືອນ ໃຫ້ເຝົ້າລະວັງ ເນື່ອງຈາກນະຄອນປາກເຊ ແຂວງຈຳປາສັກ ຍັງມີປະລິມານນໍ້າໄຫລມາຈາກພາກກາງ, ພາກເໜືອ ເປັນຈໍານວນຫລາຍ ແລະ ຝົນຍັງຈະສືບຕໍ່ຕົກຈົນກວ່າພະຍຸ ໂນຣູ ຈະອ່ອນກຳລັງລົງໃນວັນວັນທີ 30 ກັນຍາ 2022 ນີ້.
ຂ່າວ: ເກດສະໜາ (ສຳນັກຂ່າວສານປະເທດລາວ)
Medialaos MMD
