ວັນທີ 21 ກັນຍາ 2022 , ທ່ານ ນາງ ປານີ ຢາທໍ່ຕູ້ ກຳມະການກົມການເມືອງສູນກາງພັກ, ຮອງປະທານປະເທດ ແຫ່ງ ສປປ ລາວ ພ້ອມຄະນະ ໄດ້ເຄື່ອນໄຫວຢ້ຽມຢາມ ແລະໂອ້ລົມພະນັກງານການນໍາຫຼັກແຫຼ່ງແຂວງເຊກອງ, ໂດຍມີ ທ່ານ ເຫຼັກໄຫຼ ສີວິໄລ ກຳມະການສູນກາງພັກ, ເລຂາພັກແຂວງ, ເຈົ້າແຂວງເຊກອງ ພ້ອມດ້ວຍຄະນະປະຈໍາພັກແຂວງ, ກຳມະການພັກແຂວງ, ພະນັກງານການນໍາຫຼັກແຫຼ່ງຂັ້ນແຂວງ, ເຈົ້າເມືອງທັງ 4 ເມືອງ, ການນໍາພະແນກການອ້ອມຂ້າງແຂວງເຂົ້າ ຮ່ວມຮັບຟັງຢ່າງພ້ອມພຽງ.
ທ່ານ ເຫຼັກໄຫຼ ສີວິໄລ ໄດ້ລາຍງານການຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ ຄັ້ງທີ XI ຂອງພັກ ໂດຍລົງເລິກກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະແຜນງົບປະມານປະຈໍາປີ 2022 ໂດຍສະເພາະ ການຜະລິດສິນຄ້າທົດແທນການນໍາເຂົ້າ ແລະການສົ່ງເສີມການຜະລິດສິນຄ້າສົ່ງ ອອກ, ການຄຸ້ມຄອງຮ້ານແລກປ່ຽນເງິນຕາ, ການແກ້ໄຂບັນຫາເງິນເຟີ້, ການຄຸ້ມຄອງລາຍຈ່າຍການລົງທຶນກໍ່ສ້າງພື້ນ ຖານໂຄງລ່າງ ເພື່ອແກ້ໄຂຄວາມຫຍຸ່ງຍາກຂອງປະຊາຊົນຢູ່ທ້ອງຖິ່ນ; ການຈັດຕັ້ງປະຕິບັດມະຕິຂອງສະພາແຫ່ງຊາດ: ການຜັນຂະຫຍາຍ 2 ວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະ ກິດ- ການເງິນ ໂດຍສະເພາະການຈັດເກັບລາຍຮັບ ແລະຄຸ້ມຄອງລາຍຈ່າຍງົບປະມານຂອງລັດ, ມາດຕະການປ້ອງກັນ ແລະສະກັດກັ້ນການແຜ່ລະບາດຂອງພະຍາດໂຄວິດ-19 ໂດຍສະເພາະແມ່ນການສັກວັກຊີນໃຫ້ເດັກນ້ອຍກຸ່ມເປົ້າໝາຍ.
ໂອກາດນີ້, ທ່ານ ນາງ ປານີ ຢາທໍ່ຕູ້ ໄດ້ໃຫ້ກຽດໂອ້ລົມຕໍ່ການນໍາຫຼັກແຫຼ່ງຂັ້ນແຂວງ-ຂັ້ນເມືອງ ຫລາຍບັນຫາ ຊຶ່ງທ່ານໄດ້ຮຽກຮ້ອງໃຫ້ອໍານາດການປົກຄອງທຸກຂັ້ນສືບຕໍ່ເຝົ້າລະວັງ, ຄວບຄຸມ, ປ້ອງກັນການແຜ່ລະບາດຂອງພະຍາດໂຄວິດ-19 ໂດຍສະເພາະການສັກວັກຊີນໃຫ້ກຸ່ມເປົ້າໝາຍ ໃຫ້ບັນລຸເປົ້າໝາຍ; ອຳນາດການປົກຄອງທຸກຂັ້ນ, ບັນດາພະແນກການ, ອົງການ ສືບຕໍ່ເອົາໃຈໃສ່ຈັດຕັ້ງປະຕິບັດ 2 ວາລະແຫ່ງຊາດ ເປັນຕົ້ນການແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດການເງິນ: 1. ເອົາໃຈໃສ່ຄຸ້ມ ຄອງລາຄາສິນຄ້າ ທີ່ຕິດພັນກັບຊີວິດການເປັນຢູ່ຂອງປະຊາຊົນ; 2. ເອົາໃຈໃສ່ຄຸ້ມ ຄອງອັດຕາແລກປ່ຽນເງິນຕາ ຢ່າງເຂັ້ມງວດ, 3. ເອົາໃຈໃສ່ຈັດເກັບລາຍຮັບ- ຄຸ້ມຄອງລາຍຈ່າຍໃຫ້ໄດ້ຕາມຄາດ ໝາຍທີ່ວາງໄວ້, 4. ເພີ່ມທະວີໃນການນໍາໃຊ້ງົບປະມານຢ່າງປະຢັດມັດທະຍັດ ແລະຮີບ ຮ້ອນໃນການຮິບໂຮມລົດລັດໃຫ້ສໍາເລັດ; ພ້ອມນີ້ ໃຫ້ທຸກພາກສ່ວນເອົາໃຈໃສ່ເປັນເຈົ້າການແກ້ໄຂບັນຫາຢາເສບຕິດຢ່າງເຂັ້ມງວດ, ສືບຕໍ່ຍ້ອງຍໍຊົມເຊີຍ ແລະປະ ຕິບັດນະໂຍບາຍຕໍ່ເຈົ້າໜ້າທີ່ຜູ້ທີ່ເສຍສະ ຫຼະຊີວິດໃນການປະຕິບັດໜ້າທີ່ວຽກ ງານ; ຂໍໃຫ້ອົງປົກຄອງທ້ອງຖິ່ນ ປະຕິບັດນະໂຍບາຍສົ່ງເສີມການຜະລິດຂອງປະ ຊາຊົນຕາມທ່າແຮງຂອງຕົນ ພ້ອມທັງແນະນໍາດ້ານເຕັກນິກວິຊາການໃນການປູກ-ການລ້ຽງ; ນອກນີ້ຕ້ອງໄດ້ສຸມໃສ່ພັດທະນາການທ່ອງທ່ຽວ ປັບປຸງການບໍລິການ-ການທ່ອງທ່ຽວ, ຄວນກຳນົດຈຸດທ່ອງທ່ຽວທີ່ສາມາດດຶງດູດນັກທ່ອງ ທ່ຽວເຂົ້າມາທ່ຽວຫຼາຍທີ່ສຸດ, ປັບປຸງການບໍຫານລັດໃນທຸກພະແນກການໃນການບໍລິການໃຫ້ວ່ອງໄວທັນການ, ເອົາໃຈໃສ່ການປະສານງານ, ການແບ່ງຂັ້ນຄຸ້ມຄອງໃຫ້ລະອຽດຊັດເຈນ ລະຫວ່າງ ສູນກາງກັບທ້ອງຖິ່ນ, ລະຫວ່າງແຂວງກັບເມືອງ, ລະຫວ່າງເມືອງກັບບ້ານ ແນໃສ່ເຮັດໃຫ້ການປະຕິບັດວຽກງານໃຫ້ສອດຄ່ອງ ແລະມີຜົນສໍາເລັດທີ່ດີຂຶ້ນກວ່າເກົ່າ.
ພາບ-ຂ່າວ:ພຸດທະສອນ
