ຄະນະກຳມະການໂຄສະນາ-ຂ່າວສານ ງານມະຫະກຳກິລາແຫ່ງຊາດ ຄັ້ງທີ XI ຫຼື “ຊຽງຂວາງ ເກມ” ໄດ້ເປັນເອກະພາບກັນວ່າ ນັບຈາກນີ້ໄປ ຕ້ອງອອກແຮງສຸມໃສ່ໂຄສະນາໃຫ້ກວ້າງຂວາງ ແລະ ຮອບດ້ານກວ່າເກົ່າ ເພື່ອເຮັດໃຫ້ທົ່ວສັງຄົມ ໄດ້ຮູ້ຂໍ້ມູນຂ່າວສານການເຄື່ອນໄຫວກະກຽມຕ່າງໆໃຫ້ແກ່ “ຊຽງຂວາງ ເກມ” ທີ່ກຳລັງຈະເປີດສາກຂຶ້ນຢ່າງເປັນທາງການ ລະຫວ່າງວັນທີ 12-23 ທັນວາ 2022 ທີ່ແຂວງຊຽງຂວາງ ໄດ້ຮັບກຽດເປັນເຈົ້າພາບ.
ກອງປະຊຸມຄະນະກຳມະການໂຄສະນາ-ຂ່າວສານ ຊຶ່ງເປັນໜຶ່ງໃນ 10 ກຳມະການຈັດງານມະຫະກຳກິລາແຫ່ງຊາດ ຄັ້ງທີ XI ໄດ້ຈັດຂຶ້ນໃນວັນທີ 17 ກັນຍາ 2022 ທີ່ຫ້ອງປະຊຸມ ຄະນະໂຄສະນາອົບຮົມແຂວງຊຽງຂວາງ ພາຍໃຕ້ການເປັນປະທານຂອງ ທ່ານ ນາງ ພວງພະຈັນ ມູນທະວົງ ຫົວໜ້າຄະນະໂຄສະນາອົບຮົມແຂວງຊຽງຂວາງ ທັງເປັນຫົວໜ້າກຳມະການໂຄສະນາ-ຂ່າວສານ “ຊຽງຂວາງ ເກມ” ໂດຍມີບັນດາຄະນະກໍາມະການຈາກສູນກາງ ເຊັ່ນ: ຫົວໜ້າກົມສື່ມວນຊົນ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ອຳນວຍການໃຫຍ່ວິທະຍຸແຫ່ງຊາດ, ຮອງອຳນວຍການໃຫຍ່ ໂທລະພາບແຫ່ງຊາດ, ອຳນວຍການສູນໂຄສະນາຂ່າວສານການສຶກສາ ແລະ ກິລາ ກະຊວງສຶກສາທິການ ແລະ ກິລາ ລວມທັງບັນດາຫົວໜ້າ ແລະ ຮອງອະນຸກຳມະການຝ່າຍຕ່າງໆ ເຂົ້າຮ່ວມກວ່າ 20 ທ່ານ ເຂົ້າຮ່ວມ.
ກອງປະຊຸມ ຊຶ່ງຈັດຂຶ້ນເປັນຄັ້ງທຳອິດ ພາຍຫຼັງລັດຖະບານໄດ້ອອກແຈ້ງການເລກທີ 1230/ຫສນຍ, ລົງວັນທີ 25 ສິງຫາ 2022, ເພື່ອອະນຸມັດໃຫ້ເປີດງານມະຫະກໍາກິລາແຫ່ງຊາດ ຄັ້ງທີ XI ທີ່ແຂວງຊຽງຂວາງ, ໄດ້ປຶກສາຫາລື ແລະ ກວດກາຄືນບັນດາໜ້າວຽກຕ່າງໆຂອງແຕ່ລະອະນຸກຳມະການ ທີ່ໄດ້ຈັດຕັ້ງປະຕິບັດຜ່ານມາ ຕັ້ງແຕ່ໄລຍະປີ 2018 ຫຼື ກ່ອນໜ້າທີ່ຈະມີການເລື່ອນການຈັດງານອອກໄປ ທັງນີ້ກໍເພື່ອຖອດຖອນຕີລາຄາ ແລະ ວາງແຜນວຽກຮ່ວມກັນຄືນໃໝ່ ໃນການກະກຽມໃຫ້ແກ່ງານ ຊຽງຂວາງ ເກມ ທີ່ກຳລັງຈະໄຂຂຶ້ນໃນລະຫວ່າງ ວັນທີ 12-23 ທັນວາ 2022 ຫຼື ອີກບໍ່ເທົ່າໃດເດືອນຂ້າງໜ້ານີ້.
ກອງປະຊຸມ ໄດ້ເປັນເອກະພາບກັນວ່າ ເນື່ອງຈາກປັດຈຸບັນຫາງສຽງຂອງສັງຄົມສ່ວນໃຫຍ່ ເວົ້າລວມ ແລະ ເວົ້າສະເພາະ ປະຊາຊົນຊາວແຂວງຊຽງຂວາງເອງ ຍັງບໍ່ແນ່ໃຈ ແລະ ເຊື່ອໝັ້ນວ່າງານມະຫະກຳກິລາແຫ່ງຊາດ ຈະເກີດຂຶ້ນແທ້ ຫຼື ບໍ່ ໃນເດືອນທັນວາທີ່ຈະເຖິງນີ້. ດັ່ງນັ້ນ, ນັບຖອຍຫຼັງຈາກນີ້ໄປຮອດມື້ເປີດງານແຂ່ງຂັນ ຄະນະກຳມະການໂຄສະນາ-ຂ່າວສານ ຕ້ອງໄດ້ອອກແຮງເພີ່ມຄວາມເອົາໃຈໃສ່ ໂຄສະນາປະຊາສຳພັນ ຢ່າງຮອບດ້ານ ແລະ ກວ້າງຂວາງຫຼາຍກວ່າເກົ່າ ເພື່ອເຮັດແນວໃດຂໍ້ມູນຂ່າວສານທີ່ກ່ຽວຂ້ອງ ຈະເຂົ້າເຖິງພໍ່ແມ່ປະຊາຊົນໃຫ້ຮັບຮູ້ ແລະ ເຂົ້າໃຈ ຢ່າງທ່ວງທັນ ແລະ ທົ່ວເຖິງ. ນອກຈາກນີ້, ຄະນະກຳມະການຍັງຈະໄດ້ປັບປຸງຄືນໂຄງຮ່າງການຈັດຕັ້ງຂອງແຕ່ລະອະນຸກຳມະການ ທີ່ເຫັນວ່າຍັງບໍ່ສອດຄ່ອງເໝາະສົມ ໂດຍສະເພາະວຽກງານສູນຂ່າວ ຊຶ່ງເປັນອະນຸກຳມະການຫຼັກ ຂອງກຳມະການໂຄສະນາ-ຂ່າວສານ ໃນການຄຸ້ມຄອງດູແລ ແລະ ບໍລິການແກ່ສື່ມວນຊົນທົ່ວປະເທດ ຫຼື ຕ່າງປະເທດ ທີ່ມາເກັບກຳຂ່າວໃນງານ ຊຽງຂວາງ ເກມ ຄັ້ງນີ້ ໃຫ້ມີຄວາມເປັນລະບຽບຮຽບຮ້ອຍ ແລະ ມີຄວາມເປັນເອກະພາບໃນການນຳສະເໜີຂໍ້ມູນຂ່າວສານ ຫຼື ລາຍງານຂ່າວຕ່າງໆທີ່ກ່ຽວຂ້ອງ ແລະ ປິ່ນອ້ອມ ໂດຍຜ່ານສື່ທຸກຂະແໜງ ລວມທັງສື່ອີເລັກໂຕຣນິກທຸກຮູບແບບ. ນອກຈາກນີ້, ຍັງໄດ້ປຶກສາຫາລືກັນເຖິງການກະກຽມສະຖານທີ່ຫ້ອງເຮັດວຽກ ແລະ ອຸປະກອນລວມທັງພາຫະນະຮັບໃຊ້ຂອງສູນຂ່າວ, ຂອງນັກຂ່າວພາກສະໜາມ, ຈຸດຖ່າຍທອດສົດແຕ່ລະສະໜາມ, ສັນຍານອິນເຕີເນັດ ແຕ່ລະສະໜາມ ແລະ ອື່ນໆທີ່ເຫັນວ່າມີຄວາມຈຳເປັນທີ່ຂາດບໍ່ໄດ້.
ຄະນະກຳມະການໂຄສະນາ-ຂ່າວສານ ເປັນໜຶ່ງໃນສິບກຳມະການໃຫຍ່ ຊຶ່ງປະກອບໄປດ້ວຍ 4 ອະນຸກຳມະການ ເຊັ່ນ: ອະນຸກຳະການບໍລິຫານ, ອະນຸກຳມະການ ໂຄສະນາ ແລະ ສູນຂ່າວ, ອະນຸກຳມະການວາງສະແດງຮູບພາບມູນເຊື້ອກິລາ ແລະ ຜະລິດວາລະສານ ແລະ ອະນຸກຳມະການຖ່າຍທອດສົດ.
ໂດຍ: ສ.ສຸກ
