ບັ້ນຝຶກຊ້ອມກອບກູ້ໄພພິບັດທາງທໍາມະຊາດຮ່ວມ 3 ກອງທັບ ( ກໍາປູເຈຍ – ລາວ – ຫວຽດນາມ ) ສໍາເລັດລົງດ້ວຍໝາກຜົນອັນຈົບງາມ ພາຍຫຼັງທີ່ຄະນະຮັບຜິດຊອບຝຶກຊ້ອມກອບກູ້ໄພພິບັດທາງທໍາມະຊາດ 3 ກອງທັບ ໄດ້ດໍາເນີນການຝຶກຊ້ອມຮ່ວມກັນ ມາເເຕ່ວັນທີ 10 ກັນຍາ ຫາ ວັນທີ 15 ກັນຍາ 2022 ຢູ່ອ່າງນໍ້າຫຸມ ເມືອງນາຊາຍທອງ ນະຄອນຫລວງວຽງຈັນ ໂດຍການໃຫ້ກຽດເຂົ້າຮັບຊົມການຝຶກຊ້ອມຂອງທ່ານ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດ ແຫ່ງ ສປປລາວ, ມີທ່ານພົນເອກ ຈັນສະຫມອນ ຈັນຍາລາດ ກໍາມະການກົມການເມືອງສູນກາງພັກ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນປະເທດ ແຫ່ງ ສປປລາວ, ມີທ່ານສົມເດັດ ປີໄຈເສນາ ເຕຍບັນ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ ແຫ່ງ ຣາຊະອານາຈັກກໍາປູເຈຍ, ມີທ່ານພົນເອກ ຟານວັນຢາງ, ກຳມະການກົມການເມືອງສູນກາງພັກຄອມມູນິດຫວຽດນາມ, ລັດຖະມົນຕີກະຊວງປ້ອງກັນປະເທດ ແຫ່ງ ສສຫວຽດນາມ, ພ້ອມດ້ວຍການນໍາພັກ – ລັດ, ກະຊວງ – ອົງການ, ນັກການທູດເພື່ອນມິດປະຈໍາລາວ, ອໍານາດການປົກຄອງທ້ອງຖິ່ນ, ຄະນະຮັບຜິດຊ້ອມບັ້ນຝຶກຊ້ອມ ແລະ ນັກຝຶກຊ້ອມ 3 ກອງທັບ, ກໍາປູເຈຍ,ລາວ,ຫວຽດນາມ ເຂົ້າຮ່ວມ.
ໃນພິທີຜູ້ເຂົ້າຮ່ວມໄດ້ຮັບຊົມການຝຶກຊ້ອມຊອກຄົ້ນ, ກອບກູ້ຜູ້ປະສົບໄພພິບັດທາງນໍ້າ ເເລະ ທາງບົກຂອງກໍາລັງກອບກູ້ໄພພິບັດທາງທໍາມະຊາດ 3 ກອງທັບ ( ກໍາປູເຈຍ, ລາວ, ຫວຽດນາມ, ) ດ້ວຍການນໍາໃຊ້ເຮືອລາດຕະເວນ ເພື່ອຊອກຫາຜູ້ປະສົບໄພທີ່ຕົກຄ້າງຢູ່ຕາມຈຸດຕ່າງໆ, ຊອກຄົ້ນກອບກູ້ຜູ້ປະສົບໄພທີ່ຈົມຢູ່ໃຕ້ນ້ຳດ້ວຍນັກດຳນ້ຳ, ກອບກູ້ ແລະ ຍົກຍ້າຍຜູ້ປະສົບໄພ ຫລື ຜູ້ບາດເຈັບ ດ້ວຍເຮືອໄປຫາເຂດທີ່ປອດໄພ,ຫລັງຈາກນັ້ນ ທະຫານອາກາດໄດ້ນຳໃຊ້ເຮືອບິນ Z-9 ບິນລາດຕະເວນຊອກຄົ້ນຜູ້ປະສົບໄພຕາມຈຸດຕ່າງໆທີ່ເຮືອບໍ່ສາມາດເຂົ້າເຖິງ, ເຮືອບິນ Mi -17 ບິນຢ່ອນນັກກອບກູ້ລົງຊ່ວຍເຫລືອຜູ້ປະສົບໄພທີ່ຢູ່ຈຸດສູງເຂດທຸລະກັນດານ ແລະ ພື້ນທີ່ນໍ້າຖວ້ມທີ່ມີສີ່ງກີດຂວາງ, ຕົ້ນໄມ້ຫັກທັບຖົມ, ສ່ວນທາງບົກ ເເມ່ນການກອບກູ້ຊ່ວຍເຫລືອຜູ້ປະສົບໄພ ທີ່ໄດ້ຮັບຜົນກະທົບຈາກການຮົ່ວໄຫລຂອງໂຮງງານເຄມີ ເເລະ ການກອບກູ້ຊ່ວຍເຫລືອຜູ້ປະສົບໄພ ຕາມສະຖານທີ່ຕ່າງໆ ເເລ້ວນໍາສົ່ງໄປປິ່ນປົວຢູ່ໂຮງຫມໍແນວຫຼັງ ດ້ວຍການນໍາໃຊ້ກຳລັງຝຶກຊ້ອມຈາກ 4 ເຫຼົ່າຮົບ ເປັນຕົ້ນ: ເຫຼົ່າຮົບຊ່າງແສງ, ເຫຼົ່າຮົບເຄມີ, ເຫຼົ່າຮົບເສນາຮັກ ແລະ ເຫຼົ່າຮົບທະຫານອາກາດ.
ໂອກາດນີ້ພົນຕີ ຈັນທອງ ສອນຕະອາດ ຮອງລັດຖະມົນຕີກະຊວງປ້ອງກັນປະເທດ, ຫົວຫນ້າຄະນະຊີ້ນຳວຽກງານກອບກູ້ໄພພິບັດຮ່ວມ 3 ກອງທັບ ມີຄໍາເຫັນກ່າວປິດບັ້ນຝຶກຊ້ອມໃນຄັ້ງນີ້ວ່າ: ກອບກູ້ໄພພິບັດຮ່ວມກັນ 03 ກອງທັບໃນຄັ້ງນີ້ ຖືວ່າເປັນຄັ້ງທຳອິດ ເເລະ ສຸດທີ່ມີຄວາມໝາຍສຳຄັນ ເຊິ່ງເປັນການຍົກລະດັບຄວາມຮູ້ຄວາມສາມາດ ແລະ ຄວາມຊຳນິຊຳນານ ໃນການກະກຽມຄວາມພ້ອມກອບກູ້ໄພພິບັດໃນທຸກເງື່ອນໄຂ ແລະ ໃນທຸກສະຖານະການທີ່ອາດຈະເກີດຂຶ້ນ ເປັນການແລກປ່ຽນບົດຮຽນ, ປະສົບການດ້ານວິຊາສະເພາະ ແລະ ດ້ານວັດທະນະທຳ, ຮີດຄອງປະເພນີຮ່ວມກັນ ,ເພື່ອຮັດເເໜ້ນຄວາມສາມັກຄີຮັກເເພງ, ສາຍພົວພັນມິດຕະພາບ ແລະ ຄວາມເຂົ້າອົກເຂົ້າໃຈເຊິ່ງກັນ ແລະ ກັນ ລະຫວ່າງ 3 ກອງທັບ ກໍາປູເຈຍ, ລາວ, ຫວຽດນາມ ໃຫ້ນັບມື້ນັບແໜ້ນແຟ້ນຍິ່ງໆຂຶ້ນ.
ນອກຈາກນີ້ ພົນຕີ ຈັນທອງ ສອນຕະອາດ ຍັງໄດ້ໃຫ້ຮູ້ຕື່ມວ່າ: ການຝຶກຊ້ອມກອບກູ້ໄພພິບັດຮ່ວມ 3 ກອງທັບໃນຄັ້ງນີ້ ເກີດຂຶ້ນ ແລະ ສຳເລັດລົງໄດ້ຍ້ອນການນຳຂັ້ນສູງ ເຫັນໄດ້ຄວາມໝາຍຄວາມສຳຄັນຂອງວຽກງານນີ້ ແລະ ໄດ້ຕົກລົງກັນໃນກອງປະຊຸມລັດຖະມົນຕີປ້ອງກັນປະເທດ ກຳປູເຈຍ-ລາວ-ຫວຽດນາມ ຫລື CLV ຢູ່ນະຄອນຫຼວງຮ່າໂນຍ ປີ 2019 ແລະ ໄດ້ອະນຸມັດໃຫ້ຈັດຕັ້ງຝຶກຊ້ອມກອບກູ້ໄພພິບັດຮ່ວມກັນ 3 ຝ່າຍ.
ພ້ອມທັງເປັນເອກະພາບກັນທາງດ້ານເນື້ອໃນ, ແຜນການ, ແຕ່ງຕັ້ງຄະນະຊີ້ນຳ ແລະ ໄດ້ມອບໝາຍໜ້າທີ່ໃຫ້ແຕ່ລະພາກສ່ວນຮັບຜິດຊອບຢ່າງລະອຽດ, ບັນດາສະຫາຍທີ່ຖືກແຕ່ງຕັ້ງໄດ້ເປັນເຈົ້າການປະຕິບັດລະບຽບວິໄນ, ຄຳສັ່ງ, ແຜນການຝຶກຊ້ອມຢ່າງເຂັ້ມງວດ, ມີຄວາມຮັບຜິດຊອບສູງ, ເຖິງວ່າການຝຶກຊ້ອມກອບກູ້ໄພພິບັດຮ່ວມ 3 ຝ່າຍໃນຄັ້ງນີ້ ຈະເປັນຄັ້ງທຳອິດ, ບົດຮຽນປະສົບການໃນການຝຶກຊ້ອມຮ່ວມກັນບໍ່ທັນຫຼາຍ, ໄລຍະເວລາໃນການກະກຽມ ແລະ ຫັດແອບຝຶກຊ້ອມສັ້ນ, ສະພາບອາກາດຮ້ອນ ແລະ ມີຝົນຕົກ ແຕ່ຄະນະຮັບຜິດຊອບຊີ້ນຳ, ບັນດາໜ່ວຍງານ ແລະ ນັກຝຶກຊ້ອມ ທັງ 3 ກອງທັບ ໄດ້ປະສານສົມທົບ, ມີຄວາມສາມັກຄີເປັນເອກະພາບ ແລະ ສຸມສະຕິປັນຍາ-ກຳລັງກາຍ ຂອງຕົນຜ່ານຜ່າຄວາມຫຍຸ້ງຍາກ ແລະ ນຳໃຊ້ອຸປະກອນ-ເຕັກນິກເຂົ້າໃນການຝຶກຊ້ອມຢ່າງສອດຄ່ອງກັບກໍລະນີລະນີຕ່າງໆທີ່ສ້າງຂຶ້ນ ຢ່າງມີຄວາມປອດໄພ ເເລະ ມີຜົນສໍາເລັດຕາມລະດັບຄາດຫມາຍທີ່ວາງໄວ້.
ໃນພີທີມີຄວາມຫມາຍຄວາມສໍາຄັນໃນຄັ້ງນີ້ຍັງມີການມອບຫລຽນກາມິດຕະພາບ ເເລະ ໂລ້ທີ່ລະນຶກ ຂອງກະຊວງປ້ອງກັນປະເທດລາວ ໃຫ້ເເກ່ຄະນະນໍາ ເເລະ ນັກຝຶກຊ້ອມຂອງກໍາປູເຈຍ ເເລະ ຫວຽດນາມຕື່ມອີກ ໃຫ້ກຽດມອບໂດຍພົນຕີ ຈັນທອງ ສອນຕະອາດ ຮອງລັດຖະມົນຕີກະຊວງປ້ອງກັນປະເທດ, ຫົວຫນ້າຄະນະຊີ້ນຳວຽກງານກອບກູ້ໄພພິບັດຮ່ວມ 3 ກອງທັບຢ່າງສົມກຽດ.
ຂ່າວຍັງໃຫ້ຮູ້ຕື່ມອີກວ່າໃນຕອນແລງຂອງວັນດຽວກັນນີ້ຍັງໄດ້ມີກອງປະຊຸມຖອດຖອນບົດຮຽນເຊິ່ງກັນ ແລະ ກັນ ຂອງຄະນະຮັບຜິດຊອບການຝຶກຊ້ອມແຕ່ລະພາກສ່ວນທີ່ກ່ຽວຂ້ອງ ທັງນີ້ກໍ່ເພື່ອເຮັດໃຫ້ການຝຶກຊ້ອມກອບກູ້ໄພພິບັດທາງທໍາມະຊາດໃນຄັ້ງຕໍ່ໄປໃຫ້ມີຜົນສໍາເລັດອັນໃໝ່ໃຫຍ່ຫຼວງກວ່າເກົ່າ.
