ກະຊວງສຶກສາທິການ ແລະ ກິລາ (ສສກ) ສປປ ລາວ ແລະ ກະຊວງອຸດົມສຶກສາ, ວິທະຍາສາດ, ວິໄຈ ແລະ ນະວັດຕະກໍາ ແຫ່ງຣາຊະອານາຈັກໄທ ຮ່ວມຫາລືວຽກງານພັດທະນາການສຶກສາ ເປັນຕົ້ນ ແມ່ນການສ້າງຄວາມເຂັ້ມແຂງຂອງຄູອາຈານ, ການເຮັດວິໄຈຮ່ວມກັນ, ນຳໃຊ້ຫ້ອງແລບ (LAB) ຮ່ວມກັນ, ແລກປ່ຽນທາງວິຊາການໃຫ້ຫຼາຍຂຶ້ນ, ການສະເໜີຜົນງານການຄົ້ນຄວ້າລະຫວ່າງກັນ, ສົ່ງເສີມ ແລະແລກປ່ຽນຂໍ້ມູນທາງດ້ານປະກັນຄຸນນະພາບຂອງການສຶກສາຊັ້ນສູງ ລະຫວ່າງມະຫາວິທະຍາໄລໃນ ສປປ ລາວ ແລະ ມະຫາວິທະຍາໄລໃນຣາຊະອານາຈັກໄທ ພ້ອມທັງລົງນາມໜັງສືແຈ້ງເຈດຈໍານົງການໃຫ້ທຶນການສຶກສາແກ່ ສປປ ລາວ ຈໍານວນ 700 ກວ່າທຶນ.
ໃນວັນທີ 29 ສິງຫາ ຜ່ານມາ ທີ່ຫ້ອງປະຊຸມ ໄອຊີທີ ກະຊວງສຶກສາທິການ ແລະ ກິລາ ນະຄອນຫຼວງວຽງຈັນ, ທ່ານ ຮສ.ປອ ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະ ກິລາ ໄດ້ໃຫ້ກຽດຕ້ອນຮັບການເຂົ້າພົບປະຂອງທ່ານ ສຈ ພິເສດ ດຣ ອະເນກ ເຫຼົ່າທໍາມະທັດ ລັດຖະມົນຕີ ກະຊວງອຸດົມສຶກສາ, ວິທະຍາສາດ, ວິໄຈ ແລະ ນະວັດຕະກໍາ ແຫ່ງຣາຊະອານາຈັກໄທ ພ້ອມດ້ວຍຄະນະ, ພ້ອມທັງລົງນາມໜັງສືແຈ້ງເຈດຈໍານົງການໃຫ້ທຶນການສຶກສາແກ່ ສປປ ລາວ ວ່າດ້ວຍການຮ່ວມມື ດ້ານການສຶກສາ, ມີຫົວໜ້າຫ້ອງການ, ກົມ ແລະ ວິຊາການຮັບຜິດຊອບວຽກງານທັງ 2 ຝ່າຍເຂົ້າຮ່ວມ.
ການເຂົ້າພົບປະໃນຄັ້ງນີ້, ແມ່ນເພື່ອປຶກສາຫາລືກ່ຽວກັບການຮ່ວມມືດ້ານວຽກງານການສຶກສາລະຫວ່າງ ກະຊວງສຶກສາທິການ ແລະ ກິລາ ແລະ ກະຊວງອຸດົມສຶກສາ, ວິທະຍາສາດ, ວິໄຈ ແລະ ນະວັດຕະກໍາ ເປັນຕົ້ນແມ່ນການສ້າງຄວາມເຂັ້ມແຂງຂອງຄູອາຈານ, ການເຮັດວິໄຈຮ່ວມກັນ, ນໍາໃຊ້ຫ້ອງແລບ (LAB) ຮ່ວມກັນ, ແລກປ່ຽນທາງວິຊາການໃຫ້ຫຼາຍຂຶ້ນ, ການສະເໜີຜົນງານການຄົ້ນຄວ້າລະຫວ່າງກັນ, ສົ່ງເສີມ ແລະ ແລກປ່ຽນຂໍ້ມູນທາງດ້ານປະກັນຄຸນນະພາບຂອງການສຶກສາຊັ້ນສູງ ລະຫວ່າງມະຫາວິທະຍາໄລຂອງ ສປປ ລາວ ແລະ ມະຫາວິທະຍາໄລຂອງຣາຊະອານາຈັກໄທ; ການແລກປ່ຽນລະຫວ່າງກົມວິຊາການທີ່ກ່ຽວຂ້ອງໃນການຮ່າງຍຸດທະສາດການພັດທະນາວິທະຍາສາດ ແລະ ການວິໄຈ ຂອງ ສປປ ລາວ; ສົ່ງເສີມໃຫ້ນັກຮຽນສາຍ STEM ດ້ວຍການແລກປ່ຽນຄູສອນໃນລະດັບປະຖົມສຶກສາ, ມັດທະຍົມສຶກສາ, ອາຊີວະສຶກສາ ແລະ ການສຶກສາຊັ້ນສູງ (ອຸດົມສຶກສາ) ລະຫວ່າງກັນ; ຢາກໃຫ້ນັກຮຽນລາວໄດ້ໄປເສັງ ລະດັບ Olympiad ສາກົນ; ແລກປ່ຽນປະສົບການກ່ຽວກັບການຄຸ້ມຄອງກອງທຶນ ແລະ ການນຳໃຊ້ກອງທຶນພັດທະນາວິທະຍາສາດ ເພື່ອໃຫ້ນຳໃຊ້ຜົນງານທາງວິທະຍາສາດພັດທະນາເສດຖະກິດ-ສັງຄົມຂອງປະເທດ ໄດ້ຢ່າງເປັນຮູບປະທຳ; ຂໍໃຫ້ສະໜອງກ້ອງຊົມດາວຕາມຂະໜາດຂອງຖານທີ່ພວກເຮົາສ້າງໄວ້ ສະຖານທີ່ດັ່ງກ່າວ ຈະເປັນແຫຼ່ງຮຽນຮູ້ທາງວິທະຍາສາດອີກແຫ່ງໜຶ່ງຂອງເດັກ ນັກຮຽນ ນັກສຶກສາຂອງ ສປປ ລາວ ລວມທັງບັນດາແຂວງລຽບຊາຍແດນຂອງຣາຊະອານາຈັກໄທອີກດ້ວຍ; ສືບຕໍ່ຂະຫຍາຍການຮ່ວມມືໃນການສົ່ງເສີມ ແລະ ສ້າງຄວາມອາດສາມາດທາງດ້ານວິຊາການໃນຂົງເຂດຄຸ້ມຄອງຄວາມປອດໄພດ້ານລັງສີ ແລະ ນິວເຄຣຍ ລະຫວ່າງກົມຄຸ້ມຄອງວິທະຍາສາດ ກັບ ສຳນັກງານປະລຳມະນູເພື່ອສັນຕິ. ນອກຈາກນີ້, ໃນພິທີຍັງໄດ້ມີການລົງນາມໜັງສືແຈ້ງເຈດຈໍານົງ ທີ່ລັດຖະບານໄທ ຈະມອບທຶນການສຶກສາ ຈໍານວນ 700 ກວ່າທຶນໃຫ້ແກ່ ສປປ ລາວ ອີກດ້ວຍ.
ໂອກາດດັ່ງກ່າວ, ທ່ານ ຮສ.ປອ ພຸດ ສິມມາລາວົງ ໄດ້ກ່າວວ່າ: ການລົງນາມໃນໜັງສືແຈ້ງເຈດຈໍານົງການໃຫ້ທຶນການສຶກສາຂອງລັດຖະບານໄທໃນຄັ້ງນີ້, ຈະເປັນການປະກອບສ່ວນອັນສໍາຄັນໃຫ້ແກ່ການຈັດຕັ້ງປະຕິບັດແຜນພັດທະນາເສດຖະກິດ ແລະ ສັງຄົມແຫ່ງຊາດ ກໍຄືແຜນພັດທະນາການສຶກສາ, ວິທະຍາສາດ ແລະ ກິລາ ໃນຊຸມປີຕໍ່ໜ້າ ເພື່ອບັນລຸເປົ້າຫມາຍຂອງການພັດທະນາແບບຍືນຍົງຂອງອົງການສະຫະປະຊາຊາດ ໃນປີ 2030. ຍິ່ງໄປກວ່ານັ້ນ, ການໃຫ້ທຶນການສຶກສາຂອງລັດຖະບານໄທ ແກ່ ສປປ ລາວ ໃນຄັ້ງນີ້, ຍັງຈະເປັນການປະກອບສ່ວນອັນສໍາຄັນເຂົ້າໃນການສົ່ງເສີມສາຍພົວພັນມິດຕະພາບທີ່ດີງາມ ແລະ ການຮ່ວມມືທີ່ມີມາແຕ່ດົນນານ ລະຫວ່າງສອງລັດຖະບານ ແລະ ປະຊາຊົນສອງຊາດ ລາວ ແລະ ໄທ ໃຫ້ແໜ້ນແຟ້ນກວ່າເກົ່າ.
ໃນໄລຍະຜ່ານມາ, ກະຊວງອຸດົມສຶກສາ, ວິທະຍາສາດ, ວິໄຈ ແລະ ນະວັດຕະກໍາ ໄດ້ໃຫ້ການຊ່ວຍເຫຼືອວຽກງານວິທະຍາສາດຫຼາຍຢ່າງ ເປັນຕົ້ນແມ່ນ ກ້ອງສ່ອງດາວ ຈຳນວນ 3 ໜ່ວຍ, ຂະໜາດ 10 ນິ້ວ ທີ່ພວກເຮົາໄດ້ນຳໃຊ້ ຢູ່ 3 ແຫ່ງ ຄື: ຫ້ອງການສະພາວິທະຍາສາດ, ຄະນະວິທະຍາສາດ (ມຊ) ແລະ ໂຮງຮຽນພອນສະຫວັນ ແລະ ຊົນເຜົ່າ (ມຊ); ການຝຶກອົບຮົມດ້ານວິຊາການກ່ຽວກັບດາລາສາດ ແລະ ວິທະຍາສາດ; ສະໜອງເອກະສານທາງດ້ານວິທະຍາສາດ-ດາລາສາດ ແລະ ຈັດພິມຫຼາຍກວ່າ 30.000 ກວ່າສະບັບ; ໃຫ້ຄຳປຶກສາການສ້າງຫໍຊົມດາວ ແລະ ທ້ອງຟ້າສາທິດ (ທ້ອງຟ້າຈຳລອງ) ຂອງ ສປປ ລາວ; ການຮ່ວມມືລະຫວ່າງສຳນັກງານພະລັງງານປະລຳມະນູເພື່ອສັນຕິ ກັບກົມຄຸ້ມຄອງວິທະຍາສາດ ແລະ ການຮ່ວມມືຊ່ວຍເຫຼືອດ້ານອື່ນໆ.
ພາຍຫຼັງທີ່ຄະນະທັງ 2 ຝ່າຍໄດ້ລົງນາມສັນຍາໜັງສືແຈ້ງເຈດຈໍານົງການໃຫ້ທຶນການສຶກສາໃນຕອນເຊົ້າແລ້ວ, ໃນວັນດຽວກັນຍັງໄດ້ຈັດກອງປະຊຸມທາງດ້ານວິຊາການຢູ່ໂຮງແຮມ ຄຣາວພລາຊາ ນະຄອນຫຼວງວຽງຈັນ ເພື່ອຄົ້ນຄວ້າເຖິງຄວາມຕ້ອງການສ້າງຊັບພະຍາກອນມະນຸດຂອງ ສປປ ລາວ ແລະ ເປັນເອກະພາບກັນກ່ຽວກັບວິທີການຈັດຕັ້ງປະຕິບັດທຶນການສຶກສາທີ່ລັດຖະບານໄທມອບໃຫ້ ສປປ ລາວອີກດ້ວຍ.
ໂດຍ ບົວລະພາ
