ບົດຕອບສຳພາດຂອງສະຫາຍ ຫງວຽນ ບ໋າ ຮຸ່ງ ເອກອັກຄະລັດຖະທູດຜູ້ມີອຳນາດເຕັມ ແຫ່ງ ສສ ຫວຽດນາມ ປະຈຳ ສປປ ລາວ

(ເນື່ອງໃນໂອກາດສະເຫຼີມສະຫຼອງວັນສ້າງຕັ້ງສາຍພົວພັນການທູດຫວຽດນາມ-ລາວ ຄົບຮອບ 60 ປີ)

1: ສາຍພົວພັນຫວຽດນາມ-ລາວ, ລາວ-ຫວຽດນາມ ທັງສອງປະເທດຖືເປັນພິເສດ. ຂໍອະນຸຍາດ ທ່ານ ທູດ ອະທິບາຍເພື່ອໃຫ້ຊັດເຈນຂຶ້ນຕື່ມ.

ທ່ານ ທູດ ກ່າວວ່າ: ກ່ອນອື່ນໝົດ, ຂ້າພະເຈົ້າຂໍສະແດງຄວາມຂອບອົກຂອບໃຈມາຍັງສະຖານີໂທລະພາບແຫ່ງຊາດ, ສະຖານີວິທະຍຸກະຈ່າຍສຽງແຫ່ງຊາດ ພ້ອມດ້ວຍບັນດາອົງການສື່ສານຂອງລາວ ທີ່ໄດ້ສ້າງເງື່ອນໄຂໃຫ້ແກ່ ຂ້າພະເຈົ້າ ໄດ້ສະແດງຄວາມຄິດເຫັນ ເນື່ອງໃນໂອກາດສະເຫຼີມສະຫຼອງວັນສ້າງຕັ້ງສາຍພົວພັນການທູດ ຫວຽດນາມ-ລາວ ຄົບຮອບ 60 ປີ (05/9/1962-05/9/2022).

ເປັນຫຍັງສາຍພົວພັນ ຫວຽດນາມ-ລາວ ແມ່ນສາຍພົວພັນພິເສດ, ປັດໄຈໃດສ້າງຂຶ້ນຄວາມເປັນພິເສດນີ້. ເພື່ອຕອບຄຳຖາມນີ້ໄດ້, ພວກເຮົາ ຕ້ອງສັງເກດບັນດາປັດໄຈນັ້ນ ຢ່າງມີວິທະຍາສາດ, ຫຼາຍຄົນອາດຈະມີມຸມມອງສ່ວນຕົວ, ແຕ່ສໍາລັບຂ້າພະເຈົ້າ ປັດໃຈທີ່ເຮັດໃຫ້ສາຍພົວພັນ ລະຫວ່າງສອງປະເທດຂອງພວກເຮົາພິເສດ ແລະ ມີໜຶ່ງດຽວໃນໂລກ ຍອມຮັບເຖິງການຄົງຕົວໃນພາວະວິໄສ ພວກເຮົາຈຶ່ງມີພື້ນຖານຄວາມເຊື່ອໝັ້ນທີ່ໜັກແໜ້ນຕໍ່ການຄົງຕົວ ແລະ ເພື່ອປະກອບສ່ວນເພື່ອປັບປຸງ, ພັດທະນາສາຍພົວພັນພິເສດ ຫວຽດນາມ-ລາວ.

ໜຶ່ງ; ປັດໄຈດ້ານພູມີສາດ, ຫວຽດນາມ-ລາວ ແມ່ນສອງປະເທດບ້ານໃກ້ເຮືອນຄຽງ, ຮ່ວມສາຍພູຫຼວງອັນໃຫຍ່ໂຕມະໂຫຖານ, ດື່ມນໍ້າໃນແມ່ນໍ້າຂອງສາຍດຽວກັນ. ໃນປະຫວັດສາດແຫ່ງການສ້າງສາ ແລະ ພັດທະນາປເທດຊາດຂອງຕົນ, ປະຊາຊົນສອງຊາດຂອງພວກເຮົາ ດໍາລົງຊີວິດຮ່ວມກັນດ້ວຍສັນຕິພາບ ແລະ ພວກເຮົາກໍຮ່ວມກັນຕໍ່ສູ້ກັບສັດຕີໂຕດຽວກັນ ເພື່ອປົກປັກຮັກສາປະເທດຊາດ.

ສອງ; ປະຊາຊົນສອງຊາດລ້ວນແຕ່ມີພັກການເມືອງປະຈັນບານຂອງຊົນຊັ້ນກຳມະກອນ ທີ່ມີຕົ້ນກໍາເນີດແມ່ນ ພັກກອມມູນິດອິນໂດຈີນ, ປັດຈຸບັນແມ່ນ ພັກກອມມູນິດຫວຽດນາມ ແລະ ພັກປະຊາຊົນປະຕິວັດລາວ. ດ້ວຍເຫດນີ້, ການເພີ່ມທະວີ ເພີ່ມພູນຄູນສ້າງຄວາມສາມັກຄີພິເສດ ລະຫວ່າງ ສອງປະເທດຂອງພວກເຮົາ ໄດ້ກາຍເປັນສິ່ງທີ່ສໍາຄັນ, ກາຍເປັນແນວທາງ, ເປັນນະໂຍບາຍຍາວນານຂອງສອງພັກ, ສອງລັດ, ໄດ້ສືບທອດຈາກລຸ້ນຄົນນີ້ສູ່ລຸ້ນຄົນຕໍ່ໄປ ແລະ ສົ່ງຕໍ່ໃຫ້ແກ່ລຸ້ນຄົນອະນາຄົດສືບຕໍ່.

ສາມ; ນໍ້າໃຈສາມັກຄີພິເສດ ລະຫວ່າງສອງຊາດ ໄດ້ຮັບການສ້າງຂຶ້ນຈາກຢາດເຫື່ອ, ຢາດນໍ້າຕາ ແລະ ຢາດນໍ້ານົມອັນຫອມຫວານຂອງບັນດາແມ່ຄົນລາວ ທີ່ໄດ້ສະຫຼະອາຫານການກິນຂອງຕົນ, ພິເສດແມ່ນໄດ້ເສຍສະຫຼະຢາດນໍ້ານົມທີ່ຕ້ອງໃຫ້ລູກນ້ອຍຂອງຕົນກິນ ອຸທິດໃຫ້ແກ່ທະຫານຫວຽດນາມກິນ ເພື່ອໃຫ້ມີຊີວິດຢູ່ລອດ; ບັນດາແມ່ຍິງຫວຽດນາມ ກໍ່ໄດ້ສົ່ງຜົວ ແລະ ລູກຂອງຕົນ ອອກເດີນທາງສູ່ສະໜາມຕໍ່ສູ້ຢູ່ປະເທດລາວ ແລະ ບໍ່ໄດ້ຫວນກັບຄືນບ້ານເກີດອີກເລີຍ. ມາຮອດປັດຈຸບັນ ນໍ້າຕາຂອງຜູ້ເປັນແມ່ຊາວຫວຽດນາມ ຍັງບໍ່ທັນຢຸດໄຫຼ ເມື່ອນັກຮົບທະຫານອາສາສະໝັກຫວຽດນາມ ຍັງຄົງນອນຫຼັບຢູ່ໃນແຜ່ນດິນລາວ.

ສີ່; ສາຍພົວພັນ ຫວຽດນາມ-ລາວ ແມ່ນພິເສດແທ້ໆ ເພາະສອງປະເທດ ມີສາຍພົວພັນ ແລະ ຮ່ວມມື, ຊ່ວຍເຫຼືອຊຶ່ງກັນ ແລະ ກັນຢ່າງຈິງໃຈ, ບໍ່ເຫັນແກ່ຕົວ, ຜ່ອງໃສ, ມິດຈິດມິດໃຈ, ບໍ່ຖືກມົວຂຸ່ນດ້ວຍແນວຄິດສະແຫວງຫາຜົນປະໂຫຍດ ຫຼື ເປັນປະເທດໃຫຍ່, ປະເທດນ້ອຍ ແລະ ບໍ່ພຽງແຕ່ຮັກແພງ ກັນເທົ່ານັ້ນ, ແຕ່ຍາມໃດກໍເຄົາລົບ, ພົວພັນຊຶ່ງກັນ ແລະ ກັນຢ່າງສະເໝີພາບ.

ຫ້າ; ໃນເວລາທີ່ຫວຽດນາມ ມີຄວາມມຸ້ງຫວັງຢ່າງແຮງກ້າໃນການນໍາພາປະຊາຊົນຂອງຕົນ ບືນຕົວໃຫ້ທຽບເທົ່າກັບບັນດາປະເທດມະຫາອຳນາດ, ປະຊາຊົນຫວຽດນາມ ຍາມໃດກໍມີຄວາມມຸ້ງຫວັງຢ່າງແຮງກ້າວ່າ: ປະເທດຊາດ ແລະ ປະຊາຊົນລາວອ້າຍນ້ອງ ຈະໄດ້ດຳລົງຊີວິດໃນສັນຕິພາບ, ເອກະລາດ, ເສລີພາບ, ວັດທະນາຖາວອນ, ມີຖານະສູງສົ່ງໃນເວທີສາກົນ. ດ້ວຍຄວາມມຸ້ງຫວັງນັ້ນ ແມ່ນເກີດຂຶ້ນແບບທຳມະຊາດ ທີ່ມີພຽງແຕ່ໃນລະຫວ່າງຜູ້ເປັນອ້າຍເປັນນ້ອງສະໜິດສະໜົມ ແລະ ໄວ້ເນື້ອເຊື່ອໃຈທີ່ສຸດ.

ຫົກ; ລະຫວ່າງສອງປະເທດມີຄວາມສະໜິດສະໜົມ, ມີຄວາມໄວ້ເນື້ອເຊື່ອໃຈດ້ານການເມືອງ, ຄວາມໄວ້ເນື້ອເຊື່ອໃຈດ້ານຍຸດທະສາດທີ່ເລິກເຊິ່ງ ແລະ ໜັກແໜ້ນຢ່າງແທ້ຈິງ.

ອີກສິ່ງໜຶ່ງທີ່ພິເສດ ແມ່ນທຸກສິ່ງຢ່າງດັ່ງກ່າວມານັ້ນ ໄດ້ກາຍເປັນແຜນນະໂຍບາຍ, ເປັນແນວທາງ, ເປັນນະໂຍບາຍຍາວນານຂອງສອງພັກ, ສອງລັດ, ໄດ້ສືບທອດຈາກລຸ້ນຄົນນີ້ສູ່ລຸ້ນຄົນຕໍ່ໄປ ແລະ ສົ່ງຕໍ່ໃຫ້ແກ່ລຸ້ນຄົນອະນາຄົດສືບຕໍ່.

ເພື່ອສະຫຼຸບຄືນສິ່ງທີ່ກ່າວມາຂ້າງເທິງນັ້ນ, ຂ້າພະເຈົ້າ ຂໍຢໍ້າຄືນເນື້ອໃນທີ່ ສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ ປະທານປະເທດ ແຫ່ງ ສປປ ລາວ ໃນເວລາຕ້ອນຮັບຄະນະຜູ້ແທນຂັ້ນສູງຫວຽດນາມເຂົ້າຢ້ຽມຂໍ່ານັບມໍ່ໆນີ້ ໄດ້ມີຄໍາເຫັນວ່າ: ລະຫວ່າງ ລາວ ແລະ ຫວຽດນາມ ມີ 4 ນໍ້າໃຈຄື: ນໍ້າໃຈມິດສະຫາຍຮ່ວມອຸດົມການກອມມູນິດ; ນໍ້າໃຈອ້າຍນ້ອງຮ່ວມພໍ່ແມ່ ຊຶ່ງແມ່ນພັກກອມມູນິດອິນດູຈີນ; ນໍ້າໃຈເພື່ອນມິດສະໜິດສະໜົມ, ຮ່ວມສຸກຮ່ວມທຸກນຳກັນ ແລະ ນໍ້າໃຈສາມັກຄີພິເສດ, ສະໜິດຕິດແທດ, ບໍລິສຸດດູດດື່ມ.

2: ຂໍໃຫ້ ທ່ານທູດ ໃຫ້ຮູ້ວ່າ ປີສາມັກຄີມິດຕະພາບ ຫວຽດນາມ-ລາວ, ລາວ-ຫວຽດນາມ 2022 ມີຄວາມໝາຍແນວໃດ ແລະ ສາຍພົວພັນສອງຝ່າຍໄດ້ສົ່ງສານແນວໃດຕໍ່ຫາງສຽງພາຍໃນ ແລະ ສາກົນ.

ທ່ານ ທູດ ກ່າວວ່າ: ປີ 2022 ມີຄວາມໝາຍສຳຄັນພິເສດສໍາລັບສອງປະເທດ ຫວຽດນາມ ແລະ ລາວ. ສອງປະເທດຮ່ວມກັນສະເຫຼີມສະຫຼອງວັນສ້າງຕັ້ງສາຍພົວພັນການທູດຄົບຮອບ 60 ປີ, ວັນເຊັນສົນທິສັນຍາມິດຕະພາບ ແລະ ການຮ່ວມມື ຫວຽດນາມ-ລາວ ຄົບຮອບ 45 ປີ.

ປັດຈຸບັນ, ສະພາບການທົ່ວໂລກ ແລະ ເຂດອາຊີ ມີການຜັນປ່ຽນຢ່າງໄວວາ ແບບບໍ່ເຄີຍມີມາກ່ອນ, ຄາດເດົາໄດ້ຍາກ, ໄດ້ສ້າງຫຼາຍກາລະໂອກາດ ແລະ ສິ່ງທ້າທາຍສະຫຼັບກັນ. ການນຳຂັ້ນສູງຂອງສອງປະເທດ ເປັນເອກະພາບເອົາປີ 2022 ແມ່ນປີສາມັກຄີມິດຕະພາບ ຫວຽດນາມ-ລາວ ທີ່ມີຄວາມ ໝາຍສຳຄັນຍິ່ງ, ຖືເປັນຄວາມສໍາຄັນ ແລະ ຄວາມໝາຍຍຸດທະສາດ, ຄວາມເປັນຕາຍຂອງສາຍພົວພັນມິດຕະພາບອັນຫຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ຫວຽດນາມ-ລາວ, ຖືເປັນຊັບສົມບັດອັນລໍ້າຄ່າຂອງປະຊາຊົນສອງຊາດ ເປັນປັດໄຈຕັດສິນການຄົງຕົວ ແລະ ພັດທະນາຂອງສອງປະເທດ, ໄດ້ສົ່ງສານຢ່າງຈະແຈ້ງວ່າ: ບໍ່ວ່າສະພາບການຂອງໂລກ ຈະປ່ຽນແປງໄປແນວໃດກໍ່ຕາມ ພັກ, ລັດຫວຽດນາມ ຈະຮ່ວມກັບ ພັກ, ລັດຖະບານລາວ ພະຍາຍາມຢ່າງສຸດກໍາລັງ ແລະ ເດັດດ່ຽວເພີ່ມພູນຄຸນສ້າງສາຍພົວພັນ ລະຫວ່າງ ສອງປະເທດ ນັບມື້ນັບພັດທະນາ ທັງລວງກວ້າງ ແລະ ລວງເລິກຢ່າງບໍ່ຢຸດຢັ້ງ. ປະຊາຊົນສອງປະເທດ ຈະຈັບມືກັນຢ່າງແໜ້ນແຟ້ນເພື່ອກ້າວຂຶ້ນສູ່ເສັ້ນທາງສ້າງສາປະເທດຕົນສັນຕິພາບ, ເອກະລາດ, ເປັນເຈົ້າຕົນເອງ, ພັດທະນາຖາວອນຕະຫຼອດກາລະນານ.

Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)