ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ຜູ້ຊີ້ນຳວຽກງານຂົງເຂດເສດຖະກິດ ພ້ອມຄະນະລົງເຄື່ອນໄຫວຊຸກຍູ້ຊີ້ນຳວຽກງານຢູ່ແຂວງສາລະວັນໃນວັນທີ 19 ສິງຫາ ຜ່ານມາ ພ້ອມທັງໄດ້ພົບປະໂອ້ລົມການນຳ, ພະນັກງານຫຼັກແຫຼ່ງຂອງແຂວງສາລະວັນ ໂດຍການຕ້ອນຮັບຂອງທ່ານ ໂພໄຊ ໄຊຍະສອນ ເຈົ້າແຂວງສາລະວັນ ພ້ອມຄະນະ ທີ່ສະໂມສອນຂອງແຂວງ, ມີບັນດາການນຳແຂວງ ແລະ ພາກສ່ວນກ່ຽວຂ້ອງເຂົ້າຮ່ວມ.
ໃນພິທີ, ທ່ານ ໂພໄຊ ໄຊຍະສອນ ໄດ້ລາຍງານບາງຜົນສໍາເລັດການຈັດຕັ້ງປະຕິບັດວຽກງານຂອງແຂວງໃນປີ 2022 ໂດຍສະເພາະໄລຍະ 6 ເດືອນຕົ້ນປີ ເປັນຕົ້ນ: ວຽກງານປ້ອງກັນຊາດ-ປ້ອງກັນຄວາມສະຫງົບ, ການເຕີບໂຕເສດຖະກິດຂອງແຂວງ, ວຽກງານວັດທະນະທຳ-ສັງຄົມ, ວຽກງານການພົວພັນຮ່ວມມືກັບຕ່າງປະເທດ ແລະ ລາຍງານສະພາບການຈັດຕັ້ງປະຕິບັດວຽກງານໃນແຕ່ລະຂົງເຂດວຽກງານ ພາຍໃຕ້ການຊີ້ນໍາໆພາຂອງອົງການປົກຄອງແຂວງ, ຂະບວນການກະກຽມສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ ແລະ ການຂຸ້ນຂ້ຽວສຸມໃສ່ຈັດຕັ້ງປະຕິບັດ 2 ວາລະແຫ່ງຊາດ ວ່າດ້ວຍການແກ້ໄຂບັນຫາເສດຖະກິດ-ການເງິນ, ການແກ້ໄຂບັນຫາຢາເສບຕິດ ແລະ ທິດທາງທີ່ຈະສືບຕໍ່ສຸມໃສ່ ໃນອີກ 6 ເດືອນທ້າຍປີ 2022.
ຈາກນັ້ນ, ທ່ານເຈົ້າແຂວງສາລະວັນ ໄດ້ສະເໜີສິ່ງທີ່ເປັນບັນຫາທ້າທາຍຕໍ່ການຊີ້ນຳໆພາ ກໍຄືການພັດທະນາເສດຖະກິດຂອງແຂວງ ບາງດ້ານຍັງມີຄວາມຊັກຊ້າ, ດ້ານການດຶງດູດການລົງທຶນ ຍັງບໍ່ທັນກວ້າງຂວາງ, ມີໜ້ອຍ, ການພັດທະນາຊົນນະບົດ ແກ້ໄຂຄວາມທຸກຍາກຍັງບໍ່ສາມາດບັນລຸໄດ້ຕາມຄາດໝາຍທີ່ວາງໄວ້ ແລະ ບາງເນື້ອໃນຈິດໃຈອັນມີຄວາມຈຳເປັນ, ສຳຄັນ ສະເໜີຂໍໃຫ້ລັດຖະບານ ຊ່ວຍຊຸກຍູ້, ແກ້ໄຂຫຼາຍດ້ານເປັນຕົ້ນ: ບັນດາໂຄງການກໍ່ສ້າງພື້ນຖານໂຄງລ່າງຕ່າງໆ ທີ່ສຳຄັນ ແລະ ມີຄວາມຈຳເປັນ ຕໍ່ກັບການຂົນສົ່ງ, ຜະລິດ, ການຈໍລະຈອນສິນຄ້າຂອງປະຊາຊົນ ແລະ ການກໍ່ສ້າງເສັ້ນທາງການເຊື່ອມຕໍ່ລະຫວ່າງແຂວງຕໍ່ແຂວງ, ຕ່າງປະເທດ, ຊ່ວຍຊຸກຍູ້ໂຄງການສຸກເສີນຟື້ນຟູຊົນລະປະທານຢູ່ພາຍໃນແຂວງ, ບັນດາໂຮງຈັກໂຮງງານ ທີ່ສູນກາງເປັນຜູ້ຄຸ້ມຄອງ ໃນການເສຍພັນທະອາກອນຕ່າງໆຕາມເງື່ອນໄຂຕົວຈິງ ແລະ ດ້ານວຽກງານໄພພິບັດ ທີ່ມີຄວາມຈໍາເປັນທີ່ຈະຕ້ອງແກ້ໄຂໃນການຊ່ວຍເຫຼືອປະຊາຊົນ ໂດຍສະເພາະເຂດທີ່ມີຄວາມສ່ຽງ ເຊັ່ນ: ອາຫານແຫ້ງ, ເຄື່ອງດື່ມ, ເຮືອທ້ອງແບນ ແລະ ອຸປະກອນຮັບໃຊ້ອື່ນໆ ທີ່ສຳຄັນ.
ທ່ານຮອງນາຍົກລັດຖະມົນຕີ ແຫ່ງ ສປປ ລາວ ໃຫ້ກຽດໂອ້ລົມ ແລະ ຊີ້ນຳໃນຫຼາຍບັນຫາ, ພ້ອມທັງໄດ້ເນັ້ນໃຫ້ເອົາໃຈໃສ່ຈັດຕັ້ງປະຕິບັດວາລະແຫ່ງຊາດໃຫ້ເຂົ້າສູ່ລວງເລິກ ແລະ ກາຍເປັນວຽກງານຕົວຈິງ,ນຳພາປະຊາຊົນບັນດາເຜົ່າຜະລິດເປັນສິນຄ້າເພື່ອກ້າວໄປສູ່ການຫັນສັງຄົມບໍລິໂພກ ໄປເປັນສັງຄົມຜູ້ຜະລິດໃນຕໍ່ໜ້າ, ສຸມໃສ່ສົ່ງເສີມການປູກ, ການລ້ຽງ ໃນທ້ອງຖິ່ນ ທີ່ມີທ່າແຮງໃຫ້ໄດ້ຫຼາຍ ຄຽງຄູ່ກັບການລົງກໍ່ສ້າງຮາກຖານການເມືອງ, ເລັ່ງໃສ່ການພັດທະນາຊົນນະບົດ ແລະ ການແກ້ໄຂຄວາມທຸກຍາກ, ເອົາໃຈໃສ່ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງໃຫ້ບັນລຸຕາມຄາດໝາຍ, ປະກອບສ່ວນສ້າງສະຖຽນລະພາບທາງດ້ານການເງິນ, ຄວບຄຸມໄພເງິນເຟີ້, ຕິດຕາມກວດກາລາຄາສິນຄ້າ, ຄຸ້ມຄອງລາຄານໍ້າມັນເຊື້ອໄຟ, ຍົກສູງປະສິດທິພາບໃນການຄຸ້ມຄອງລັດ, ຄຸ້ມຄອງສັງຄົມ.
ເພີ່ມທະວີເອົາໃຈໃສ່ ແລະ ຕິດຕາມຢ່າງໃກ້ຊິດຕໍ່ກັບໄພພິບັດທີ່ອາດຈະເກີດຂຶ້ນຕາມລະດູການ ເພື່ອຫຼີກລ່ຽງຜົນກະທົບ, ກະກຽມດ້ານອຸປະກອນ, ເຄື່ອງອຸປະໂພກ-ບໍລິໂພກທີ່ຈຳເປັນ ໃນການຊ່ວຍເຫຼືອປະຊາຊົນ ກໍຄືສັງຄົມ ໃນເຂດທີ່ສ່ຽງຕໍ່ການເກີດໄພນ້ຳຖ້ວມ ໃຫ້ທ່ວງທັນ ແລະ ມີປະສິດທິພາບ.
#Medialaos MMD
