ທ່ານ ນາງ ຄໍາປິວ ແກ້ວມະນີ ຫົວໜ້າ ອາສາສະໜັກບ້ານ (ອສບ) ກຸ່ມໜອງໜ້ຽວ ໄດ້ໃຫ້ສໍາພາດກັບທີມສື່ມວນຊົນວ່າ: ພາຍໃຕ້ການນໍາພາຂອງຫ້ອງການສາທາລະນະສຸກເມືອງໃນການຈັດຕັ້ງປະຕິບັດທໍາລາຍແຫຼ່ງເພາະພັນໜອນນໍ້າຍຸງລາຍຂອງ ອສບ ກຸ່ມໜອງໜ້ຽວຂອງພວກເຮົາແມ່ນໄດ້ເລີ່ມຈັດຕັ້ງປະຕິບັດແຕ່ຕົ້ນເດືອນມິຖຸນາເປັນຕົ້ນມາ ໂດຍໄດ້ເປີດກອງປະຊຸມປືກສາຫາລືກັບ ອສບ ແຕ່ລະບ້ານ ແລະ ໄດ້ແຕ່ງຕາຕະລາງຂຶ້ນແຜນເພື່ອລົງກວດກາທໍາລາຍແຫຼ່ງເພາະພັນໜອນນໍ້າຍຸງລາຍ, ໃນການລົງກວດການັ້ນພວກເຮົາໄດ້ເຜີຍແຜ່ແນະນໍາໃຫ້ປະຊາຊົນພາຍໃນກຸ່ມໜອງໜ້ຽວໄດ້ຮັບຮູ້ ແລະ ເຂົ້າໃຈກ່ຽວກັບຜົນຮ້າຍຂອງການແຜ່ລະບາດພະຍາດໄຂ້ຍຸງລາຍ ແລະ ໄດ້ອະທິບາຍກ່ຽວກັບການປະຕິບັດ 5 ປ ທີ່ທາງກະຊວງສາທາລະນະສຸກວາງອອກ, ພ້ອມນັ້ນກໍ ໄດ້ນໍາພາປະຊາຊົນຖາງປ່າບ່ອນທີ່ຮົກເຮື້ອ, ບ່ອນທີ່ມີຕີນລົດເກົ່າ, ກະໂປະ, ກະປອງ, ບ່ອນທີ່ມີນໍ້າຂັງ ແລະ ອື່ນໆ ທີ່ເປັນສາເຫດທີ່ພາໃຫ້ເກີດມີ ໜອນນໍ້າຍຸງລາຍ.
ຜ່ານການຈັດຕັ້ງປະຕິບັດຜ່ານມາປະຊາຊົນກໍມີການຕື່ນຕົວຫຼາຍ ແລະ ໄດ້ເອົາໃຈໃສ່ອະນາໄມຖັງນໍ້າພາຍໃນຄົວເຮືອນຂອງຕົນ, ອະນາໄມຖາງປ່າອ້ອມຮົ້ວພາຍໃນເຮືຶອນບ່ອນທີ່ເປັນສາເຫດທີ່ພາໃຫ້ເກີດມີໜອນນໍ້າຍຸງລາຍ ແລະ ໃນການລົງກວດກາແຕ່ລະຄັ້ງພວກເຮົາໄດ້ສະຫຼຸບລາຍງານໃຫ້ອົງການປົກຄອງບ້ານຂອງແຕ່ລະບ້ານ ແລະ ສະຫຼຸບສົ່ງໃຫ້ຫ້ອງການສາທາລະນະສຸກເມືອງ.
ນາງ ຄໍາປິວ ແກ້ວມະນີ ເວົ້າອີກວ່າ: ໃນການຈັດຕັ້ງປະຕິບັດຂອງ ອສບ ກຸ່ມໜອງໜ້ຽວ ແມ່ນຈັດຕັ້ງອາທິດລະຄັ້ງ ໂດຍຈະໝູນວຽນໄປແຕ່ລະບ້ານໃຫ້ຄົບ 8 ບ້ານ, ກຸ່ມໜອງໜ້ຽວມີພົນລະເມືອງທັງໝົດ 33 ພັນກວ່າຄົນ ມີ 7.206 ຫຼັງຄາເຮືອນ, ມີ 541 ໜ່ວຍ, ຜ່ານການຈັດຕັ້ງປະຕິບັດມາກວດພົບ ໜອນນໍ້າ 75 ຫຼັງຄາເຮືອນ. ສໍາລັບ ປີ 2022 ພາຍໃນກຸ່ມໜອງໜ້ຽວມີຜູ້ຕິດເຊື້ອໄຂ້ຍຸງລາຍ ເຖິງ 700 ກວ່າຄົນ , ເສຍຊີວິດ 2 ຄົນ.
#Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)
