ສື່ມວນຊົນກອງທັບ ແມ່ນເປັນກະບອກສຽງສຳຄັນໃນການນຳເອົາແນວທາງນະໂຍບາຍຂອງພັກ, ກົດໝາຍຂອງລັດ ແລະ ຂອງກອງທັບ ເພື່ອເຜີຍແຜ່ຂໍ້ມູນຂ່າວສານ, ຜົນງານການເຄື່ອນໄຫວຂອງກຳລັງປະກອບອາວຸດຂອງກອງທັບ. ໃນແຕ່ລະໄລຍະ ໃຫ້ແກ່ສັງຄົມໄດ້ຮັບຮູ້ຢ່າງທົ່ວເຖິງ, ເພື່ອໂຄສະນາສຶກສາອົບຮົມການເມືອງ – ແນວຄິດ ໃຫ້ນາຍ ແລະ ພົນທະຫານໃນທົ່ວກອງທັບປະຊາຊົນລາວ ໄດ້ເຊື່ອມຊຶມກຳແໜ້ນຕໍ່ແນວທາງປ່ຽນໃໝ່ຂອງພັກ – ລັດ, ກໍ່ຄືມະຕິຄຳສັ່ງຕ່າງໆ ແລະ ແນວທາງປ້ອງກັນຊາດ-ປ້ອງກັນຄວາມສະຫງົບ ຢ່າງເລິກເຊິ່ງ, ສ້າງທັດສະນະໃຫ້ເຂົາເຈົ້າມີແນວຄິດການເມືອງໜັກແໜ້ນ, ອຸ່ນອຽນທຸ່ນທ່ຽງ, ບຸກບືນຫ້າວຫັນ ຕໍ່ໜ້າທີ່ການເມືອງຂອງຕົນທີໄດ້ຮັບມອບໝາຍດ້ວຍຄວາມຮັບຜິດຊອບສູງ.
ເນື່ອງໃນໂອກາດວັນສ້າງຕັ້ງສື່ມວນຊົນລາວ ແລະ ການພິມຈຳໜ່າຍ ຄົບຮອບ 72 ປີ. ສະຫາຍ ພັນເອກ ແປ້ນຄຳ ບຸດຈັນແພງ ຫົວໜ້າກົມໂຄສະນາອົບຮົມ ກົມໃຫ່ຍການເມືອງກອງທັບໄດ້ໃຫ້ຮູ້ວ່າ: ກົມໂຄສະນາອົບຮົມ ໃນຖານະເປັນເສນາທິການໃຫ້ແກ່ກົມໃຫຍ່ການເມືອງກອງທັບ, ໃນການຄົ້ນຄວ້າວາງທິດທາງແຜນການ ແລະ ວິທີການດຳເນີນວຽກງານໂຄສະນາອົບຮົມໃນແຕ່ລະໄລຍະ, ພ້ອມນັ້ນກໍ່ເປັນອົງການແນະນໍາ, ຊຸກຍູ້, ກວດກາການປະຕິບັດແຜນການດັ່ງກ່າວໃນທົ່ວກອງທັບ. ຊີ້ນຳບັນດາກົມກອງໃນທົ່ວກອງທັບນຳໃຊ້ສື່ມວນຊົນຢ່າງກວ້າງຂວາງ ໃນການຈັດຕັ້ງໂຄສະນາມູນເຊື້ອຂອງຊາດ, ຂອງກອງທັບ; ໂຄສະນາຜົນງານ ແລະ ເຫດການສໍາຄັນຕ່າງໆໃນແຕ່ລະໄລຍະ, ຕິດຕາມ ແລະ ແນະນໍາການເຄື່ອນໄຫວຂອງບັນດາສື່ມວນຊົນໃນກອງທັບ ໃຫ້ເປັນກະບອກສຽງອັນແຫຼມຄົມ. ສົມທົບກັບຄະນະໂຄສະນາອົບຮົມສູນກາງພັກ, ບັນດາອົງການສື່ມວນຊົນທັງພາກລັດ ແລະ ເອກະຊົນ, ເພື່ອຖອດຖອນ ແລກປ່ຽນບົດຮຽນດ້ານວິຊາສະເພາະເຮັດໃຫ້ການປະຕິບັດໜ້າທີ່ການເມືອງຂອງສື່ໃນກອງທັບນັບມື້ນັບໄດ້ຮັບຜົນດີຍິ່ງຂຶ້ນ.
ໃນຕະຫຼອດໄລຍະຜ່ານມາ ກົມໂຄສະນາອົບຮົມ ໄດ້ເອົາໃຈໃສ່ນຳພາ-ຊີ້ນຳວຽກງານສື່ມວນຊົນໃນກອງທັບ ໂດຍຖືເອົາວຽກງານໂຄສະນາສຶກສາອົບຮົມການເມືອງແນວຄິດເປັນວຽກງານໜຶ່ງທີ່ສໍາຄັນ ໂດຍສຸມໃສ່ໂຄສະນາຜ່ານພາຫະນະສື່ມວນຊົນກອງທັບ ເປັນຕົ້ນແມ່ນ ເຜີຍແຜ່ແນວທາງການເມືອງ, ມະຕິຄຳສັ່ງຕ່າງໆ ຂອງພັກ, ລັດ, ຂອງອົງຄະນະພັກະຊວງປ້ອງກັນປະເທດ, ບັນດາທິດທາງແຜນນະໂຍບາຍຕ່າງໆ ໃຫ້ນາຍ ແລະ ພົນທະຫານ, ປະຊາຊົນລາວບັນດາເຜົ່າ ໃຫ້ຮູ້ຢ່າງທົ່ວເຖິງ, ນອກຈາກນັ້ນ ຍັງເປັນເຈົ້າການໂຄສະນາປຸກລະດົມຂະບວນການຕ່າງໆ. ພາຍໃນກອງທັບ, ຕ້ານປະກົດການຫຍໍ້ທໍ້ທີ່ເກີດຂຶ້ນໃນກອງທັບ, ຕອບຕ້ານທຸກຖ້ອຍທຳນອງ ໂຄສະນາທີ່ບິດເບືອນໃສ່ຮ້າຍປ້າຍສີ ພັກ-ລັດ ແລະ ກອງທັບ, ສາມາດເວົ້າໄດ້ວ່າ:“ສື່ມວນຊົນເປັນອາວຸດອັນແຫຼມຄົມ, ເປັນພາຫະນະສຳຄັນທີ່ສຸດລະຫວ່າງພັກກັບປະຊາຊົນ ທັງເປັນຜູ້ນຳເອົາແນວຄິດ, ທິດສະດີປະຕິວັດ, ແນວທາງນະໂຍບາຍຂອງພັກໄປສູ່ປະຊາຊົນ, ທັງເປັນຜູ້ນໍາເອົາຄວາມຄິດຄວາມເຫັນ, ຄວາມມຸ້ງມາດປາຖະໜາຂອງປະຊາຊົນມາສ່ອງແສງໃຫ້ພັກໄດ້ຮັບຮູ້ເພື່ອແກ້ໄຂໄດ້ທັນເວລາ”. ໂດຍເຫັນໄດ້ບົດບາດ-ຄວາມໝາຍສຳຄັນດັ່ງກ່າວ ສື່ມວນຊົນຂອງກອງທັບ ຍາມໃດກໍ່ເປັນກະບອກສຽງດ້ານວຽກງານສຶກສາອົບຮົມການເມືອງແນວຄິດ ໃຫ້ນາຍ ແລະ ພົນທະຫານໃນທົ່ວກອງທັບ ໃຫ້ມີຄວາມໜັກແໜ້ນ, ມີຄວາມສາມັກຄີກົມກຽວເປັນປືກແຜ່ນອັນດຽວ, ເຮັດຫຼ້ອນໜ້າທີ່ການເມືອງທີ່ພັກ-ລັດ ແລະ ປະຊາຊົນມອບໝາຍໃຫ້. ທັງເປັນກະບອກສຽງອັນສໍາຄັນໃນການໂຄສະນາສຶກສາອົບຮົມ; ນໍາເອົາມູນເຊື້ອ, ແນວທາງແຜນນະໂຍບາຍຂອງພັກ – ລັດ ເຂົ້າສູ່ຊີວິດຕົວຈິງຂອງປະຊາຊົນລາວບັນດາເຜົ່າ, ພະນັກງານຂອງລັດຖະກອນ, ນາຍ ແລະ ພົນທະຫານໃນທົ່ວກອງທັບ.
ສະຫາຍ ພັນເອກ ແປ້ນຄຳ ບຸດຈັນແພງ ໄດ້ໃຫ້ຮູ້ຕື່ມວ່າ: ສຳລັບແຜນການ ແລະ ການເຄື່ອນໄຫວຊີ້ນຳວຽກງານສື່ມວຊົນກອງທັບໃນຕໍ່ໜ້າ ສື່ມວນຊົນກອງທັບໄດ້ຍົກສູງບົດບາດໜ້າທີ່ຂອງຕົນກາຍເປັນເຄື່ອງມືອັນແຫຼມຄົມ,ເປັນກະບອກສຽງອັນສໍາຄັນໃຫ້ແກ່ຄະນະພັກກະຊວງປ້ອງກັນປະເທດໄດ້ດີຕະຫຼອດມາ. ເພື່ອສືບຕໍ່ເຮັດໃຫ້ວຽກງານໂຄສະນາອົບຮົມ ມີບາດກ້າວຂະຫຍາຍຕົວ ແລະ ເຮັດສໍາເລັດຕາມພາລະບົດບາດໜ້າທີ່ອັນມີກຽດ ທີ່ໄດ້ຮັບມອບໝາຍໃຫ້ມີຜົນສຳເລັດ, ໂດຍຈະໄດ້ສຸມໃສ່ຊີ້ນຳຢ່າງໃກ້ສິດ ບັນດາກົມກອງສື່ມວນຊົນໃນກອງທັບ ເຮັດໃຫ້ກົມກອງດັ່ງກ່າວນັບມື້ນັບເຕີບໃຫຍ່ຂະຫຍາຍຕົວທັງດ້ານປະລິມານ ແລະ ຄຸນນະພາບ ສົມທົບກັບຄະນະພັກ-ຄະນະບັນຊາບັນດາກົມກອງສື່ ສ້າງຖັນແຖວບຸກຄະລາກອນຮັບປະກັນການປະຕິບັດໜ້າທີ່ການເມືອງຕາມທີ່ໄດ້ຮັບມອບໝາຍ, ສືບຕໍ່ເອົາໃຈໃສ່ຄັດເລືອກ ແລະ ສ້າງຖັນແຖວພະນັກງານຂ່າວໃຫ້ມີຄຸນນະພາບ, ເພີ່ມທະວີຄວາມເປັນເຈົ້າການໃນການສັງເກດຕີລາຄາສະພາບການ, ສັງລວມບັນດາທິດສະດີໃນການກໍ່ສ້າງກຳລັງປະກອບອາວຸດ, ກໍ່ສ້າງກອງທັບ, ການຈັດຕັ້ງປະຕິບັດແນວທາງປ້ອງກັນຊາດທົ່ວປວງຊົນຮອບດ້ານຂອງພັກ ແລະ ໜ້າທີ່ປ້ອງກັນຊາດໃນສະພາບການໃໝ່, ເປັນເຈົ້າການຈັດຕັ້ງໂຄສະນາແນວທາງແຜນນະໂຍບາຍຂອງພັກ, ກົດໝາຍຂອງລັດ, ບັນດາຂໍ້ກຳນົດກົດລະບຽບຂອງກອງທັບຢ່າງກວ້າງຂວາງເລິກເຊິ່ງ ຕິດພັນກັບການເຄື່ອນໄຫວຊີວິດຕົວຈິງຂອງນາຍ ແລະ ພົນທະຫານຢູ່ບັນດາກົມກອງ, ທ້ອງຖິ່ນ, ເຂດຫ່າງໄກສອກຫຼີກ, ຈຸດຍຸດທະສາດການພັດທະນາ ແລະ ຂົງເຂດມັກເກີດມີໄພພິບັດທຳມະຊາດເປັນປະຈຳ; ໂຄສະນາຢ່າງເລິກເຊິ່ງຂະບວນການສ້າງ ໜ່ວຍພັກປອດໄສ ເຂັ້ມແຂງ ໜັກແໜ້ນ, ກອງປອດໄສ ປອດໄພປອດຄະດີ ແລະຂະບວນການສ້າງນັກຮົບ ແລະ ກົມກອງວັດທະນະທຳ, ຕິດພັນກັບການໂຄສະນາ 4 ໜ້າທີ່ໃຫຍ່ 26 ແຜນງານຂອງກະຊວງປ້ອງກັນປະເທດ ໄປພ້ອມໆກັບການໂຄສະນາວຽກງານ 3 ສ້າງທີ່ພັກໄດ້ວາງອອກ, ຕ້ອງເປັນເຈົ້າການສັງເກດເຫັນສົ່ງເສີມປັດໃຈໃໝ່ທີ່ເປັນແບບຢ່າງກ້າວໜ້າ, ບຸກຄົນດີເດັ່ນເປັນແວ່ນແຍງໃນໄລຍະໃໝ່ ເພື່ອໂຄສະນາໃຫ້ກວ້າງຂວາງ ແລະ ເລິກເຊິ່ງ.
ໂດຍ: ຕຸ້ຍ ອິນທະວົງສ໌
