ໃນວັນທີ 19 ສິງຫາ ຜ່ານມາ, ສະຫາຍ ພົນຕີ ຈັນທອງ ສອນຕະອາດ ຮອງລັດຖະມົນຕີ ກະຊວງປ້ອງກັນປະເທດ ພ້ອມດ້ວຍຄະນະ ໄດ້ລົງກວດກາ ຄວາມພ້ອມຮອບດ້ານ ພາກສະໜາມຕົວຈິງ ຢູ່ອ່າງນ້ຳຫຸມ ເມືອງນາຊາຍທອງ ນະຄອນຫຼວງວຽງຈັນ ເຊິ່ງຈະຈັດໃນຕົ້ນເດືອນກັນຍາ ທີ່ຈະມາເຖິງມໍ່ໆນີ້, ເພື່ອຮັບປະກັນໃຫ້ແກ່ການຝືກຊ້ອມກ້ອມກູ້ໄພພິບບັດຮ່ວມ 3 ກອງທັບ (ລາວ-ຫວຽດນາມ ແລະ ກຳປູເຈຍ).
ໃນໂອກາດດັ່ງກ່າວ, ກໍ່ໄດ້ຮັບຟັງການລາຍງານກະກຽມຄວາມພ້ອມຮອບດ້ານຈາກອະນຸກຳມະການຮັບຜິດຊອບຊີ້ນຳລວມການຝືກຊ້ອມກອບກູ້ໄພພິບັດຮ່ວມ 3 ກອງທັບ, ເຊິ່ງເຫັນວ່າການກະກຽມຄວາມພ້ອມແຕ່ລະໜ້າວຽກ ແມ່ນສາມາດຮັບປະກັນໄດ້, ເປັນຕົ້ນແມ່ນຄວາມພ້ອມດ້ານການຝຶກຊ້ອມຊອກຄົ້ນ-ກອບກູ້ຜູ້ປະສົບໄພ ແລະ ຍົກຍ້າຍເອົາ ຜູ້ທີ່ຕົກຄ້າງຢູ່ບ້ານເຮືອນ ແລະ ເກາະ, ດອນ, ກອບກູ້ເອົາຜູ້ທີ່ຕົກຄ້າງຢູ່ຕາມຈຸດຕ່າງໆທີ່ເຮືອເຂົ້າເຖິງດ້ວຍເຮືອບິນ, ກອບກູ້ຊອກ ຄົ້ນຜູ້ປະສົບໄພທາງອາກາດມີຂັ້ນຕອນຄື: ນໍາສົ່ງໜ່ວຍຊອກ ຄົ້ນດ້ວຍເຮືອບິນເຂົ້າໄປເຂດທຸລະກັນດານທີ່ບໍ່ອາດເຂົ້າໄປດ້ວຍທາງບົກ ແລະ ທາງນໍ້າ, ນໍາສົ່ງຄົນ ເຈັບໜັກດ້ວຍຍົນໄປໂຮງໝໍແນວຫຼັງ, ໜ່ວຍແພດສຸກເສີນປະຖົມພະຍາບານຜູ້ບາດເຈັບຢູ່ທ່າເຮືອ ແລະ ຈັດສົ່ງໄປໂຮງໝໍພາກສະໜາມ.
ຊອກຄົ້ນ ແລະ ກອບກູ້ຜູ້ ປະສົບໄພທາງບົກມີຂັ້ນຕອນຄື: ຊອກຄົ້ນຜູ້ປະສົບໄພຂີ້ຕົມທັບຖົມ ເຄື່ອນທັບດ້ວຍໜ່ວຍກູ້ໄພ, ຊອກ ຄົ້ນກອບກູ້ຜູ້ປະສົບໄພໜ່ວຍ ແພດສຸກເສີນປະຖົມພະຍາບານ ຜູ້ບາດເຈັບ ແລະ ຈັດສົ່ງໄປໂຮງໝໍພາກສະໜາມດ້ວຍລົດ, ນໍາໃຊ້ໜ່ວຍກອບກູ້ເຂົ້າຊ່ວຍເຫຼືອຜູ້ຖືກສານພິດ, ນໍາໃຊ້ໜ່ວຍເຄມີເຂົ້າໄປກວດກາໃນເຂດທີ່ສົງໃສວ່າມີສານເຄມີຮົ້ວໄຫຼ, ນໍາໃຊ້ຜູ້ວິເຄາະ ເຄມີວິເຄາະຊອກຫາຊະນິດເຄມີເພື່ອຫາວິທີແກ້ໄຂໃຫ້ທັນເວລາ, ນໍາໃຊ້ໜ່ວຍລົບລ້າງປະຕິບັດລົບລ້າງຜູ້ທີຖືກສານເຄມີ ແລະ ມອບສົ່ງໃຫ້ໜ່ວຍແພດປິ່ນປົວ ແລະ ຍົກໃຫ້ເຫັນວຽກງານຮັບປະກັນ ຄວາມປອດໄພ, ການຈັດສັນສະຖານທີ່ບ່ອນຝຶກຊ້ອມ, ການອະນາໄມປັບປຸງສະຖານທີ່ບ່ອນພັກເຊົາ, ບ່ອນກິນຢູ່ໃຫ້ແທດເໝາະກັບເງື່ອນໄຂຕົວຈິງຂອງສະໜາມ ຝຶກແອບ, ເຊິ່ງຈະກໍານົດໃຫ້ເປັນ ສະຖານທີ່ພັກເຊົາຂອງກຳລັງ ແຕ່ລະປະເທດ, ວຽກງານເຕັກນິກ ເປັນວຽກງານໜຶ່ງທີ່ສຳຄັນ ແລະ ຈຳເປັນທີ່ຂາດບໍ່ໄດ້ ໃນການຮັບປະກັນທາງດ້ານພາຫະນະ – ເຕັກນິກ ແລະ ອຸປະກອນຮັບໃຊ້ໃຫ້ແກ່ການກະກຽມຄວາມພ້ອມເຂົ້າໃນການຝຶກຊ້ອມໄພພິບັດຮ່ວມ 3 ກອງທັບ (ລາວ-ຫວຽດນາມ-ກຳປູເຈຍ) ໃຫ້ມີຄວາມຮັບປະກັນ ແລະມີຄວາມປອດໄພ 100%, ພ້ອມທັງເປັນການເພີ່ມທະວີການພົວພັນຮ່ວມມືທາງດ້ານການກອບກູ້ໄພພິບັດຮ່ວມລະຫວ່າງ 3 ກອງທັບ ໃຫ້ນັບມື້ນັບມີຄວາມເຕີບໃຫ່ຍເຂັ້ມແຂງ ແລະ ສາມາດຕອບໂຕ້ໄພພິບັດເກີດຂຶ້ນໄດ້ຢ່າງທັນການ.
