ໃນວັນທີ 18 ສິງຫາ 2022, ທ່ານ ລັດສະໝີ ແກ້ວມະນີ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ ຕວັກກີ ທີ່ມີສໍານັກງານຕັ້ງຢູ່ເຊີແນວ ປະເທດສະວິດເຊີແລນ, ໄດ້ເປັນກຽດຕາງໜ້າໃຫ້ລັດຖະບານ ຕ້ອນຮັບ ແລະ ມອບສານແຕ່ງຕັ້ງ ຂອງ ທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ ລັດຖະມົນຕີກະຊວງການຕ່າງປະເທດ ໃຫ້ແກ່ ທ່ານ Nihat OZPINAR ນັກທຸລະກິດສັນຊາດຕວັກກີ ເພື່ອດໍາລົງຕໍາແໜ່ງເປັນກົງສູນກິດຕິມະສັກ ແຫ່ງ ສປປ ລາວ ປະຈໍາຕວັກກີ ໂດຍກວມເອົາທຸກແຂວງຂອງຕວັກກີ.
ໃນໂອກາດນີ້, ທ່ານ ລັດສະໝີ ແກ້ວມະນີ ໄດ້ສະແດງຄວາມຊົມເຊີຍ ທ່ານ Nihat OZPINAR ຕໍ່ການແຕ່ງຕັ້ງດັ່ງກ່າວ, ພ້ອມເຊື່ອໝັ້ນວ່າ ດ້ວຍຄຸນສົມບັດອັນພຽບພ້ອມ ບວກກັບຄວາມຮູ້ຄວາມສາມາດ ແລະ ປະສົບການສູງ ທ່ານ Nihat OZPINAR ຈະປະຕິບັດໜ້າທີ່ອັນມີກຽດນີ້ ດ້ວຍຄວາມຫ້າວຫັນ ແລະ ມີຜົນສໍາເລັດເປັນຢ່າງດີ ແນໃສ່ປະກອບສ່ວນເຂົ້າໃນການເສີມຂະຫຍາຍສາຍພົວພັນຮ່ວມມືສອງຝ່າຍ ລາວ ແລະ ຕວັກກີ ໃຫ້ນັບມື້ນັບເພີ່ມທະວີ.
ທ່ານ Nihat OZPINAR ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ພິທີມອບ-ຮັບສານແຕ່ງຕັ້ງຢ່າງເປັນທາງການໃນຄັ້ງນີ້ ຊຶ່ງຕົນເອງຮູ້ສຶກເປັນກຽດຢ່າງສູງທີ່ໄດ້ຮັບຄວາມເຊື່ອໝັ້ນ ແລະ ໄວ້ວາງໃຈຈາກລັດຖະບານ ແຫ່ງ ສປປ ລາວ ເປັນກົງສູນກິດຕິມະສັກ ແຫ່ງ ສປປ ລາວ ປະຈໍາ ຕວັກກີ ແລະ ຢືນຢັນວ່າ ຈະປະຕິບັດໜ້າທີ່ອັນຊົງກຽດນີ້ດ້ວຍຄວາມຮັບຜິດຊອບສູງ ກໍຄືປະສານສົມທົບ ແໜ້ນກັບພາກສ່ວນກ່ຽວຂ້ອງຂອງ ສປປ ລາວ ແລະ ຕວັກກີ ລວມທັງສະຖານເອກອັກຄະລັດຖະທູດ ແຫ່ງ ສປປ ລາວ ປະຈໍາຕວັກກີ ທີ່ມີສໍານັກງານຕັ້ງຢູ່ ເຊີແນວ, ສະວິດເຊີແລນ, ເພື່ອໃຫ້ປະສົບຜົນສໍາເລັດຈົບງາມ.
ພິທີເປີດຫ້ອງການກົງສູນກິດຕິມະສັກ ແຫ່ງ ສປປ ລາວ ປະຈໍາຕວັກກີ ທີ່ນະຄອນຫຼວງອັງກາຣາ ຢ່າງເປັນທາງການ ຈະຈັດຂຶ້ນໃນໄວໆນີ້.
ຂ່າວ: ກະຊວງການຕ່າງປະເທດ
