ຂ່າວຕ່າງປະເທດລາຍງານ ເມື່ອວັນທີ 9 ສິງຫາທີ່ຜ່ານມາ, ອີງຕາມບົດລາຍງານຜົນການສຶກສາຂອງສະຖາບັນວິໄຈເພື່ອການຈ້າງງານ (IAB) ເຖິງສະຖານະການຂອງເສດຖະກິດເຢຍລະມັນຈາກຜົນກະທົບຂອງສະຖານະການໂລກໃນປັດຈຸບັນ ແລະ ລາຄາພະລັງງານທີ່ເພີ່ມສູງຂຶ້ນວ່າ ຈະເຮັດໃຫ້ເຢຍລະມັນສູນເສຍມູນຄ່າເພີ່ມທາງດ້ານເສດຖະກິດຫຼາຍກວ່າ 265.000 ລ້ານໂດລາພາຍໃນປີ 2030.
ບົດລາຍງານການວິໄຈລະບຸວ່າ ທັງສະຖານະການໂລກໃນປັດຈຸບັນ ແລະ ລາຄາພະລັງງານທີ່ເພີ່ມສູງຂຶ້ນສົ່ງຜົນກະທົບດ້ານລົບຕໍ່ຕະຫຼາດແຮງງານຂອງເຢຍລະມັນ ໂດຍໃນປີ 2023 ເຢຍລະມັນຈະມີອັດຕາການຂະຫຍາຍຕົວທາງດ້ານເສດຖະກິດຫຼຸດລົງທີ່ 1,7% ແລະ ຈະມີຄົນເຂົ້າສູ່ພາກແຮງງານໜ້ອຍກວ່າ 240.000 ຄົນ. ລະດັບການຈ້າງງານຈະຍັງຄົງຢູ່ໃນລະດັບນີ້ໄປຈົນເຖິງປີ 2026 ລວມທັງມາດຕະການຕ່າງໆ ຊ່ວຍຫຼຸດຜົນກະທົບທາງລົບ ຈົນເລີ່ມເພີ່ມການຈ້າງງານ 60.000 ຕຳແໜ່ງໄດ້ໃນປີ 2030. ສຳລັບພາກເສດຖະກິດທີ່ຈະໜັກທີ່ສຸດຄື ອຸດສາຫະກຳການບໍລິການ ຊຶ່ງໜັກສຸດໃນໄລຍະພະຍາດໂຄວິດ-19 ແຜ່ລະບາດ ແລະ ຍັງຕ້ອງມາພົບກັບສະພາບທີ່ອຳນາດການຈັບຈ່າຍຂອງຜູ້ບໍລິໂພກຝືດເຄືອງສ່ວນຂະແໜງພະລັງງານເຊັ່ນ: ອຸດສາຫະກຳເຄມີ ແລະ ການຜະລິດເຫຼັກ ຈະພົບກັບຜົນກະທົບໜັກທີ່ສຸດພິເສດ.
ຖ້າລາຄາພະລັງງານທີ່ທຸກວັນນີ້ເພີ່ມສູງໄປແລ້ວ 160% ເພີ່ມຂຶ້ນອີກເປັນສອງເທົ່າຜົນຜະລິດທາງດ້ານເສດຖະກິດຂອງເຢຍລະມັນຈະຫຼຸດລົງອີກ 4% ເຖິງແມ່ນວ່າສະຖານະການໂລກຈະດີຂຶ້ນແລ້ວກໍຕາມ. ພາຍໃຕ້ການບໍລິໂພກນີ້ຈະມີການຈ້າງງານຄົນໜ້ອຍກວ່າ 660.000 ຄົນຫຼັງຈາກຜ່ານໄປ 3 ປີ ແລະ ຈະຍັງເພີ່ມໜ້ອຍກວ່າ 60.000 ຄົນໃນປີ 2030.
