ກອງປະຊຸມສ້າງຄວາມເຂັ້ມແຂງວຽກງານກວດກາໃຫ້ພະນັກງານອົງການໄອຍະການປະຊາຊົນ 5 ແຂວງພາກເໜືອ ໄດ້ຈັດຂຶ້ນ ໃນລະຫວ່າງວັນທີ 9-12 ສິງຫາ 2022 ທີ່ຫ້ອງປະຊຸມອົງການໄອຍະການປະຊາຊົນແຂວງຫຼວງພະບາງ, ໂດຍເປັນປະທານຮ່ວມຂອງ ທ່ານ ນາງ ພອນທິບ ສາວະລີ ກໍາມະການຄະນະບໍລິຫານງານພັກ ຮອງປະທານກວດກາພັກ ຫົວໜ້າກົມກວດກາ ອົງການໄອຍະການປະຊາຊົນສູງສຸດ ແລະ ທ່ານ ຈອນ ຄອນນໍລີ ຜູ້ອໍານວຍການ ສະຖາບັນຊ່ວຍເຫຼືອທາງດ້ານກົດໝາຍ ແລະ ວິຊາການເອວສະຕາ (ILSTA), ມີນັກວິທະຍາກອນ, ຜູ້ຊ່ຽວຊານ ທີ່ມາຈາກ ອົງການເອວສະຕາ (ILSTA), ກົມຕ້ານ ແລະ ກວດສອບການສໍ້ລາດບັງຫຼວງ, ອົງການກວດກາແຫ່ງລັດ ມີບັນດານັກສຳມະນາກອນ ທີ່ມາຈາກອົງການໄອຍະການປະຊາຊົນ 5 ແຂວງພາກເໜືອ ຄື: ແຂວງຜົ້ງສາລີ, ບໍ່ແກ້ວ, ຫຼວງນໍ້າທາ, ອຸດົມໄຊ, ຫຼວງພະບາງ ເຂົ້າຮ່ວມ.
ໃນກອງປະຊຸມ ທ່ານ ນາງ ພອນທິບ ສາວະລີ ໄດ້ກ່າວເປີດກອງປະຊຸມ ໂດຍໄດ້ຊີ້ໃຫ້ເຫັນ ເຫດຜົນ ແລະ ຄວາມຈຳເປັນໃນການຝຶກອົບຮົມໃນຄັ້ງນີ້ ພ້ອມທັງໄດ້ຊີ້ນໍາ ແລະ ເນັ້ນຕໍ່ຜູ້ທີ່ເຂົ້າຮ່ວມສຳມະນາ ໃຫ້ເພີ່ມທະວີເອົາໃຈໃສ່ຢ່າງຕັ້ງໜ້າໃນການແລກປ່ຽນຖອດຖອນບົດຮຽນທາງດ້ານປະສົບການນຳຄູ-ອາຈານ, ຜູ້ເຂົ້າຮ່ວມດ້ວຍກັນ ກຳແໜ້ນທາງດ້ານຫຼັກການ ບົດຮຽນ ແລະ ພ້ອມທັງນໍາໄປຈັດຕັ້ງຜັນຂະຫຍາຍເຂົ້າໃນການປະຕິບັດວຽກງານກວດກາຂອງອົງການໄອຍະການປະຊາຊົນ ຢ່າງມີປະສິດທິຜົນ ເຮັດໃຫ້ອົງການໄອຍະການປະຊາຊົນ ປອດໃສ, ເຂັ້ມແຂງ ແລະ ໜັກແໜ້ນ, ຮັບປະກັນການປະຕິບັດພາລະບົດບາດ, ສິດ ແລະ ໜ້າທີ່ຂອງຕົນໃຫ້ຖືກຕ້ອງ ມີຄວາມເປັນເອກະພາບຕາມກົດໝາຍ ແລະ ມີຜົນສໍາເລັດ ປະກອບສ່ວນເສີມຂະຫຍາຍບົດບາດການນຳພາຂອງພັກ ຢູ່ອົງການໄອຍະການປະຊາຊົນແຕ່ລະຂັ້ນໃນການ ພັດທະນາວຽກງານກວດກາໃຫ້ເປັນລະບົບ ແລະ ສອດຄ່ອງກັບສະພາບຕົວຈິງໃນປັດຈຸບັນ.
ການຈັດສຳມະນາໃນຄັ້ງນີ້ ເພື່ອເຮັດໃຫ້ພະນັກງານອົງການໄອຍະການປະຊາຊົນ, ອົງການໄອຍະການທະຫານ, ອົງການກວດກາລັດ ແລະ ເຈົ້າໜ້າທີ່ ປກສ ບັນດາແຂວງ ພາກເໜືອ ມີຄວາມຮັບຮູ້ ແລະ ເຂົ້າໃຈຢ່າງເລິກເຊິ່ງ ກ່ຽວກັບວຽກງານກວດກາ, ການຕ້ານການສໍ້ລາດບັງຫຼວງ, ການຕ້ານການຟອກເງິນ, ການຕ້ານການສະໜອງທຶນໃຫ້ຜູ້ກໍ່ການຮ້າຍ ແລະ ການແກ້ໄຂຄຳຮ້ອງທຸກທີ່ຕິດພັນວຽກງານກວດກາ.
(ຂ່າວ: ຈະເລີນສິນ)
