ຕາມຂ່າວຈາກ ເລີ ຟິກາໂຣ(Le Figaro) ໜັງສືພິມ ປະຈໍາວັນ ຂອງຝຣັ່ງລາຍງນວ່າ: ຝຣັ່ງ ກວດພົບ ເຊື້ອພະຍາດ ໄຂ້ຫວັດ ສັດປີກ ຊະນິດ ຮ້າຍແຮງ ລະບາດໜັກ ຢູ່ທີ່ຟາມ ໄກ່ງວງ ໃນພາກເໜືອ ຂອງປະເທດ ເຮັດໃຫ້ມີ ການກຳຈັດ ໄກ່ງວງ ຢ່າງໜ້ອຍ 8.000 ໂຕ ພ້ອມທັງ ຈັດຕັ້ງ ເຂດປ້ອງກັນ ແລະ ເຝົ້າລະວັງ ພາຍໃນ ລັດສະໜີ 3-10 ກິໂລແມັດ.
ນອກນີ້ ຍັງມີ ການບັງຄັບໃຊ້ ຂໍ້ກຳນົດ ສະເພາະ ໃນສະຖານທີ່ ລ້ຽງສັດປີກ ແລະ ນົກທຸກແຫ່ງ ໂດຍສະເພາະ ຄຳສັ່ງຫ້າມ ເຄື່ອນຍ້າຍ ສັດປີກ ແລະ ນົກລ້ຽງ ໃນກົງ. ດ້ານໜ່ວຍງານ ບໍລິການ ຂອງລັດ ໄດ້ເຮັດວຽກ ຮ່ວມກັບ ບັນດາ ຜູ້ເພາະລ້ຽງ ແນວພັນສັດປີກ ຊຶ່ງຈະໄດ້ຮັບ ເງິນຊົດເຊີຍ ຈາກຄວາມ ສູນເສຍ ທີ່ເກີດຂຶ້ນ ໃນຄັ້ງນີ້.
ຝຣັ່ງ ລາຍງານ ການລະບາດ ຂອງເຊື້ອ ໄຂ້ຫວັດ ສັດປີກ ຊະນິດ ຮຸນແຮງ ເປັນກຸ່ມກ້ອນ ຫລາຍກວ່າ1.3000 ກຸ່ມ ແລະ ສັ່ງກຳຈັດ ສັດປີກ 20 ລ້ານໂຕ ຕັ້ງແຕ່ ເດືອນພະຈິກ ປີກາຍນີ້ ໂດຍມີ ການກວດພົບ ໄຂ້ຫວັດ ຊະນິດ ຮຸນແຮງ ລະບາດ ເປັນກຸ່ມກ້ອນ 500 ກຸ່ມ ແລະ ກຳຈັດ ສັດປີກ 3,5 ລ້ານໂຕ ໃນປະເທດ ໃນລະຫວ່າງ ລະດູ ໃບໄມ້ຫລົ່ນ ປີ2020 ຈົນຮອດ ລະດູ ໃບໄມ້ປົ່ງ ປີ2021.
ຮຽບຮຽງຂ່າວໂດຍ: ສະໄຫວ ລາດປາກດີ
#Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)
