ຕາມຂ່າວຈາກ ຊິນຮວາ, ວັນທີ2 ສິງຫານີ້,ທ່ານ Myah Suksensan ໂຄສົກ ກະຊວງ ເສດຖະກິດ ແລະ ການເງິນ ກຳປູເຈຍ ຖະແຫລງຂ່າວ ກ່ຽວກັບ ການປັບຫລຸດ ຕົວເລກ ຄາດການ ເຕີບໂຕ ຂອງເສດຖະກິດ ໃນປີນີ້ ຈາກ 5,6% ຍັງເຫລືອ 5,4% ຍ້ອນຜົນກະທົບ ຈາກການສະພາບການຂອງໂລກ.
ສ່ວນຍອດຜະລິດ ຕະພັນພາຍໃນປະເທດ (GDP) ຈະມີປະມານ 30 ຕື້ໂດລາ ສະຫະລັດ ຫລັງຈາກ ໄດ້ຮັບແຮງ ສະໜັບ ສະໜູນ ຈາກການສົ່ງອອກ ເຄື່ອງນຸ່ມຫົ່ມ, ເກີບ ແລະ ສິນຄ້າ ດ້ານການເດີນທາງ ເປັນຫລັກ ລວມທັງ ຂະແໜງການທ່ອງທ່ຽວ, ການກໍ່ສ້າງ ແລະ ຂະແໜງ ກະສິກຳ.
ສຳລັບ ປີນີ້ ຂະແໜງອຸດສາຫະກຳເຄື່ອງນຸ່ງຫົ່ມ ແລະ ການກໍ່ສ້າງ ຈະເຕີບໂຕ 9% ດ້ານການບໍລິການ ເປັນຕົ້ນ ແມ່ນການທ່ອງທ່ຽວ, ການຂົນສົ່ງ ແລະ ໂທລະຄົມນາຄົມ, ການຄ້າ ແລະ ອະສັງຫາ ລິມະສັບ ຈະເຕີບໂຕ 4,3% ສ່ວນຂະແໜງ ກະສິກຳ ຈະເຕີບໂຕ 0,7%.
ນອກນີ້, ອັດຕາເງິນເຟີ້ ຂອງກຳປູເຈຍ ຈະເພີ່ມຂຶ້ນ ຈາກ 3% ມາເປັນ 5% ເຊິ່ງຍັງຢູ່ ໃນການຄວບຄຸມໂດຍ ລັດຖະບານ ກຳປູເຈຍ ໄດ້ສຳຮອງມາດຕະການກະຕຸ້ນ ມູນຄ່າ 989 ລ້ານໂດລາ ສະຫະລັດ ໃນປີນີ້ ເພື່ອຕ້ານ ການກະທົບທາງດ້ານເສດຖະກິດ ແລະ ສັງຄົມ ຈາກໂລກລະບາດຄັ້ງໃຫຍ່.
ປັດຈຸບັນ ໜີ້ສາທາລະນະ ຂອງກຳປູເຈຍ ປະມານ 9,81ຕື້ໂດລາ ສະຫະລັດ ໂດຍ68% ມາຈາກຫຸ້ນສ່ວນ ເພື່ອການພັດທະນາ ທະວິພາຄີ(DPs) ແລະ 32% ມາຈາກຫຸ້ນສ່ວນເພື່ອການພັດທະນາ.
ຮຽບຮຽງຂ່າວໂດຍ: ສະໄຫວ ລາດປາກດີ
#Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)
