ທ່ານ ນາງ ສວນສະຫວັນ ວິຍະເກດ ລັດຖະມົນຕີ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ຕ້ອນຮັບການເຂົ້າຢ້ຽມຂໍ່ານັບ ຂອງທ່ານ ນາງ ອັນເນັດເທີ ຄະໂນບລັອກ (Mrs Annette Knobloch) ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງສາທາລະນະລັດ ສະຫະພັນເຢຍລະມັນ ປະຈຳ ສປປ ລາວ ໃນວັນທີ 7 ກໍລະກົດ ນີ້ ທີ່ກະຊວງ ຖວທ ເພື່ອແຈ້ງໃຫ້ທ່ານລັດຖະມົນຕີ ກະຊວງ ຖວທ ໄດ້ຮັບຊາບກ່ຽວກັບການບູລະນະຮູບແຕ້ມ ຢູ່ວັດສີສະເກດ.
ໃນໂອກາດດັ່ງກ່າວ, ທ່ານລັດຖະມົນຕີ ກໍໄດ້ກ່າວສະແດງການຕ້ອນຮັບ ພ້ອມທັງສະແດງຄວາມຊົມເຊີຍ ແລະ ຕີລາສູງ ຕໍ່ທ່ານເອກອັກຄະລັດຖະທູດ ທີ່ໄດ້ມາຢ້ຽມຂໍ່ານັບໃນຄັ້ງນີ້ ເພື່ອເປັນການຮັດແໜ້ນສາຍພົວມິດຕະພາບ ແລະ ຄວາມສາມັກຄີ ລະຫວ່າງ ສປປ ລາວ ແລະ ສະຫະພັນເຢຍລະມັນ, ພ້ອມທັງແຈ້ງໃຫ້ຊາບກ່ຽວກັບການບູລະນະຮູບແຕ້ມ ຢູ່ວັດສີສະເກດ ແລະ ຂໍຮຽນເຊີນທ່ານ ລມຕ ເຂົ້າຮ່ວມພິທີເປີດປຶ້ມຮູບແຕ້ມ ທີ່ວັດສີສະເກດ ແລະ ທັງສອງຝ່າຍຍັງໄດ້ປຶກສາຫາລືໃນການຮ່ວມມືໃນຕໍ່ໜ້າ ໂດຍສະເພາະລັດຖະບານເຢຍລະມັນຈະສືບຕໍ່ຊ່ວຍເຫຼືອຮູບແຕ້ມວັດເກົ່າແກ່ຢູ່ແຂວງຫຼວງພະບາງ, ລວມທັງການເກັບກຳຂໍ້ມູນຕຶກອາຄານເກົ່າແກ່ຢູ່ແຂວງສະຫວັນນະເຂດ ແລະ ແຂວງຄຳມ່ວນ.
ໃນໂອກາດນີ້, ທ່ານລັດຖະມົນຕີກະຊວງ ຖວທ ກໍໄດ້ກ່າວສະແດງຄວາມຂອບໃຈຕໍ່ທ່ານເອກອັກຄະລັດຖະທູດທີ່ໄດ້ໃຫ້ການຊ່ວຍເຫຼືອໃນຄັ້ງນີ້ ແລະ ຫວັງຢ່າງຍິ່ງວ່າຈະໄດ້ຮັບການຊ່ວຍເຫຼືອຕື່ມອີກ ແລະ ທ່ານເອກອັກຄະລັດຖະທູດ ກໍໄດ້ສະແດງຄວາມຂອບໃຈ ຕໍ່ທ່ານລັດຖະມົນຕີ ກະຊວງ ຖວທ ທີ່ໄດ້ໃຫ້ການຕ້ອມຮັບອັນອົບອຸ່ນໃນຄັ້ງນີ້.
(ຂ່າວ-ພາບ: ບຸນອູ້ມ)
